LIVE: Bota ‘mban frymën’, së shpejti takim ‘kokë më kokë’ Putin-Zelensky - ja i kujt ishte plani që mori edhe dritën jeshile nga Amerika

Forcat ruse po djegin ushtarët e tyre të vrarë në Ukrainë për të mbuluar shkallën e humbjeve të tyre, tha zëvendësministrja e Mbrojtjes e Ukrainës, Hanna Maliar.

Ajo tha se qindra ushtarë rusë po vriten çdo ditë në lindje dhe jug të vendit, ndërsa Kievi vazhdon kundërofensivën që filloi rreth 4 qershorit.

Maliar tha në Telegram se komanda ruse po përpiqet të fshehë humbjet duke i hedhur trupat në territoret e pushtuara, në vend që të transportojë mbetjet në Rusi.

Ajo theksoi se forcat ruse po i sjellin të vdekurit nga rajoni Kherson në morgun në rrethin Chaplinsi.

Gjithashtu pranoi se afër Melitopolit në rajonin e Zaporizhzhia, i cili ishte i pushtuar nga rusët, “trupat e ushtarëve rusë digjen pothuajse vazhdimisht në natyrë”.

Ajo tha se ata janë sjellë me kamionë dhe se “popullata vendase ka kohë që nuhat tymin karakteristik të pakëndshëm”.

Deklaratat e saj vijnë pasi disa ditë më parë Kievi vlerësoi se numri i ushtarëve rusë të vdekur që nga fillimi i luftës i kalonte 250 mijë.

Rusia nuk e ka përditësuar numrin e saj të vdekjeve që nga shifra prej pak më pak se 6,000 e publikuar në shtator 2022.

Dy persona janë vrarë nga granatimet ukrainase në fshatin rus, Chausy, në rajonin Bryansk në kufi me Ukrainën, ka thënë guvernatori i këtij rajoni të enjten.

Një person tjetër u vra nga një sulm ukrainas në qytetin e kontrolluar nga Rusia, Nova Kahovka në jug të Ukrainës, sipas zyrtarëve të emëruar nga Rusia.

Granatimet në territoret ruse përgjatë kufirit me Ukrainën janë bërë të zakonshme në muajt e fundit në luftën e Rusisë në Ukrainë, pasi Kievi po lufton për t’i larguar forcat ruse nga territoret e veta, të cila janë uzurpuar nga Moska qëkur nisi pushtimi në shkurt 2022.

Guvernatori i Bryansk, Alexander Bogomaz, tha se, përveç dy të vrarëve, janë lënduar edhe dy persona të tjerë në Chausy.

Në Novak Kahovka, administrata e qytetit, e udhëhequr nga Rusia, tha se një civil u vra nga një sulm ukrainas ndaj një biznesi, dhe se një tjetër u plagos.

Hollësitë e këtyre incidenteve nuk kanë mundur të verifikohen në mënyrë të pavarur./REL

Pjesëtarët e njësisë për operacione speciale pranë ushtrisë ukrainase, ka publikuar një video ku shihet sesi snajperistët e tyre eliminojnë dy ushtarë rusë në afërsi të Bakhmutit.

Pamjet shfaqin momentin kur dy ushtarë rusë derisa po lëviznin në një zonë të gjelbëruar, goditen nga ukrainasit qe me vetëm nga një plumb arrijnë t’i eliminojnë.

Në përshkrimin e videos, pjesëtarët e SSO-së kanë bërë të ditur se kanë vërejtur lëvizjet e forcave pushtuese, ku pas intervenimit të tyre kanë arritur të neutralizojnë dy prej tyre.

Ndryshe qyteti i Bakhmutit vazhdon të jetë pika më e nxehtë e luftës në Ukrainë, ku nga të dyja palët raportohet për shumë të vdekur dhe plagosur.

Në anën tjetër, për ukrainasit është bërë vatër e rezistencës, dhe se në këtë qytet mijëra pjesëtarë të grupit mercenar rus Wagner, e kanë pësuar me jetë.

<

Madje ata disa herë kishin pretenduar se kanë marrë nën kontroll këtë qytet, por në fund doli të jetë krejt e kundërta – Wagner u tërhoq nga atje e madje nga i tërë territori i Ukrainës.

Tre persona janë arrestuar për transportimin e barnave të falsifikuara kundër kancerit nga Rusia në Ukrainë.

Shumica e ilaçeve të rreme u krijuan në shtetin rus dhe në disa vende të Lindjes së Mesme, tha Shërbimi i Sigurisë së Ukrainës, raporton skynews.

Tregtarët e dyshuar, emrat e të cilëve nuk bëhen me dije, kanë transportuar produktet përmes kufirit shtetëror, duke i fshehur ato në “hendekët teknologjikë të maskuara” në vetuat e tyre.

Ato në shtetin ukrainas shiteshin në internet dhe shpërndaheshin përmes barnatoreve dhe shërbimeve postare, tha ai.

Autorët bënë miliona hryvnia (monedha ukrainase) përmes skemës së paligjshme dhe u ekspozuan përmes një operacioni special.

“Një hetim është në vazhdim për të zbardhur të gjitha rrethanat e krimit dhe për të nxjerrë autorët para drejtësisë. Ata mund të dënohen me 10 vjet burg”, thuhet në njoftim.

Rusia ka mbajtur stërvitje ushtarake me marinën e Kinës gjatë patrullimeve të përbashkëta në Oqeanin Paqësor, ka thënë ministria e saj e mbrojtjes.

Anijet luftarake zhvilluan stërvitje me avionë dhe helikopterë, duke praktikuar zmbrapsjen e sulmeve ajrore të armikut, shkruan Sky News.

“Si pjesë e stërvitjes së mbrojtjes ajrore, ekuipazhet e anijeve përpunuan algoritme veprimesh për të zmbrapsur një sulm nga mjetet e sulmit ajror të një armiku sillues nga lartësi dhe drejtime të ndryshme,” thuhet në njoftim.

Detyrat synonin forcimin e bashkëpunimit detar midis dy vendeve

Zyrtarët e Rusisë thanë se sistemet e mbrojtjes së saj ajrore rrëzuan dy dronë të tjerë që kishin si objektiv Moskën, për të dytën ditë me radhë.

Sulmi për të cilin u njoftua të enjten shkaktoi ndërprerjen e fluturimeve në dy aeroporte ndërkombëtare, pasi Ukraina dukej se po shtonte sulmet e saj në territorin rus.

Kryebashkiaku i Moskës tha se një dron u rrëzua në rajonin Kaluga në jugperëndim të Moskës dhe një tjetër pranë një aksi rrugor kryesor të Moskës.

Nuk ka njoftime për viktima. Ministria ruse e Mbrojtjes fajësoi Ukrainën për sulmin, por zyrtarët ukrainas nuk bënë komente mbi këto akuza.

Analistët thonë se goditja me dronë në Moskë, pas më shumë se 17 muajsh lufte nuk ka shumë vlerë ushtarake për Ukrainën, por strategjia ka shërbyer për të shqetësuar rusët dhe për t'i bërë ata të ndjejnë nga afër pasojat e konfliktit.

Të enjten, Ukraina njoftoi se tre persona humbën jetën dhe nëntë të tjerë u plagosën si pasojë e një sulmi me raketa në rajonin e Zaporizhias.

Ndërkohë, agjencia e lajmeve Associated Press, njoftoi të enjten, duke iu referuar dy zyrtarëve amerikanë se Pentagoni do t’i dërgojë Ukrainës një tjetër paketë ndihme në vlerën e 200 milionë dollarëve me armë dhe municione në ndihmë të kundërofensivës që ajo ka ndërrmarrë ndaj trupave ruse.

Sipas zyrtarëve, paketa e fundit e ndihmës pritet të përfshijë sisteme raketore HIMARS, sistmeme të mbrojtjes ajrore Patriot, municione për armatime të rënda, raketa dhe armatime të tjera./VOA

Ukraina i ka ofruar Pentagonit një raport për përdorimin e municioneve thërrmuese të diskutueshme amerikane në luftën me Rusinë.

Zyrtari u shpreh se informacioni i transmetuar në Departamentin e Mbrojtjes përfshinte numrin e plumbave dhe numrin e objektivave rusë të shkatërruar, megjithëse nuk pranoi të thoshte se cilat janë ato shifra, shkruan CNN.

Raporti i pritshëm ishte një kërkesë e SHBA-së si pjesë e marrëveshjes për të dërguar raunde artilerie me bomba thërrmuese – të njohura si DPICM – në Ukrainë.

Në një intervistë me CNN muajin e kaluar, ministri i Mbrojtjes i Ukrainës, Oleksii Reznikov tha se ai po planifikonte t’ia dorëzonte raportin homologut të tij, Sekretarit të Mbrojtjes të SHBA-së, Lloyd Austin.

Që nga fillimi i luftës në Ukrainë, një takim ballë për ballë mes presidentit ukrainas Volodymyr Zelensky dhe atij rus, Vladimi Putin, është dukur si “ëndërr” për diplomatët perëndimorë dhe jo vetëm.

Kjo për shkak të refuzimit kategorik të të dyve, qoftë edhe për tu ulur në të njëjtën tryezë. Ka patur përpjekje edhe nga presidenti turk, Rexhep Tajip Erdogan, i konsideruar si “katalizatori” më i mirë  mes tyre, por pa sukses.

Megjithatë, tani duket se takimi do të ndodhë, më shpejt seç pritet. “Kumbari” duket se do të jetë Papa Françesku, kërkesa e të cilit dhe ndërmjetësimi i Emirateve të Bashkuara Arabe, mund të bëjnë realitet përballjen e shumëpritur.

Roli i Emirateve Arabe

Ky takim pa dyshim do të kishte një rëndësi historike, për luftën dhe vijueshmërinë e saj.

Samiti mes liderëve rusë dhe ukrainas mund të zhvillohet gjatë Konferencës së Kombeve të Bashkuara për Ndryshimet Klimatike (COP 28) që do të mbahet nëntorin e ardhshëm në Dubai. Kështu ka raportuar gazeta franceze “L'Orient-Le Jour”, e cila ka shkruar se presidenti i Emirateve të Bashkuara Arabe, Mohammed bin Zayed tashmë po punon për "organizimin e takimit midis presidentit rus Vladimir Putin dhe presidentit ukrainas Volodymyr Zelensky, me kërkesë të Papa Françeskut".

“Lajmi është bërë i ditur nga diplomatët perëndimorë dhe arabë”, shkruan gazeta. Sakaq, “New York Times”, në një editorial të botuar dje, vuri në dukje se deri më tani Departamenti Amerikan i Shtetit "ka pasur sukses të kufizuar në bindjen e Sheikh Mohammed bin Zayed për t'u lidhur me politikën e jashtme të SHBA, veçanërisht kur bëhet fjalë për kufizimin e lidhjeve ushtarake me Kinën dhe izolimin e Rusisë pas pushtimit të Ukrainës”.

Marrëdhëniet me Rusinë

Vitin e kaluar, kujton gazeta amerikane, Zayed, i konsideruar si një partner vendimtar për Shtetet e Bashkuara në rajon, shkoi dy herë në Rusi për të takuar Presidentin Putin.

Madje, qershorin e kaluar Abu Dhabi "ishte mysafir nderi në Forumin e investimeve të liderit rus”. Rusia  dhe Emiratet e Bashkuara Arabe kanë bashkëpunuar ngushtë si anëtarë të aleancës së naftës OPEC + dhe Dubai është një nga kryeqytetet e rralla botërore që ka mbajtur fluturime direkte për në Moskë pas fillimit të konfliktit të Ukrainës në shkurt 2022.

Sakaq, në Emirate janë shtuar jashtëzakonisht flukset hyrëse të parave ruse, naftës dhe arit. Lidhjet në rritje me rivalët amerikanë dhe me ekonomitë në zgjerim si India janë të gjitha përgatitje për një botë që një ditë mund të mos dominohet më nga Shtetet e Bashkuara, siç raporton “New York Times”. 

Për më tepër, një raport i nëntorit 2020 i lëshuar nga inspektori i përgjithshëm i Departamentit të Mbrojtjes të SHBA-së për operacionet kundër terrorizmit në Afrikë zbuloi se Emiratet e Bashkuara Arabe dyshohej se ishin një burim i rëndësishëm financimi për grupin mercenar rus Wagner në Libi. Emiratet e Bashkuara Arabe e mohuan pretendimin.

“Drita jeshile” nga SHBA

Emiratet Arabe janë kthyer me kalimin e kohës në një qendër rajonale të fuqisë. Gjatë viteve të fundit, udhëheqësit e Emirateve kanë shfrytëzuar mundësitë e paraqitura nga fatkeqësitë e ndryshme, duke përfshirë pandeminë e koronavirusit dhe luftën në Ukrainë, për të “çimentuar” statusin e kombit të tyre si një sipërmarrës triumfues, ku multimilionerët britanikë përzihen me oligarkët rusë dhe manjatë indianë. Sa i përket konfliktit në Ukrainë.

Emiratet, së bashku me shumë vende të tjera, e kanë bërë të qartë se nuk do të detyrohen të mbajnë anë. Dhe zyrtarët e Emirateve argumentojnë se duhet ta mbajnë hapur dialogun me Rusinë për të vazhduar përpjekjet për paqe dhe ndërmjetësimin. Prandaj, ai ka filluar këto përpjekje, megjithëse është e vështirë të thuhet se sa sukses do të ketë ky operacion diplomatik.

Ndërkohë, sërish një burim diplomatik evropian siguron se "iniciativa e paqes tashmë është diskutuar me shumë vende evropiane dhe me Shtetet e Bashkuara". Presidenti amerikan Joe Biden, raporton L'Orient-Le Jour, "është i vetëdijshëm për nismën dhe e ka mirëpritur atë, duke thënë se është i gatshëm të ofrojë të gjithë mbështetjen e nevojshme që takimi të arrijë objektivat e tij".

Termocentrali bërthamor i Zaporizhzhia ka humbur lidhjen kryesore të furnizimit me energji elektrike dhe tashmë ka kaluar në një burim rezervë.

Objekti, i cili është më i madhi në Evropë, ishte në prag të një ndërprerjeje të energjisë elektrike dhe punonte me më pak se gjysma e kapacitetit para se të bëhej ndryshimi, ka deklaruar kompania e energjisë në pronësi të shtetit, Energoatom.

“Një regjim i tillë është i vështirë për impiantin e reaktorit, kohëzgjatja e tij është e kufizuar nga projekti i krijuar dhe mund të shkaktojë dështimin e pajisjeve kryesore të njësisë së energjisë,”, thuhet në Telegram.

Fabrika është pushtuar nga Rusia që në ditët e para të luftës dhe është bërë një nga pikat kryesore të konfliktit, raporton skynews.

Shqetësime të shumta janë ngritur për sigurinë e tij, ku të dyja palët fajësojnë njëra-tjetrën për sulmin në zonën përreth saj dhe rrezikimin e një fatkeqësie bërthamore.

Agjencia Ndërkombëtare e Energjisë Atomike është përpjekur të krijojë një mekanizëm sigurie për të parandaluar aksidentet dhe ka kryer inspektime në uzinë gjatë muajve të fundit për të siguruar që një sulm sabotazhi nuk ishte planifikuar.

Rusia pretendon se ka kapur pesë bastione dhe katër pika vëzhgimi në qytetin verilindor të Kupiansk, përcjell Bota sot.

Njësia e 6-të e kombinuar e Moskës mori pozicionet dhe "mundi një togë këmbësorie" gjatë luftimeve intensive, të cilat panë që Ukraina nisi pesë kundërsulme, tha ministria ruse e mbrojtjes.

Të gjitha sulmet u zmbrapsën me sukses dhe humbjet ukrainase arritën në një "togë të fuqisë punëtore", thuhet në Telegram.

Një togë zakonisht përbëhet nga 20 deri në 50 ushtarë dhe komandohet nga një toger.

Kupyansk ka një rëndësi strategjike për Ukrainën dhe Rusinë.

E vendosur 120 km nga Kharkiv, ajo ka një kryqëzim jetik hekurudhor, me një nga linjat që të çon në Rusi.

Sky News nuk ka qenë në gjendje të verifikojë pretendimet ruse.