LIVE: Breshëri sulmesh ruse në Ukrainë, shënohet numri më i lartë i civilëve të vrarë në një vend që prej 30 shtatorit

Numri i të vdekurve nga një sulm me raketa ruse në një ndërtesë apartamentesh në qytetin juglindor të Dnipros arriti të dielën në 30, njoftuan autoritetet lokale ndërsa punonjësit e ekipeve të shpëtimit përpiqeshin të nxirrnin të mbijetuarit nga rrënojat.

Ekipet e urgjencës punuan gjatë natës së ftohtë në ndërtesën shumëkatëshe të banimit, ku u shënua numri më i madh i viktimave nga një breshëri sulmesh ruse në qytetet ukrainase të shtunën.

Është numri më i lartë i civilëve të vrarë në një vend, që nga një sulm më 30 shtator në rajonin Zaporizhzhia të Ukrainës.

Goditjet, të cilat vunë gjithashtu në shënjestër kryeqytetin Kiev, dhe qytetin verilindor të Kharkivit, i dhanë fund një ndërprerjeje dyjavore të sulmeve masive të Moskës ndaj infrastrukturës së energjisë elektrike dhe qendrave urbane të Ukrainës.

Rusia hodhi 33 raketa të shtunën, nga të cilat 21 u rrëzuan, sipas gjeneralit Valeriy Zaluzhny, komandant i përgjithshëm i forcave të armatosura të Ukrainës.

Autoritetet e qytetit Dnipro njoftuan të dielën pasdite se të paktën 73 persona u plagosën dhe 43 persona figuronin të zhdukur. Ai tha se 39 persona janë shpëtuar deri tani.

Ivan Garnuk ishte në banesën e tij kur ndërtesa u godit dhe tha se ndihej me fat që kishte mbijetuar. Ai përshkroi tronditjen e tij se si kishin mundur rusët të godisnin një godinë banimi pa vlerë strategjike.

“Këtu nuk ka objekte ushtarake. Nuk ka asgjë,” tha ai. “Nuk ka mbrojtje ajrore, nuk ka baza ushtarake. Thjesht goditën civilë, njerëz të pafajshëm.”

Banorët e Dnipro-s iu bashkuan punonjësve të shpëtimit në vendngjarje për të ndihmuar në pastrimin e rrënojave. Të tjerë sollën ushqime dhe rroba të ngrohta për ata që kishin humbur shtëpitë e tyre.

“Ky është padyshim terrorizëm dhe e gjithë kjo thjesht nuk është njerëzore,” tha një banor lokal, Artem Myzychenko, ndërsa pastronte rrënojat.

Duke marrë përgjegjësinë për sulmet me raketa anembanë Ukrainës, Ministria e Mbrojtjes e Rusisë tha të dielën se ia arriti qëllimit.

“Të gjitha objektivat e përcaktuara janë goditur. Qëllimi i sulmit është arritur,” thuhej në një deklaratë të ministries, postuar në Telegram. Në deklaratë thuhej se raketat u hodhën “mbi sistemin e komandës dhe kontrollit ushtarak të Ukrainës dhe objekteve të lidhura me energjinë”, dhe nuk përmendej sulmi në godinën e banimit në Dnipro.

Të dielën, forcat ruse sulmuan një zonë banimi në qytetin jugor të Ukrainës Kherson, tha guvernatori rajonal Yaroslav Yanushevych në një postim në Telegram. Sipas informacioneve paraprake dy persona kanë mbetur të plagosur.

Sulmet e reja ajrore të Rusisë erdhën ndërsa luftime të ashpra janë ndezur në provincën lindore Donetsk të Ukrainës, ku ushtria ruse ka thënë se ka marrë nën kontroll qytetin e vogël të minierave të kripës Soledar, por Ukraina thotë se trupat e saj janë ende duke luftuar.

Nëse forcat ruse fitojnë kontrollin e plotë të Soledarit, kjo do t’i lejonte ata t’i afrohen më shumë qytetit më të madh, Bakhmut. Beteja për Bakhmutin zgjat prej muajsh, duke shkaktuar viktima të konsiderueshme nga të dyja palët./ Marrë nga VOA

Numri i personave të vrarë në një sulm rus në një kullë banimi në Dnipro është rritur në 14.

Valentyn Reznichenko, guvernatori i rajonit Dnipropetrovsk të Ukrainës lindore-qendrore, postoi përditësimin në Telegram.

Më shumë se 60 persona janë plagosur, 38 janë shpëtuar dhe rreth dy duzina janë ende të zhdukur.

"Operacioni i kërkimit është në vazhdim", shkroi Reznichenko në aplikacionin e mesazheve në orën 2:50 të mëngjesit me kohën lokale (0.50 në MB).

Të paktën një duzinë njerëz janë vrarë në një sulm me raketa ruse në një bllok banimi në qytetin ukrainas Dnipro, si pjesë e një vale masive sulmesh që synojnë civilët dhe infrastrukturën energjetike, raporton Sky news, përcjell "Bota sot".

Ekipet e shpëtimit punuan gjatë natës në temperatura nën zero për të gjetur të mbijetuar në rrënojat e një pallati nëntëkatësh, me britma të dëgjuara poshtë rrënojave.

Pamjet nga skena e sulmit treguan se kulla ishte rrëzuar kryesisht, me shtëllunga të mëdha tymi që dilnin në ajër ndërsa shërbimet e urgjencës kryen kërkimin e tyre. Më shumë se 60 njerëz u plagosën dhe 37 ishin shpëtuar deri më tani, shtoi një deklaratë nga zyra e tij.

Stuhia e sulmeve ruse të së shtunës goditi gjithashtu infrastrukturën kritike në disa qytete të mëdha: në Kiev, kryeqyteti ukrainas; Kharkiv në lindje; dhe Lviv në perëndim.

Ministri i Energjisë i Ukrainës paralajmëroi se ditët në vijim do të ishin "të vështira" për shkak të ndikimit të sulmit të së shtunës, i cili gjithashtu la një person të vdekur në qytetin prodhues të çelikut të Kryviy Rih.

Ukraina është e interesuar për bashkëpunim të ngushtë me SHBA-në për zbatimin e teknologjive të reaktorëve të vegjël modularë.

“Vizioni ynë qëndron në zëvendësimin gradual të kapaciteteve gjeneruese termike, të cilat kanë vuajtur më së shumti nga sulmet ruse, me teknologji moderne pa karbon. Prandaj Ukraina është e interesuar për bashkëpunim të ngushtë me SHBA-në për zbatimin e teknologjive të reaktorëve të vegjël modularë, tha Ministri i Energjisë së Ukrainës, German Galushchenko, tha gjatë takimit online me Sekretaren e Energjisë së SHBA-së Jennifer Granholm.

Zyrtarët gjithashtu i kushtuan vëmendje të veçantë bashkëpunimit në restaurimin e sistemit energjetik të Ukrainës pas sulmeve masive ruse, mënyrave për forcimin dhe mbrojtjen e tij nga kërcënimet ushtarake, si dhe perspektivat për zhvillimin e energjisë së rinovueshme dhe zbatimin e teknologjive të reaktorëve të vegjël modularë.

Galushchenko theksoi se Ukraina përpiqet të rindërtojë sistemin e saj energjetik bazuar në parimet e decentralizimit, elasticitetin ndaj sfidave ushtarake, si dhe zhvillimin e energjisë së gjelbër dhe komponentit të saj bërthamor si një gjeneratë kyçe.

Siç është raportuar, sulmet terroriste në sistemin energjetik të Ukrainës koordinohen nga punëtorët rusë të energjisë. Sulmet masive ndaj infrastrukturës energjetike të Ukrainës kanë vazhduar që nga 10 tetori.

Ministri i Punëve të Jashtme të Ukrainës Dmytro Kuleba u ka bërë thirrje vendeve të G7 dhe Bashkimit Evropian që të vendosin sanksione të ashpra kundër Rusisë në mënyrë që të “vrasin” aftësinë e saj për të prodhuar raketa.

Ai postoi një apel në llogarinë e tij në Twitter të shtunën në mes të sulmit masiv me raketa të Rusisë ndaj qyteteve paqësore të Ukrainës.

“Çdo breshëri raketash shteron më tej rezervat ruse. Megjithatë, ata janë ende në gjendje të prodhojnë të reja. Ne mund dhe duhet të vrasim industrinë e tyre të raketave dhe dronëve me një sulm masiv sanksionesh!”, shkroi Kuleba.

Në këtë kontekst, Kuleba i kërkoi G7 dhe BE-së “të zbatojnë sanksionet përkatëse të propozuara nga Ukraina pa vonesë”.