Anëtarët e Këshillit të Sigurimit të OKB-së u bënë thirrje të mërkurën grupit Houthi të Jemenit që të ndalojnë sulmet e tyre ndaj anijeve në Detin e Kuq dhe Gjirin e Adenit, duke thënë se ata kërcënojnë stabilitetin rajonal, lirinë globale të lundrimit dhe furnizimet me ushqime.
Duke iu drejtuar takimit të parë zyrtar të këshillit të vitit 2024, anëtarët kërkuan gjithashtu që Houthi të lirojë “Galaxy Leader”, një anije mallrash e drejtuar nga Japonia, e lidhur me një kompani izraelite, dhe ekuipazhin e saj, të cilin grupi e kapi më 19 nëntor.
Shtetet e Bashkuara besojnë se situata ka arritur një “pikë kthese”, tha Chris Lu, një përfaqësues i ShBA-së në Kombet e Bashkuara.
“Këto sulme paraqesin implikime të rënda për sigurinë detare, transportin ndërkombëtar dhe tregtinë, dhe ato minojnë situatën e brishtë humanitare në Jemen,” duke kërcënuar dërgimin e ndihmave, tha Lu.
“Këshilli i Sigurimit nuk duhet të lejojë që kjo të vazhdojë. Në këtë drejtim, dhe duke pasur parasysh urgjencën dhe rëndësinë e çështjes, Japonia beson se Këshilli i Sigurimit duhet të ndërmarrë një veprim të duhur për të penguar kërcënimet shtesë nga Houthi dhe për të ruajtur paqen dhe sigurinë ndërkombëtare ”, tha ambasadori i Japonisë në Kombet e Bashkuara, Kazuyuki Yamazaki.
Houthi i Jemenit i mbështetur nga Irani thanë të mërkurën se kishin “shënjestruar” një anije me kontejnerë të nisur për në Izrael, shkruan Reuters.
