LIVE: Vjen alarmi nga NATO: Nëse Putini e arrin këtë gjë – mund të shpërthejë luftë e re mes këtyre dy shteteve!

Sllovakia duhet të marrë vendim për dërgimin e avionëve luftarakë MiG-29 në Ukrainë, tha ministri i Mbrojtjes, Jaroslav Nad, duke iu referuar flotës prej 11 avionësh që u tërhoq nga përdorimi verën e kaluar. Por, jo të gjithë këta avionë janë në gjendje operacionale.

“Mendoj se është koha që të marrim një vendim”, shkroi Nad në Facebook.

“Njerëzit po vdesin në Ukrainë, ne vërtetë mund t’iu ndihmojmë, nuk ka vend për të bërë politikë”, shtoi ai.

Nad tha se ka biseduar me ministrin e Mbrojtjes së Polonisë gjatë takimit të Bashkimit Evropian të mërkurën dhe tregoi se i është thënë se Polonia do t’i bashkohej procesit për t’i dërguar Ukrainës avionët MiG-29.

Shtetet perëndimore i kanë dhënë Ukrainës armë, por deri më tani kanë refuzuar që t’i dërgojnë avionë luftarakë. Polonia ka shprehur vullnet që të dërgojë avionë nëse formohet një koalicion shtetesh për këtë çështje.

Të enjten, shefi i zyrës së presidentit të Polonisë, Pawel Szort, i tha Radio Puls se numri i avionëve do të ishte më i ulët sesa 14 tanket Leopard 2 të prodhimit gjerman, që Polonia ka premtuar se do t’i dërgojë në Ukrainë.

“Sigurisht se nuk do të korrespondojë me numrin e Leopardëve që janë dërguar. Ne sigurisht se do ta bëjmë këtë përmes një koalicioni më të gjerë ndërkombëtar”, tha Szrot.

Shtetet që janë në krahun lindor të NATO-s, sikurse Polonia dhe Sllovakia, kanë qenë mbështetëse të fuqishme të Ukrainës që kur Rusia nisi pushtimin vitin e kaluar.

Përkushtimi i Varshavës për fqinjët e saj ka kontribuar që të shtyjë edhe shtetet e tjera evropiane t’i japin Ukrainës armë të rënda, përfshirë tanke, që deri pak kohë më parë ishin kundërshtuar nga disa qeveri, përfshirë atë gjermane.

Kryeministri i Sllovakisë, Eduard Heger, muajin e kaluar deklaroi se shteti i tij do të nisë diskutimet për dërgimin e avionëve, pas kërkesës së Kievit.

Ekzekutivi i Heger është Qeveri në detyrë deri në zgjedhjet që do të mbahen në shtator, dhe Nad tha se ishte i gatshëm që ta përfshijë edhe Parlamentin në vendimin për planin e dërgimit të avionëve në Ukrainë./ REL

Territori i Ukrainës është goditur ditën e sotme me një breshëri raketash ruse, ku 81 prej tyre janë lëshuar në 10 rajone.

Kryeministri i vendit, Denys Shmyhal, ka konfirmuar se sulmi kishte shënjestër objektet e infrastrukturës civile. Sipas tij në 8 nga 10 rajonet ka pasur dëmtime të infrastrukturës energjetike.

Shmyhal shtoi se ndërprerjet e energjisë janë ende të mundshme në disa zona, por këmbënguli se sistemi energjetik i vendit mbetet “i paprekur”.

Ai tha se puna e riparimit po vazhdon në objektet e dëmtuara, me “vëmendje të veçantë” që i kushtohet rivendosjes së energjisë në Kharkiv, pasi ky rajon u godit nga 15 raketa.

Rusia ka kryer një sërë sulmesh në infrastrukturën energjetike që nga tetori, me 40% të totalit të dëmtuar rëndë si rezultat.

Shefi i inteligjencës ushtarake të Lituanisë tha se Rusia ka burime të mjaftueshme që ta vazhdojë luftën në Ukrainë edhe për dy vjet me intensitetin aktual.

Moska tha se nisi “operacionin e posaçëm ushtarak” në Ukrainë një vit më parë për të luftuar kërcënimet e sigurisë. Por, Kievi dhe Perëndimin e kanë quajtur luftë të paprovokuar për të nënshtruar një shtet të pavarur.

“Burimet të cilat Rusia i ka aktualisht do të ishin të mjaftueshme për të vazhduar luftën në intensitetin aktual edhe për dy vjet”, tha shefi i inteligjencës të Lituanisë, Elegijus Paulavicius.

“Se sa gjatë mund të luftojë Rusia po ashtu do të varet nga mbështetja për ushtrinë ruse nga shtetet sikurse Irani dhe Koreja e Veriut”, shtoi ai gjatë një deklarimi për gazetarë.

Paulavicius po ashtu paraqiti raportin për kërcënimet kombëtare, të përpiluar nga agjencitë e inteligjencës së shtetit. Në raport u tha se hakerët e lidhur me qeveritë ruse dhe kineze më 2022 vazhdimisht kanë tentuar të hyjnë në kompjuterët e Qeverisë lituaneze.

“Prioriteti i tyre vazhdon të jetë mbledhja e informacioneve, në aspekt afatgjatë, lidhur me çështjet e brendshme dhe të jashtme të Lituanisë”, u tha në raportin e agjencive të inteligjencës lituaneze. Megjithatë, aty nuk u përmend nëse këto përpjekje ishin të suksesshme.

Lituania ka qenë një prej kritikeve më të ashpra të Rusisë në Bashkimin Evropian dhe është përballur me zemërimin e Kinës pasi më 2021 lejoi Tajvanin të hapte ambasadën e tij de facto.

Zyra e të dërguarit kinez në Vilnius nuk komentoi menjëherë për këto deklarata. Rusia po ashtu vazhdimisht ka mohuar akuzat për aktivitete kibernetike jashtë vendit.

Shërbimet e inteligjencës së Lituanisë thanë se sanksionet ende nuk kanë dëmtuar aftësinë e Rusisë për të financuar ushtrinë e saj, pasi Moska po merr burime të të ardhurave nga sektorë të tjerë./ REL

Ministri i jashtëm rus Sergei Lavrov ka deklaruar ditën e sotme se Rusia nuk ka vënë re asnjë indicie nga ana e zyrtarëve të Kievit për të nisur negociata për zgjidhjen e konfliktit të armatosur në Ukrainë.

“Deri më tani, ne nuk shohim asnjë dëshirë nga ana e fqinjëve tanë ukrainas për të filluar bisedime serioze,” tha Lavrov në një konferencë shtypi pas bisedimeve me homologun e tij nga Arabia Saudite.

“Unë kam deklaruar vazhdimisht se Zelensky nxori një dekret shtatorin e kaluar që ndalonte çdo negociatë me Rusinë, ndërsa patronët perëndimorë të Zelensky vazhdimisht deklarojnë se Rusia duhet të mposhtet në fushën e betejës në mënyrë që të fillojë bisedimet nga një pozicion fuqie. Gjykoni vetë sa të arsyeshme janë deklarata të tilla”, u shpreh Lavrov para mediave.

Ai vuri në dukje se Rusia mirëpret interesin e Arabisë Saudite për të ndihmuar në lehtësimin e zgjidhjes së situatës në vazhdim sa më shpejt të jetë e mundur, si dhe zgjidhjen e saj në kontekstin e kërkesave legjitime të Rusisë, të cilat janë injoruar për vite pas grushtit të shtetit jokushtetues në Ukrainë.

NATO ka paralajmëruar se performanca ushtarake e Rusisë në Ukrainë mund të përcaktojë nëse Kina do pushtojë apo jo Tajvanin.

Shefi i aleancës Jens Stoltenberg deklaroi se një fitore e rusëve mund të inkurajojë Kinën të marrë Tajvanin me forcë.

“Ajo që po ndodh sot në Evropë, nesër mund të ndodhë në Azi”, u shpreh ai, teksa shtoi: “Rezultati i luftës në Ukrainë ndikon në përfundimet që do të nxirren në Pekin. Kjo përfshin Tajvanin”.

“Nëse Putini arrin atë që dëshiron me Ukrainën duke thyer ligjin ndërkombëtar dhe duke përdorur forcën ushtarake, atëherë është një mesazh për liderët e tjerë autoritarë gjithashtu në Pekin se ata mund të arrijnë atë që duan duke përdorur forcën ushtarake”, tha Stoltenberg.

Qeveria e zgjedhur në mënyrë demokratike në Tajvan ka hedhur vazhdimisht poshtë pretendimet kineze mbi ishullin, me një shumicë dërrmuese të njerëzve që duan që ai të mbetet një vend i pavarur.

Nga ana tjetër, presidenti kinez Xi Jinping vazhdimisht bën thirrje për një “proces paqësor ribashkimi”, por Kina mund të përdorë forcën nëse ka nevojë.

Një seri tjetër sirenash sulmi ajror sapo kanë rënë në të gjithë Ukrainën, duke përfshirë në Odesa dhe Kherson në jug, Lviv në perëndim dhe Sumy në veri, përcjell Bota sot.

Alarmi për sulm ajror në Kiev gjatë natës zgjati për shtatë orë, pasi gjithsej 81 raketa u gjuajtën në objektiva në të gjithë vendin nga Rusia.

Ministria ruse e mbrojtjes ka pohuar në minutat e fundit se një sulm masiv që shkatërroi Ukrainën këtë mëngjes ishte hakmarrës.

Moska pretendoi se ishte në përgjigje të një sulmi të dyshuar terrorist në rajonin rus Bryansk, i cili kufizohet me Ukrainën.

Javën e kaluar, presidenti rus Vladimir Putin pretendoi se Rusia ishte goditur nga një “sulm terrorist” në rajonin jugor.

Ukraina nga ana e saj akuzoi Rusinë për organizimin e një “provokimi” të rremë.

Megjithatë, Kievi dukej gjithashtu se nënkuptonte se një lloj operacioni ishte kryer me të vërtetë nga partizanët anti-qeveritar rusë.

Putin kishte akuzuar autorët se kishin hapur zjarr ndaj civilëve në një makinë, duke përfshirë fëmijë.

Guvernatori i Bryansk, Alexander Bogomaz tha se sulmi kishte vrarë dy persona dhe plagosi një djalë 11-vjeçar.

Rusia lëshoi 81 raketa të llojeve të ndryshme gjatë natës së të enjtes, ndërsa nisi një sulm të ri vdekjeprurës kundër Ukrainës, tha kreu i ushtrisë ukrainase, përcjell Bota sot.

Komandanti i Përgjithshëm i Forcave të Armatosura, gjenerali Valerii Zaluzhnyi tha se raketat synonin infrastrukturën kritike.

Raketat përfshinin:

28 raketa lundrimi të lëshuara nga ajri X-101/X-555;
20 raketa lundrimi të lëshuara nga deti Kalibr;
6 raketa lundrimi X-22 të lëshuara nga ajri;
6 raketa lundrimi X-47 Kinzhal të lëshuara nga ajri;
8 raketa avionësh të drejtuar - 2 X-31P dhe 6 X-59;
13 raketa të drejtuara kundërajrore S-300.
Përveç kësaj, u kryen tetë lëshime të dronëve Shahed-136/131 të prodhuar nga Irani, tha ai.

Ai tha se forcat ukrainase shkatërruan 34 nga 48 raketa X-101/X-555, raketa lundrimi "Kalibr", tetë raketa të drejtuara X-31P dhe X-59 dhe katër dronë.

Sulmet vranë të paktën pesë persona në qytetin perëndimor të Lviv dhe u raportuan të plagosur në Kiev, thanë zyrtarët.

Aktiviteti i radarëve rusë është zbuluar pranë kufirit me Ukrainën, raporton Brady Africk nga Instituti Amerikan i Ndërmarrjeve, përcjell Bota sot.

Z. Africk deklaron se aktiviteti është vërejtur përmes Radarit të Hapjes Sintetike (SAR) i kapur nga satelitët dhe shton se kjo mund të jetë ndërhyrje radari nga një sistem rus i mbrojtjes ajrore.

SAR është një sensor aktiv që transmeton sinjalet e mikrovalës dhe më pas merr përsëri sinjalet që kthehen.

Granatimet ruse shënjestruan objektet energjetike në të paktën shtatë rajone anembanë Ukrainës herët të enjten, tha ministri ukrainas i Energjisë Herman Halushchenko në Telegram.

Halushchenko tha se Kievi, Mykolaiv, Kharkiv, Zaporizhzhia, Odesa, Dnipro dhe Zhytomyr u goditën nga sulmet.

Të paktën dy persona u vranë në Kiev dhe rreth 15% e kryeqytetit ishte pa energji elektrike pas sulmeve, tha më herët kryebashkiaku Vitali Klitschko në Telegram.