Pretendimi i paprovuar i Rusisë se Ukraina po planifikon të përdorë një "bombë të pistë" është "qartësisht e rreme" dhe Kremlini nuk duhet ta përdorë atë si një justifikim për të përshkallëzuar luftën, tha në një konferencë shtypi Sekretari i Përgjithshëm i NATO-s, Jens Stoltenberg.
"Rusia tani po pretendon në mënyrë të rreme se Ukraina po përgatitet të përdorë një bombë të pistë radioaktive në territorin e saj. Aleatët e NATO-s e hedhin poshtë këtë pretendim të rremë. Rusia shpesh akuzon të tjerët për atë që planifikon të bëjë. Ne e kemi parë atë më parë, nga Siria në Ukrainë. Rusia nuk duhet ta përdorë këtë si një justifikim për të përshkallëzuar luftën”, tha ai.
Sekretari i Përgjithshëm i NATO-s i përshkroi pretendimet ruse si të papërgjegjshme.
"Çdo përdorim i armëve bërthamore në Ukrainë do të ndryshojë menjëherë natyrën e konfliktit," tha Stoltenberg.
"Presidenti Putin e di se nuk ka fitues në një luftë bërthamore dhe ajo nuk duhet të luftohet kurrë. Ata gjithashtu e dinë në Moskë se një gjë e tillë do të shkaktonte pasoja të rënda”, shtoi ai.
