Kryeministri spanjoll Pedro Sanchez mbërriti në Kiev më 1 korrik për të takuar Presidentin Volodymyr Zelensky në ditën e parë të presidencës së Këshillit të BE-së.
“Doja që akti i parë i Presidencës spanjolle të Këshillit të BE-së të ishte në Ukrainë së bashku me Zelensky-n”, tha Sanchez në një postim në Tëitter pas mbërritjes.
Vizita e tretë e kryeministrit spanjoll në Kiev gjatë pushtimit të plotë të Ukrainës nga Rusia vjen më shumë se një vit pasi Kievi aplikoi për anëtarësim në BE në fund të shkurtit dhe iu dha statusi i kandidatit në qershor 2022.
“Për herë të parë, fillimi i presidencës së një vendi do të theksohet nga një vizitë në Ukrainë. Dhe kjo në fakt thotë shumë se sa të rëndësishëm do të jenë gjashtë muajt e ardhshëm për Europën tonë,” tha Zelensky.
“Kjo është një periudhë historike për të filluar negociatat për anëtarësimin e Ukrainës në BE. Një Europë e vlerave, një Europë e lirë dhe e fortë, një Europë e paqes është e paimagjinueshme pa Ukrainën.”
Spanja, një anëtare e NATO-s dhe BE-së, ka mbështetur vazhdimisht Ukrainën në luftën e saj kundër agresionit rus, duke ofruar trajnime dhe pajisje ushtarake, duke përfshirë tanket Leopard 2.
