Ukraina ka dënuar synimin e Rusisë për të organizuar votimin e zgjedhjeve presidenciale në territorin e pushtuar ukrainas vitin e ardhshëm.
Ministria e Jashtme e Ukrainës tha se çdo votim i tillë i mbajtur në rajonet e pushtuara në vend do të ishte “i pavlefshëm” dhe u zotua se çdo vëzhgues ndërkombëtar i dërguar për të monitoruar zgjedhjet ruse “do të përballet me përgjegjësi penale”.
“Ne i bëjmë thirrje komunitetit ndërkombëtar që të dënojë me vendosmëri synimin e Rusisë për të mbajtur zgjedhje presidenciale në territoret e okupuara ukrainase dhe të vendosë sanksione ndaj atyre që janë të përfshirë në organizimin dhe sjelljen e tyre”, tha Ministria e Jashtme e Ukrainës, raporton Euronews.
Ligjvënësit në Rusi caktuan të enjten zgjedhjet presidenciale të vendit 2024 për 17 mars. Të premten, presidenti rus, Vladimir Putin shpalli kandidaturën e tij për rizgjedhje. Ai është i sigurt se do të fitojë një mandat tjetër gjashtëvjeçar.
