Sulmi i dytë raketor i Rusisë në Kiev këtë javë plagosi të paktën 53 persona, duke dëmtuar shtëpitë dhe një spital për fëmijë, thanë zyrtarët ukrainas të mërkurën, teksa presidenti Volodymyr Zelensky u lut për më shumë ndihmë për vendin e tij.
Dritaret e blloqeve të apartamenteve të banimit u hodhën në erë dhe banorët e frikësuar dolën në rrugë për të vlerësuar dëmet. Mbetjet e raketave shpërthyen një krater të madh në tokë dhe shkatërruan makina të parkuara.
Sistemet e mbrojtjes ajrore të Ukrainës rrëzuan të dhjetë raketat balistike që synonin kryeqytetin rreth orës 3 të mëngjesit thanë Forcat Ajrore të Ukrainës në aplikacionin Telegram.
“Vetëm dje, presidenti i ShBA-së, Joe Biden, dhe unë ramë dakord të punojmë për rritjen e numrit të sistemeve të mbrojtjes ajrore në Ukrainë. Shteti terrorist tregoi se sa i rëndësishëm është ky vendim”, shkroi Zelensky në Telegram, duke iu referuar Rusisë.
Rënia e mbeturinave shkaktoi lëndime dhe shkatërrime në katër rrethe të Kievit përgjatë lumit Dnipro, i cili përshkon kryeqytetin, thanë zyrtarët. Tridhjetë e pesë ndërtesa u dëmtuan, sipas administratës ushtarake të qytetit.
Policia kombëtare e Ukrainës tha se 53 persona, përfshirë gjashtë fëmijë, ishin plagosur nga sulmi. Tetëmbëdhjetë persona janë shtruar në spital, thuhet në një postim në rrjetet sociale.
“Nuk kishte asnjë sirenë sulmi ajror. Rreth orës 4 të mëngjesit, dëgjova një shpërthim. Ne ikëm në korridor, (vala e shpërthimit) më hodhi në dyer”, tha Olena Ustinova, një punëtore e administratës lokale.
“Kam rikthyer vetëdijen dhe fillova të tund dyert, por ato ishin të bllokuara. Unë bërtita për ndihmë nga ballkoni dhe punonjësit e urgjencës erdhën për të më ndihmuar.”
Shtabi i Përgjithshëm i Forcave të Armatosura të Ukrainës identifikoi predha si raketa balistike Iskander-M, si dhe S-400: raketa jashtëzakonisht të shpejta të destinuara për mbrojtjen ajrore, por që janë përdorur edhe për të goditur objektivat tokësore, shkruan Reuters.
