Vdekja e dhjetra ushtarëve rusë në një sulm me raketa në Vitin e Ri në një ndërtesë në Ukrainën e okupuar lindore, ka shkaktuar akuza mes kritikëve të ushtrisë ruse.
Ministria ruse e mbrojtjes ka pranuar se 63 persona u vranë në sulmin ukrainas në Makiivka rreth mesnatës në natën e Vitit të Ri.
Gruaja e një komandanti akuzoi Perëndimin se po përpiqej të shkatërronte Rusinë.
Por, diku tjetër drejtuesit ushtarakë u akuzuan për paaftësi, raporton BBC.
Ukraina thotë se rreth 400 njerëz u vranë ose u plagosën në Makiivka dhe shifra tjera janë dhënë nga nacionalistët rusë në mediat sociale.
Megjithatë, nuk ka asnjë mënyrë për të verifikuar se sa ushtarë u vranë kur raketat Himars të prodhuara nga SHBA-të goditën një kolegj profesional të mbushur me rekrutë. Në afërsi të zonës po ruheshin edhe municione, të cilat u shkatërruan.
Cilidoqoftë numri, ky është numri më i lartë i viktimave të Rusisë qysh nga fillimi i agresionit të saj në Ukrainë.
Mitingje u mbajtën në disa qytete në rajonin jugperëndimor të Rusisë, Samara, ku guvernatori Dmitry Azarov tha se shumë prej rekrutëve kishin mbijetuar.
