LIVE: Ushtria ruse pëson humbje të mëdha, Lukashenko vjen me ‘ofertë’ të çuditshme - ja çfarë fshihet pas lëvizjes së fundit të Putinit

Që nga fillimi i luftës në Ukrainë, një takim ballë për ballë mes presidentit ukrainas Volodymyr Zelensky dhe atij rus, Vladimi Putin, është dukur si “ëndërr” për diplomatët perëndimorë dhe jo vetëm. Kjo për shkak të refuzimit kategorik të të dyve, qoftë edhe për tu ulur në të njëjtën tryezë.

Ka pasur përpjekje edhe nga presidenti turk, Rexhep Tajip Erdogan, i konsideruar si “katalizatori” më i mirë  mes tyre, por pa sukses.

Përpjekje për të qenë “Kumbari” ka pasur edhe nga Papa Françesku. Sakaq, së fundmi një thirrje e papritur për paqe ka tronditur frontin midis Rusisë dhe Ukrainës, kjo edhe për shkak të njeriut që e ka bërë atë.

Presidenti i Bjellorusisë, Aleksandër Lukashenko, një aleat historik i Vladimir Putinit, krejt papritur vetëofrohet për të ndërmjetësuar. Megjithatë, në qarqet perëndimore mbretëron pa dyshim skepticizmi për çfarë fshihet pas kësaj.

“Oferta” e Lukashenkos

Lukashenko ka thënë se të dyja palët kanë ngecur në një "ngërç serioz" dhe se është e nevojshme të negociohet për t'i dhënë fund konfliktit.

"Ka probleme serioze nga të dyja palët," nënvizoi lideri i Minskut.

“Askush nuk mund të bëjë asgjë për të forcuar apo avancuar pozicionin e tij. Ata janë aty kokë më kokë, të ngulitur. Njerëzit po vdesin. Ne duhet të ulemi në tryezën e bisedimeve dhe të gjejmë një marrëveshje."

Lukashenko theksoi gjithashtu nevojën për fillimin e negociatave "pa parakushte " dhe se kërkesat e Ukrainës, përkatësisht tërheqja e plotë nga territoret e kontrolluara nga Moska gjatë konfliktit dhe nga Krimea, duhet të diskutohen "në mënyrë që askush të mos vdesë.

Objektivi kryesor është që të jepet urdhri për të ndaluar”.

Deklaratat e tij tingëllojnë të çuditshme duke marrë parasysh se sa i përfshirë është ai në luftën e Rusisë. Kur filloi lufta, Lukashenko i dha Putinit lejen për të vendosur ushtarë rusë në Bjellorusi.

Mijëra trupa ruse janë stacionuar në vend, si pikënisje për të pushtuar Ukrainën veriore në fillim të luftës. Udhëheqësi bjellorus gjithashtu lejoi Rusinë të transportonte pajisje ruse të mbrojtjes dhe pajisje ushtarake në Bjellorusi, për t'u përdorur në Ukrainë. Bjellorusia gjithashtu ka siguruar furnizime për Rusinë për luftën.

Negociatat

Por, duke marrë parasysh të gjitha, deklaratat e liderit bjellorus nuk janë të gabuara. Kundërofensiva e madhe e Kievit përfundoi efektivisht në dështim, duke qenë se trupat ukrainase arritën të çlironin një pjesë të territorit që ishte i parëndësishëm në krahasim me mbi 44 mijë kilometra katrorë të pushtuar nga rusët në pjesën jugore të vendit.

Ushtria e Moskës, megjithatë, pas muajsh të kaluar në mbrojtje, ka rifilluar sulmet në rajonin e Donetskut, me qëllim pushtimin e qytetit Avdiivka .

Guri i themelit të mbrojtjes së Kievit, megjithatë, u rezistoi sulmeve të pandërprera të batalioneve, tankeve dhe automjeteve të blinduara të Storm Z. Sipas ministrit ukrainas të Mbrojtjes, Rustem Umenov, rusët humbën rreth 4 mijë burra, 100 tanke dhe 250 automjete të blinduara në zonën e qytetit. Potenciali sulmues i të dy palëve, pra, duket se është ezauruar për momentin.

Inteligjenca britanike, megjithatë, ka deklaruar se Putini synon t'i japë goditjen vendimtare rezistencës së Kievit në vitin 2024, vit në të cilin Federata do të ndajë një pjesë të konsiderueshme të PBB-së për forcat e armatosura. Për më tepër, efektiviteti i mundshëm i një fushate të re bombardimi kundër infrastrukturës strategjike të Ukrainës nuk duhet të nënvlerësohet. Në vitin 2022 nuk ishte e mjaftueshme të “gjunjëzohej” populli ukrainas, por pas një viti tjetër konflikti mund të rezultonte të ishte një kartë fituese.

Për më tepër, fillimi i luftës midis Izraelit dhe Hamasit ka zhvendosur vëmendjen e opinionit publik perëndimor drejt Lindjes së Mesme dhe përplasjeve ideologjike në Evropë dhe Shtetet e Bashkuara. Ky mund të jetë një problem për presidentin Volodymyr Zelensky, i cili që nga fillimi i pushtimit rus është fokusuar shumë në mbajtjen e mediave të fokusuara në konfliktin në vendin e tij, në mënyrë që të fitojë mbështetje të gjerë në bllokun BE-NATO.

Forcat ruse besohet se kanë pësuar një nga numrat më mëdhenj të viktimave deri më tani këtë vit si rezultat i luftimeve të vazhdueshme “të rënda, por jo përfundimtare” rreth qytetit Avdiivka të rajonit Donetsk.

Sipas përditësimit të inteligjencës së Ministrisë së Mbrojtjes të Mbretërisë së Bashkuar të shtunën, Rusia ka të ngjarë të ketë angazhuar elementë deri në tetë brigada në sektorin ku filloi një “përpjekje të madhe sulmuese” në mes të tetorit.

Por forcat e armatosura të Ukrainës pretenduan të shtunën se Rusia kishte humbur 298,420 trupa që nga fillimi i pushtimit të saj të plotë vitin e kaluar, duke përfshirë 740 viktima në ditën e fundit.

Këto shifra nuk janë verifikuar në mënyrë të pavarur.

Informatat e përditësuara të inteligjencës thonë se natyra e operacionit në Avdiivka tregon se “sfida thelbësore ushtarako-politike e Rusisë mbetet e njëjtë siç ka pasur gjatë pjesës më të madhe të luftës”.

“Udhëheqësit politikë kërkojnë që të kapet më shumë territor, por ushtria nuk mund të gjenerojë veprime efektive të nivelit operacional”.

Presidenti i Ukrainës, Volodymyr Zelensky, pretendoi të premten se forcat ruse kanë humbur të paktën një brigadë trupash në përpjekje për të avancuar në Avdiivka.

Zelensky ka vazhduar të theksojë seriozitetin e situatës në Ukrainë, e cila u sulmua për herë të parë nga Rusia në shkurt të vitit të kaluar.

Gjatë një vizite të papritur në selinë e NATO-s në Bruksel pas sulmit të Hamasit ndaj Izraelit në fillim të këtij muaji, ai shprehu frikën se konflikti në rritje atje mund të kërcënojë mbështetjen ushtarake për Ukrainën.

Trupat ruse kanë kryer sulme të reja gjatë natës ndaj Ukrainës, duke përdorur 12 dronë sulmues të llojit Shahed, njoftoi Shtabi i Përgjithshëm i ushtrisë ukrainase më 30 tetor. Ushtria tha se të gjithë dronët “janë shkatërruar nga sistemet e mbrojtjes kundërajrore”.

Ushtria ukrainase tha se në 24 orët paraprake janë zhvilluar afër 60 beteja në vijat e frontit në Kupjansk, Limansk, Avdijivka, Marinsk, Shahtarsk dhe Zaporizhja.

“Si rezultat i sulmeve, fatkeqësisht, ka të vdekur dhe të plagosur në mesin e civilëve”, u tha në njoftimin e Shtabit të Përgjithshëm.

Sipas Ukrainës, Rusia ka sulmuar ndërtesa dhe infrastrukturë civile të cilat janë shkatërruar ose dëmtuar.

“Në drejtim të Bahmutit [në lindje të Ukrainës], armiku pa sukses tentoi të rimerrte pozicionet e humbura afër Andrijivkës. Forcat ukrainase vazhduan operacionet e tyre sulmuese në jug të Bahmutit, duke i shkaktuar humbje në njerëz dhe pajisje armikut”, shtoi ushtria ukrainase.

Ditë më parë, Instituti amerikan për Studime të Luftës raportoi se trupat ukrainase kanë përparuar afër Bahmutit dhe kanë vazhduar operacionet e tyre sulmuese në jug të rajonit të Zaporizhjës.

Rusia ka nisur pushtimin e paprovokuar të Ukrainës në fund të shkurtit të vitit të kaluar. Aktualisht, Ukraina po vazhdon kundërofensivën e saj në jug dhe lindje të shtetit me qëllim që të largojë trupat ruse nga territoret e pushtuara./REL

Situata në Ukrainë vijon të mbetet shqetësuese.

Shtabi i Përgjithshëm i Forcave të Armatosura të Ukrainës ka bërë me dije se që nga fillimi i pushtimit të Ukrainës, Moska ka humbur rreth 299,000 përfshirë 660 në 24 orët e fundit.

Që nga shkurti i vitit 2022 deri më sot, Rusia ka humbur 5,175 tanke, gati 9,758 automjete luftarake të blinduara rreth 7, 188 sisteme artilerie, 320 avionë, 324 helikopterë, 5,399 dronë të nivelit taktik-operativ dhe 20 njësi detare.

Detaje tjera nuk janë dhënë.

Izraeli i bëri thirrje Rusisë “të mbrojë të gjithë qytetarët izraelitë dhe të gjithë hebrenjtë”.

Pasi disa dhjetëra burra sulmuan aeroportin e Makhachkala, kryeqyteti i Dagestanit, kur mësuan se një aeroplan nga Tel Avivi do të ulej atje.

“Izraeli pret që autoritetet ruse të mbrojnë të gjithë qytetarët izraelitë dhe të gjithë hebrenjtë dhe të veprojnë me vendosmëri kundër trazirave dhe çdo nxitje për dhunë kundër hebrenjve dhe izraelitëve,” tha zyra e kryeministrit Benjamin Netanyahu.

“Izraeli monitoron me shumë kujdes përpjekjet për të sulmuar qytetarët izraelitë dhe hebrenjtë në mbarë botën”, shtohet në deklaratë.

Situata në aeroportin e Dagestanit, i cili u pushtua nga një turmë protestuesish pasdite, u vendos “nën kontroll”, ka siguruar përmes Telegramit qeveria e kësaj republike ruse në Kaukaz.

Sipas qeverisë lokale, oficerët e policisë u vendosën në aeroportin e Makhachkala pasi më herët u bënë thirrje turmës t’i jepnin fund “veprimeve të paligjshme” të tyre.

Agjencia ruse e aviacionit civil Rosaviatsia tha se forcat e sigurisë larguan të gjithë “qytetarët që nuk kishin leje” për të qenë atje.

Mediat izraelite raportuan se “një numër pasagjerësh izraelitë dhe hebrenj” u dërguan në një zonë të sigurt të aeroportit.

Shumë ukrainas shohin ngjashmëri të madhe mes sulmit të 7 tetorit të Hamasit ndaj civilëve izraelitë dhe agresionit rus kundër Ukrainës që filloi vitin e kaluar. Mes frikës se lufta mes Izraelit dhe Hamasit do të largojë vëmendjen e botës nga vuajtjet e tyre, siç njofton korrespondentja e Zërit të Amerikës, Myroslava Gongadze, udhëheqësit dhe politikanët e komunitetit hebre të Ukrainës shpresojnë që SHBA do të vazhdojë të mbështesë si Izraelin edhe Ukrainën.

Në një nga sinagogat më të vjetra në qendër të Kievit, përfaqësues të besimeve të ndryshme fetare mblidhen për të ngrënë darkë së bashku. Në tryezë ata diskutojnë për sfidat e luftës.

Duke qenë në vijën e parë të luftës që nga fillimi i agresionit rus, ata shohin shumë paralele midis luftës së tyre dhe sulmit të fundit ndaj Izraelit nga militantët e Hamasit.

Rabini David Milman u shpjegon kolegëve të tij origjinën e konfliktit Izrael-Hamas. Ai thotë se u trondit nga sulmi.

“Së pari, u tmerrova. Fëmijët dhe nipërit e mi janë atje. Nuk mund ta kuptoja se si ishte e mundur kjo. Ne prisnim diçka të tillë nga Hezbollahu, Irani – por jo Hamasi. Krahasuar me Hezbollahun dhe Iranin, ata janë thjesht hajdutë xhepash. Shërbimet e zbulimit nuk u kushtuan vëmendjen e duhura”, thotë David Milman, rabin në ushtrinë ukrainase.

Rabini Milman vlerëson se sulmi rus në Ukrainë dhe ai i Hamasit ndaj Izraelit ndoqën të njëjtin skenar. Ai thotë se Hamasi nuk mund ta kishte kryer sulmin pa ndihmë nga jashtë. Ai dyshon për Rusinë, megjithëse, thotë ai, nuk ka prova.

Rabini Milman tregon se ku ulet Presidenti Volodymyr Zelenskyy dhe ambasadori izraelit, në rreshtin e parë kur vijnë në sinagogë. Rabini ka dy atdhe, Ukrainën dhe Izraelin, dhe ai mendon se të dyja vendet kanë nevojë për mbështetje për të luftuar agresionin.

Ihor Semyvolos, drejtor ekzekutiv në Shoqatën e Studimeve të Lindjes së Mesme të Ukrainës, thotë se të dyja luftërat përfshijnë armiq të demokracisë.

“Në nivelin strategjik, nuk ka dyshim se Rusia dhe Irani janë të përfshirë, dhe duke qenë se Irani dhe Rusia janë armiqtë tanë, nuk mund të mos ndikojë në konfliktin tonë. Sipas Presidentit Biden, kjo është pjesë e konfrontimit botëror midis demokracive dhe autokracive dhe ne e ndiejmë efektin e tij në Ukrainë”, thotë zoti Semyvolos.

Ivanna Klympush-Tsintsadze, kryetarja e Komisionit Parlamentar për Integrimin e Ukrainës në BE, thotë se “shumë ukrainas e shohin sulmin ndaj Izraelit si pjesë të së njëjtës luftë që po bën Ukraina”. Ajo mbështet qasjen e Presidentit Biden për të kombinuar një paketë ndihme për Ukrainën dhe Izraelin.

“Me sa kuptoj unë, duke marrë parasysh zhvillimet në politikën e brendshme amerikane tani, kjo është një qasje shumë e zgjuar për t’i shpjeguar publikut amerikan se çfarë duhet të bëjë populli amerikan, në mbështetje të Izraelit dhe Ukrainës”, thotë zonja Klympush-Tsintsadze.

Ukraina ka rëndësi të madhe për shumë hebrenj. Udhëheqësit e kaluar izraelitë Golda Meir dhe Ariel Sharon kishin rrënjë në Ukrainë dhe Rabini Milman thotë se shumë figura fetare hebreje janë varrosur në Ukraini. Ai thotë se lutet çdo ditë që të dyja vendet të mbështeten në luftën e tyre për mbijetesë./ VOA