LIVE/ Zmbrapset Rusia: Po shkojmë drejt disfatës ushtarake - Finlanda anëtar i NATO-s/ Reagon ashpër Moska!

Blogeri ushtarak rus dhe ish-agjenti i FSB-së, Igor Girkin, i njohur gjithashtu si Igor Strelkov, paralajmëroi dje se forcat ruse që luftojnë në Ukrainë po shkojnë drejt humbjes ushtarake.

Pushtimi i dështuar rus ka qenë subjekt i kritikave për disa kohë nga disa blogerë ushtarakë rusë, përfshirë Strelkovin.

Strelkov mbështet qëllimet e ‘operacionit ushtarak’ të Rusisë në Ukrainë, por është gjithnjë e më kritik ndaj Kremlinit, të cilin e akuzon për dështimin në pajisjen e duhur të forcave për pushtimin.

Në fjalimin e tij të fundit, ai akuzoi mediat shtetërore ruse se po “lustrojnë” situatën në Ukrainë. Gjithashtu u ankua se mungesa e informacionit të vërtetë për situatën në Ukrainë prek Rusinë.

“Kjo ka një efekt jashtëzakonisht negativ në situatën në të gjithë vendin, në të gjithë shtetin tonë. Nuk kam frikë të them se po shkojmë drejt një disfate ushtarake”, tha Strelkov.

Këshilltari i Ministrit të Punëve të Brendshme të Ukrainës, Anton Gerashchenko, përktheu komentet e tij dhe postoi videon në Twitter, raporton Newsweek.

Strelkov vazhdoi t’i bëjë thirrje ushtrisë ruse për mungesën e përparimit të bërë gjatë dimrit. Luftimet në muajt e fundit janë përqendruar kryesisht në qytetin Bakhmut, ku ushtarët rusë luftuan së bashku me mercenarët e Wagner për të arritur të paktën një fitore simbolike.

Megjithëse Rusia ka arritur njëfarë suksesi në fushatën disamujore, analistët ushtarakë paralajmërojnë se përparimi rus është ngadalësuar javët e fundit.

“Gjatë dimrit, ne nuk arritëm ta shtynim armikun as 10 kilometra nga Donetsku, pavarësisht se u larguam nga Khersoni. Ne u dëbuam nga rajoni i Kharkivit. Na dëbuan nga afërsia e Kievit”, theksoi Strelkov.

Strelkov përsëriti se ekonomia dhe ushtria ruse janë “plotësisht të papërgatitura për një luftë të zgjatur”. Ai kritikoi gjithashtu autoritetet ruse për klasifikimin ligjor të pushtimit si një “operacion ushtarak special” dhe jo si një luftë, dhe beson se duke vepruar kështu ata po kufizojnë aftësitë ushtarake në Ukrainë. 

Rusia do të forcojë kapacitetin e saj ushtarak në rajonet e saj perëndimore dhe veriperëndimore në përgjigje të pranimit të pritshëm të Finlandës në NATO të martën.

Kështu ka thënë zëvendësministri i Jashtëm rus, Alexander Grushko, njoftoi agjencia shtetërore e lajmeve RIA.

Finlanda dhe Suedia aplikuan për t’u anëtarësuar në NATO vitin e kaluar pasi Rusia filloi agresionin mbi Ukrainë.

Finlanda ka një kufi prej 1,300 km (810 milje) me Rusinë që do të dyfishojë afërsisht kufirin e aleancës transatlantike që përballet me Moskën.

Ministri rus i Mbrojtjes Sergei Shoigu tha vitin e kaluar se Rusia po merrte “kundërmasat adekuate” dhe do të formonte 12 njësi dhe divizione në rajonin e saj ushtarak perëndimor.

Ndërsa Grushko i tha RIA: “Ne do të forcojmë potencialin tonë ushtarak në drejtimin perëndimor dhe veriperëndimor. Në rast se forcat dhe burimet e anëtarëve të tjerë të NATO-s vendosen në Finlandë, ne do të ndërmarrim hapa shtesë për të garantuar me sigurinë ushtarake të Rusisë”.

Reagimi i Moskës zyrtare erdhi pasi u bë e ditur se Finlanda do të bëhet zyrtarisht anëtare e NATO-s të martën.

Kombi nordik, i cili ndan një kufi me Rusinë, aplikoi për t’u bashkuar me aleancën ushtarake pas fillimit të agresionit në Ukrainë nga Vladimir Putin vitin e kaluar.

Ky është zgjerimi i parë i NATO-s që nga anëtarësimi i Maqedonisë së Veriut në aleancë në vitin 2020.

Njoftimi u konfirmua nga Sekretari i Përgjithshëm i NATO-s, Jens Stoltenberg, i cili tha se masa do ta bëjë Finlandën dhe anëtarët e tjerë “më të sigurt”. 

Në përgjigje të raporteve për veprime ushtarake kundër civilëve gjatë sulmit rus në Ukrainë, Instituti Pilecki në Varshavë, krijoi një qendër për mbledhjen dhe ruajtjen e provave të krimeve të mundshme të luftës dhe krimeve kundër njerëzimit.

Qendra Raphael Lemkin për Dokumentimin e Krimeve Ruse në Ukrainë, po mbledh prova si shkatërrimi i infrastrukturës civile, plaçkitjet, dhuna, rrëmbimet dhe vrasjet.

Qendra u krijua nga Instituti Pilecki me bazë në Varshavë, një institucion kërkimor, i cili merret edhe me studimin e regjimeve totalitare.

"Ne po mbledhim prova nga dëshmitarë okularë për krimet e luftës dhe krimet e tjera të kryera nga Federata Ruse në Ukrainë", thotë Kateryna Leontieva, Koordinatore e Qendrës Lemkin.

E themeluar menjëherë pas fillimit të sulmit rus në Ukrainë, qendra mori emrin e një avokati hebre, i cili e paraqiti dhe e përkufizoi termin "gjenocid", që do të thotë "shkatërrim i një kombi ose grupi etnik".

Rusia mohon të ketë kryer krime lufte. Këtu, një numër specialistësh lexojnë dhe përpunojnë dëshmitë e ukrainasve.

“Ne jemi duke punuar me një pyetësor, i cili u krijua posaçërisht për këtë projekt nga shkencëtarë, historianë, juristë dhe psikologë. Ai është i bazuar në parimet e së drejtës ndërkombëtare”, thotë zonja Leontieva.

Specialistët zakonisht kërkojnë dëshmitarë të mundshëm në qendrat e refugjatëve. Një grup i tyre punon gjithashtu në Ukrainë.

Një nga sfidat më të mëdha është bindja e njerëzve për të dëshmuar, thotë Kateryna Sukhomlynova, koordinatore e Qendrës Lemkin.

"Unë e filloj komunikimin tim duke u thënë atyre "Mirëdita. Nëse jeni dëshmitarë ose viktima të krimeve ose nëse keni kaluar nëpër kampe të zonave të pushtuara, flisni me ne", thotë ajo.

Zonja Sukhomlynova është gjithashtu refugjate. Ajo kaloi 21 ditë në Mariupolin e pushtuar dhe në vonë pranoi të dëshmonte për Qendrën Lemkin në Poloni.

"Fatkeqësisht, kam qenë dëshmitare e shumë gjërave gjatë 21 ditëve në Mariupol. Dhe tani detyra ime është të jem një lloj ambasadore e Mariupolit, për të sjellë të vërtetën në botë. Më thërrasin shpesh për të ndihmuar njerëzit nga Mariupoli që të dëshmojnë", thotë ajo.

Mund të duhen disa orë për të plotësuar pyetësorin. Disa dëshmitarë preferojnë të përgjigjen me shkrim ndërsa të tjerët preferojnë të flasin./VOA

Secilit person i garantohet anonimiteti. Por edhe me këtë kusht, dëshmia mund të përdoret në proceset gjyqësore.

"Kushti i vetëm është që dëshmitë duhet të jenë nga dëshmitarë okularë. Kjo është shumë e rëndësishme. Por duke qenë se ne kemi të dhëna të plota personale, është gjithashtu e mundur që thjesht t'i telefonojmë njerëzit sërish para se dëshmitë e tyre t’u dorëzohen prokurorëve”, thotë Magdalena Gawin, drejtore e Institutit Pilecki.

Dëshmitë mund të përdoren edhe për gjetjen e personave të zhdukur.

“Mund të ndodhë që pas disa vitesh disa familje të viktimave mund të fillojnë përpjekjet për të mësuar se çfarë ka ndodhur me të afërmit e tyre dhe për këtë mund të gjejnë informacion në arkivin tonë”, thotë zonja Leontieva.

Qendra ka mbledhur tashmë 800 dëshmi të ukrainasve nga rajone të shumta të vendit, të cilët kanë parë sulmet ruse.

Njerëzit janë më të gatshëm të flasin për shkatërrimin e infrastrukturës se sa për përdhunimet.

Sipas Qendrës Lemkin, koha është kundër dëshmitarëve sepse sa më shumë kohë të kalojë nga ngjarjet tragjike, aq më e vështirë e kanë t'i kujtojnë ato.

Një shpërthim në një kafene në Shën Petersburg ka vrarë një bloger të njohur ushtarak rus Vladlen Tatarsky.

Përveç vrasjes së tij, nga shpërthimi kanë mbetur të plagosur edhe mbi 20 të tjerë, nga shpërthimi në Street Bar Cafe.

Por deri më tani, nuk është e qartë se kush ishte përgjegjës për shpërthimin.

Vladlen Tatarsky (emri i vërtetë Maxim Fomin) ishte një mbështetës i zëshëm i luftës së Rusisë në Ukrainë.

Sidoqoftë, shkatërrimi në kafenenë “Street Bar” në qytetin e dytë më të madh të Rusisë është 1000 milje (rreth 1600 metra) larg vijës së frontit në Ukrainë, por është e pamundur të mos vendoset në kontekstin e luftës në vazhdim, shkruan Sky News.

Pas kësaj, një zyrtar kryesor rus drejtoi gishtin drejt Ukrainës, pa dhënë prova. Pretendimi u hodh poshtë nga Kievi.

Mykhailo Podolyak, një këshilltar presidencial ukrainas, fajësoi terrorizmin e brendshëm rus për shpërthimin.

“Merimangat po hanë njëra-tjetrën në një kavanoz”, shtoi ai.

Mediat ruse dhe blogerët ushtarakë thanë se Tatarsky po takohej me anëtarët e publikut dhe se një grua i dhuroi atij një statujë që me sa duket shpërtheu.

Ndërkohë Interfax, një agjenci ruse e lajmeve, ka thënë se ka një të arrestuar për vdekjen e Vladlen Tatarsky në Shën Petersburg.

Darya Trepova, një banore e qytetit, është akuzuar se ka marrë një mjet shpërthyes në kafene.

Por Sky News thotë se nuk e ka verifikuar këtë informacion.

Vladimir Putin është ‘me njërën këmbë në varr’ – dhe ai mund të vritet për t’i dhënë fund luftës në Ukrainë, ka thënë një ish-shef i CIA-s.

Siç shkruan The Sun, James Olson, ish-shefi i kundërzbulimit të agjencisë së spiunazhit, tha se ai beson se “peshkaqenët tani po sillen rreth tij” në Rusi.

Megjithatë, siç vlerëson ai, nëse Putini qëndron në pushtet, ai kurrë nuk do të heqë dorë nga lufta – dhe kështu mënyra për t’i dhënë fund asaj është që ai të vritet ose të rrëzohet nga pushteti.

Olson, i cili shërbeu për më shumë se 30 vjet në CIA dhe fitoi medalje për shërbimin e tij, shpjegoi se gjërat nuk duken mirë për Putinin – me miqtë e tij oligarkë, ushtrinë e tij, apo edhe njerëzit e tij të vendosur kundër tij, shkruan më tej The Sun.

Putin ka humbur më shumë se 170,000 ushtarë, sipas Ukrainës, që nga fillimi i konfliktit, ndërsa makineria e tij e luftës vazhdon të ecë përpara me një ritëm të ngadaltë.

Kështu, tirani tani me sa duket e ka të ardhmen e lidhur me suksesin ose dështimin e tij në Ukrainë.

“Nëse Putini qëndron në pushtet, do të ketë një luftë të gjatë, sepse ai nuk do të dorëzohet – por nuk mendoj se Putini do të qëndrojë në pushtet. Besoj se ai do të largohet nga pushteti”.

“Unë besoj se ekziston një rrymë e fortë e kundërshtimit ndaj Putinit në ushtri, në shërbimet e inteligjencës, në mesin e oligarkëve”.

Dhe për Olson, duket se gjërat nuk do të përfundojnë mirë për të.

Ish-njeri i CIA-s shpjegoi se Putini “ka llogaritur gabim” – duke mbivlerësuar fuqinë e ushtrisë dhe efektivitetin e udhëheqjes së tyre.

Ndërkohë, sipas shkrimit në fjalë, Putini dihet se jeton në frikën e një kryengritjeje ose grushti të brendshëm – dhe dyshohet se është i fiksuar me rrëzimin dhe vrasjen e mëvonshme të diktatorit libian Muammar Gaddafi.

Olson vazhdoi: “Putini po shkatërron Rusinë. Besoj se ka disa rusë të mirë, disa rusë patriotë që do të vendosin se çfarë është mjaft është mjaft”.

“Unë mendoj se Putini do ‘të nxirret jashtë’. Nuk do ta përjashtoja vrasjen”, ka thënë më tej ai.

“Dhe ky do të ishte fundi i luftës. Sepse populli rus po vuan dhe ata po humbasin njerëz. Putini po e gjakos Rusinë dhe ai nuk mund ta bëjë këtë përgjithmonë”.

Por për sa kohë që Putini qëndron në pushtet, ekziston një “rrezik ekstrem” që lufta mund të zgjerohet përtej Ukrainës, paralajmëroi Olson.

“Ne e dimë se ambiciet rajonale të Putinit ishin të konsolidonte kontrollin e tij mbi Ukrainën Lindore, duke përfshirë edhe marrjen e Moldavisë, e cila është një objektiv”.

Olson shtoi: “Bota duhet të jetë e vetëdijshme se Moldavia është në rrezik të madh”. 

Grupi paraushtarak i Rusisë Wagner ka pretenduar kontrollin “ligjor” të qytetit të bombarduar Bakhmut pas muajsh luftimesh të ashpra.

Kreu i organizatës, Yevgeny Prigozhin, tha se luftëtarët e tij kishin pushtuar bashkinë e zonës, duke postuar një video në kanalin e tij Telegram që tregonte atë duke mbajtur një flamur rus.

“Kjo është kompania ushtarake private Wagner, këta janë djemtë që morën Bakhmutin. Në kuptimin juridik, është e jona,” tha Prigozhin.

Pas publikimit të videos, udhëheqësit ushtarakë ukrainas thanë se trupat armike ishin përpjekur të merrnin kontrollin e qytetit, por forcat e tyre kishin “zmbrapsur më shumë se 20 sulme armike”.

Ukraina ka thënë se forcat e saj ende mbajnë Bakhmutin, me Volodymyr Zelenskyy që tha se vija e frontit ishte “veçanërisht e nxehtë” dje.