Presidenti Yoon tha se Koreja e Jugut do të rrisë numrin e dërgesave e artikujve ushtarakë jovdekjeprurëse si parzmore dhe helmeta këtë vit. Ai tha se Koreja e Jugut do të ofrojë gjithashtu ndihmë humanitare me vlerë 150 milionë dollarë këtë vit, nga 100 milionë dollarët e dhënë vitin e kaluar
Presidenti i Koresë së Jugut, Yoon Suk Yeol vizitoi Ukrainën, të shtunën, me qëllimin e ofrimit të mbështetjes për vendin e pushtuar, derisa demonstroi edhe bashkëpunimin e kombit të tij me NATO-n.
Zyra e presidentit Yoon raportoi se ai udhëtoi në Ukrainë me gruan e tij, Kim Keon Hee. Kjo është vizita e tij e parë që kur Rusia pushtoi Ukrainën në shkurt të vitit 2022.
Yoon vizitoi Buchan dhe Irpinin, dy qytete të vogla pranë Kievit, ku trupat e civilëve u gjetën në rrugë dhe varre masive, pas tërheqjes së trupave ruse nga rajoni i kryeqytetit, vitin e kaluar. Ai vendosi lule në një monument për të rënët e luftës në vend, përpara takimit me presidentin ukrainas, Volodymyr Zelenskyy.
Koreja e Jugut, një aleat kyç i SHBA-së në Azi, iu bashkua vendosjes së sanksioneve ndërkombëtare kundër Rusisë dhe i ka ofruar Ukrainës mbështetje humanitare dhe financiare. Por kombi aziatik, një eksportues në rritje i armëve, nuk i ka ofruar armë Ukrainës në përputhje me politikën e saj për mosfurnizim me armë të vendeve të përfshira në mënyrë aktive në konflikt.
Gjatë një konference të përbashkët shtypi me Zelenskyy-n, presidenti korean, Yoon tregoi planet për rritjen e numrit të dërgesave mbështetëse në Ukrainë, por nuk përmendi furnizimet me armë.
Yoon e filloi deklaratën e tij me rikujtimin e mbështetjes së forcave të OKB-së për Korenë e Jugut gjatë Luftës Koreane 1950-53, që ndihmoi në zmbrapsjen e një pushtimi nga Koreja e Veriut.
"Situata aktuale me të cilën përballet Ukraina na kujton situatën e kaluar të Republikës së Koresë", tha Yoon.
Zelenskyy falënderoi Seulin për "mbështetjen e fortë ndaj sovranitetit dhe integritetit territorial të Ukrainës" dhe "ndihmën e rëndësishme politike, të sigurisë, ekonomike dhe humanitare" që ka dhënë që nga fillimi i pushtimit rus.
Yoon tha se Koreja e Jugut do të rrisë numrin e dërgesave e artikujve ushtarakë jovdekjeprurëse si parzmore dhe helmeta këtë vit. Ai tha se Koreja e Jugut do të ofrojë gjithashtu ndihmë humanitare me vlerë 150 milionë dollarë këtë vit, nga 100 milionë dollarët e dhënë vitin e kaluar. Ai tha se Koreja e Jugut ka dërguar gjithashtu pajisjet e çminimit dhe ndihma të tjera, që ishin kërkuar nga Ukraina.
Yoon tha se ai dhe Zelenskyy ranë dakord për bashkëpunimin në përpjekjet e rindërtimit kur lufta në Ukrainë të përfundojë.
Mst: “Ukraina nuk kërkoi armë nga Koreja e Jugut”
Koreja e Jugut nuk është anëtare e NATO-s, por si Japonia, Pakistani dhe një pjesë e vogël e vendeve të tjera, ajo konsiderohet një partner global i aleancës ushtarake. Kryeministri japonez, Fumio Kishida vizitoi Ukrainën në mars.
Në përgjigjet e tij të fundit me shkrim ndaj pyetjeve nga Associated Press, Yoon tha se siguria e rajoneve të Atlantikut dhe Indo-Paqësorit është e ndërthurur ngushtë.
Yoon mori detyrën vitin e kaluar mes sfidash të vështira të politikës së jashtme, siç është programi bërthamor i Koresë së Veriut dhe rivaliteti në rritje midis SHBA-së, aleatit kryesor të sigurisë së Koresë së Jugut, dhe Kinës, partnerit të saj më të madh tregtar.
Gjatë një vizite në janar në Korenë e Jugut, Sekretari i Përgjithshëm i NATO-s, Jens Stoltenberg, bëri thirrje që vendi të ofrojë mbështetje të drejtpërdrejtë ushtarake për Ukrainën, duke thënë se Kievi kishte nevojë urgjente për armë, për të luftuar pushtimin e tejzgjatur rus.
Në maj, kur Yoon takoi zonjën e parë ukrainase, Olena Zelenska në Seul, presidenti tha se do të zgjeronte ndihmën jovdekjeprurëse të Koresë së Jugut për Ukrainën. Zyra e Yoon tha në atë kohë se Zelenska nuk bëri asnjë kërkesë për furnizime me armë nga Koreja e Jugut.
Më vonë në maj, Yoon dhe Zelenskyy u takuan për herë të parë në margjinat e samitit të G-7-ës në Hiroshima, Japoni. Zelensky falënderoi Korenë e Jugut për dërgesat e saj humanitare të ilaçeve, kompjuterëve dhe gjeneratorëve dhe kërkoi dispozita shtesë të artikujve jovdekjeprurës, tha zyra e Yoon.
Që nga pushtimi në shkallë të plotë i Ukrainës nga Rusia, Koreja e Jugut ka arritur marrëveshje me vlerë miliarda dollarë për të ofruar tanke, obus, avionë luftarakë dhe sisteme të tjera armësh për Poloninë, anëtare të NATO-s.
Një zyrtar amerikan tha në nëntor se Shtetet e Bashkuara kishin rënë dakord të blinin 100 mijë fishekë artilerie nga prodhuesit e Koresë së Jugut për t'ia ofruar Ukrainës, megjithëse zyrtarët e Koresë së Jugut kanë pohuar se municionet kishin për qëllim të rimbushnin rezervat e varfëruara të SHBA-së.
Mst: Kundërofensiva ukrainase po vazhdon
Vizita e Yoon dhe gruas së tij erdhi dy ditë pasi Rusia lëshoi një tjetër breshëri dronësh të prodhuar nga Irani në rajonin e Kievit. Zyrtarët ukrainas thanë se mbrojtja e tyre ajrore rrëzoi dronët, por rrënojat ranë në katër lagje të kryeqytetit, duke plagosur dy persona dhe duke shkatërruar disa shtëpi.
Megjithëse Kievi nuk u sulmua në orët para mbërritjes së presidentit të Koresë së Jugut, forcat ukrainase të premten dhe gjatë natës, rrëzuan 10 dronë rusë në të gjithë vendin, njoftuan të shtunën forcat ajrore ukrainase.
Në një postim në Telegram, forcat ajrore shtuan se Moska sulmoi me gjashtë dronë Shahed të prodhuar nga Irani, në jug dhe lindje të Ukrainës gjatë natës, katër prej të cilëve u rrëzuan. Ukraina nuk dha menjëherë detajet për viktimat apo dëmet.
Në provincën Zaporizhzhia të Ukrainës jugore, ku Ukraina ka filluar një kundërofensivë për të rimarrë territorin e pushtuar, u raportuan 45 sulme ajrore dhe artilerie midis të premtes dhe të shtunës, njoftoi guvernatori, Yurii Malashka.
Forcat ruse bombarduan provincën fqinje, Kherson, 70 herë gjatë së njëjtës periudhë, duke përdorur mortaja, artileri, dronë, tanke, aviacion dhe raketahedhës të shumtë, tha të shtunën guvernatori, Oleksandr Prokudin. Asnjë civil nuk u plagos, tha ai.
Granatimet ruse gjatë ditës së djeshme vranë një civil në provincën Donetsk të Ukrainës lindore, njoftoi të shtunën guvernatori Pavlo Kyrylenko. Forcat ukrainase kanë fuqizuar kundërsulmin e tyre në zonë, duke u nisur nga Velyka Novosilka drejt qytetit të Mariupolit, të pushtuar nga Rusia.
