Presidenti rus, Vladimir Putin, bëri thirrje për zhvillimin e rrugëve të transportit të ngarkesave të grurit dhe plehrave në Azi gjatë një vizite në Kazakistan të enjten, pasi Rusia po kërkon të krijojë rrugë të reja eksporti për shkak të sanksioneve perëndimore.
Duke kryesuar një konferencë mbi bashkëpunimin bujqësor me presidentin e Kazakistanit, Kassym-Jomart Tokayev, Putin tha se Rusia do të ketë rreth 60 milionë tonë metrikë grurë në dispozicion për eksport nga prodhimet e forta të këtij viti.
Putin tha: “Ne jemi të sigurt, sigurisht, se do të jemi vendi numër një në nivel global për sa i përket eksporteve të këtij produkti të rëndësishëm, grurit”, raporton The Guardian.
Ai bëri thirrje për zhvillim të mëtejshëm të rrugëve të transportit në tregjet e mëdha aziatike si Kina dhe India.
Moska gjithashtu thuhet se u ka kërkuar eksportuesve të miratojnë një çmim minimal të eksportit të grurit për të mbrojtur të ardhurat e fermerëve, megjithëse funksionimi i skemës gjysmë zyrtare është i paqartë.
Kazakistani, nga ana tjetër, po kërkon të bëhet një qendër logjistike për mallrat ruse të destinuara për në Kinë dhe Iran, thonë zyrtarët. Vendi tashmë operon një lidhje hekurudhore mes Rusisë dhe Kinës dhe ka një lidhje hekurudhore me Iranin përgjatë Kaspikut.
