Siria ka dërguar sot një letër në OKB ku kërkon të Shtetet e Bashkuara të paguajnë dëmshpërblim për naftën e marrë nga vendi dhe për shkelje të ligjit ndërkombëtar me hyrjen e ushtrisë në vend pa leje.
Agjencia shtetërore siriane SANA, publikonte në një artikull letrën e dërguar nga ministria e jashtme për sekretarin e përgjithshëm Antonio Guterres, si dhe për Shqipërinë, e cila mban presidencën rotacionale të Këshillit të Sigurimit në muajin shtator.
Në letër diplomatët sirianë nxisin OKB t’i japë fund shkeljeve të ligjit ndërkombëtar nga SHBA, me stacionimin e trupave ushtarake në verilindje dhe juglindje të Sirisë.
Minsitria siriane shtonte se SHBA dhe grupe të tjera po dëmtoojnë vendin e tyre duke marrë burime me vlerë, kosto e të cilave ka arritur në $115.2 miliardë nga viti 2011 deri në 2023.
Në mbyllje letra bën thirrje që liderët amerikanë të mbajnë përgjegjësi dhe që administrata e SHBA të detyrohet t’i kompensojë për dëmin.
Ministria siriane kërkon që ushtria e SHBA të largohet nga vendi dhe të kthejë kontrollin e naftës e gazit te qeveria e Sirisë.
Gjenerali Mark Milley, ka thënë kohët e fundit se SHBA do të qëndrojë në Lindjen e Mesme përfshi dhe Sirinë, pasi janë të shqetësuar se grupe si ISIS mund të dëmtojnë interesat e tyre, përfshi dhe naftën.
Konflikti i rëndë i Sirisë ka nisur prej vitit 2011 pas protestave kundër presidentit Bashar Assad, që më pas u shndërrua në një konflikt ndërkombëtar me ndërhyrje nga SHBA, Izraeli, dhe Rusia e Irani në krahun e presidentit Assad.
Rreth 400 000 njerëz kanë humbur jetën në konflikt dhe miliona të tjerë janë larguar nga vendi si refugjate.
