LIVE: Nuk ndalen sulmet, ja ku i mbajnë “shpresat” ushtarët ukrainas - ministrja gjermane ngre alarmin për luftë!

Ministrja e Jashtme gjermane Annalena Baerbock ka deklaruar gjatë një debati në Bundestagun gjerman, se Rusia mbetet kërcënimi më i madh i sigurisë dhe lirisë në Evropë në të ardhmen, dhe i ka bërë thirrje NATO-s që të vazhdojë të mbështesë Ukrainën.

“Rusia do të mbetet kërcënimi më i madh i sigurisë dhe lirisë tonë në Evropë në të ardhmen”, theksoi ministrja gjermane.

Ajo shtoi se Perëndimi duhet të ndërmerr veprime që ta mbrojë lirinë dhe demokracinë.

“Ne nuk e kemi zgjedhur këtë, nuk e duam këtë. Gjermania ka përgjegjësi të veçanta në këtë aspekt”, shtoi ajo duke iu referuar mosmarrëveshjeve brenda koalicionit sa i përket buxhetit për vitin 2025.

Ndryshe samiti i NATO-s pritet të mbahet në Washington nga 9 deri më 11 korrik, ku do të diskutohen çështje të ndryshme, përfshirë edhe lufta në Ukrainë. 

Ukraina po adreson sfidat e saj të fuqisë duke formuar brigada të reja, por vonesat në furnizimet perëndimore të armëve ka të ngjarë t’i pengojnë ato të pajisen siç duhet, sipas analistëve ushtarakë.

Instituti për Studimin e Luftës tha se Kievi po mbështetet në “ndihmën perëndimore të sigurisë”.

Ai e përshkroi ndihmën e shpejtë nga aleatët e Ukrainës si një “përcaktues vendimtar se kur dhe në çfarë shkalle forcat ukrainase mund të kundërshtojnë iniciativën e fushëbetejës dhe të kryejnë operacione të rëndësishme kundërsulmuese në të ardhmen”, shkruan skynews.

Kjo deklaratë vjen pasi presidenti ukrainas, Volodymyr Zelensky, tha se forcat ukrainase ishin më të pozicionuara për sa i përket fuqisë sesa disa muaj më parë – por çdo kundërofensivë e ardhshme varet nga brigada me pajisje të rënda dhe artileri.

Gjithashtu, presidenti ukrainas tha se pajisjet ushtarake të premtuara nga SHBA-ja po marrin shumë kohë për të mbërritur në vijën e frontit.

“Kjo është tragjedia më e madhe e kësaj lufte, ne kemi një pritje të gjatë, të gjatë, të gjatë”, tha Zelensky. 

Sistemet e raketave antitank ‘Javelin’ janë pjesë e një ndihme të re prej 275 milionë dollarësh që Shtetet e Bashkuara po i dërgojnë Ukrainës. Siç njofton korrespondentja e Zërit të Amerikës Anna Kostutschenko nga viti 2022, raketat ‘Javelin’ janë bërë simbol i rezistencës ukrainase kundër agresionit të Rusisë.

Ushtarët ukrainas i vlerësojnë raketat ‘Javelin’ si të shenjta. Ata thonë që përdorimi i tyre, pavarësisht motit, ka patur një ndikim shkatërrues kundër automjeteve të blinduara ruse dhe madje edhe helikopterëve.

Një rreshter 34-vjeçar i një batalioni antitank nga Poltava, që përdor pseudonimin Yar, thotë se sistemi ‘Javelin’ është shumë efektiv edhe gjatë natës.

“Pavarësisht ndryshimit dramatik në temperaturë midis objektivit dhe ajrit të ftohtë të natës, avullimi i lagështisë që vjen nga toka nuk e pengon shikimin”, thotë ai për Zërin e Amerikës.

‘Javelin’ mund të përdoret nga një individ, por në Ukrainë atë e përdorin një ekip prej 2 apo 3 ushtarësh.

Një tjetër luftëtar, 35-vjeçar, i cili përdor pseudonimin ‘Mercedes’, po stërvitet së bashku me mjekun 22-vjeçar i njohur si ‘Poeti’. Asnjëri prej tyre nuk e tregon emrin për arsye sigurie. Ata të dy dolën vullnetarë pak ditë pasi Rusia filloi sulmin ndaj Ukrainës, në shkurt të vitit 2022. “’Poeti’ braktisi studimet në Universitetin e Kharkivit për t'u bashkuar me forcat e armatosura. Ushtari tjetër, ‘Mercedes-i’ u largua nga biznesi i tij.

“Ishte një biznes që e doja shumë dhe doja ta zgjeroja, por këta njerëz të tmerrshëm, rusët, erdhën dhe shkatërruan gjithçka…”, thotë për Zërin e Amerikës, ushtari ukrainas ‘Mercedes’.

‘Javelin’, sipas ushtarit ukrainas ‘Yar’, është një armë e sofistikuar.

“Pas lëshimit, nuk keni nevojë ta rregulloni objektivin, raketa bën gjithçka vetë. Amerikanët kanë bërë një punë të shkëlqyer me këtë sistem”, thotë për Zërin e Amerikës ushtari ukrainas ‘Yar’.

Raketat ‘Javelin’ nuk janë të lira. Çdo raketë kushton nga 160 mijë deri në 177 mijë dollarë.

Lufta në Ukrainë e ka bërë ‘Javelin-in’ një armë shumë më popullore, si brenda ashtu edhe jashtë Ukrainës. Prodhuesi i saj, kompania amerikane ‘Lockheed Martin’, pothuajse ka dyfishuar prodhimin e raketave. Deri në fund të vitit 2026, kompania planifikon të prodhojnë rreth 4000 raketa në vit.

Disa dronë dyshohet se kanë goditur afërsinë e centralit bërthamor të Zaporizhias, ka thënë Agjencia Ndërkombëtare e Energjisë Atomike (IAEA), duke cituar administratën e objektit.

Zyrtarët rusë pretenduan se tre dronë goditën një zonë pranë këtij centrali, shkruan Sky News.

Mbikëqyrja bërthamore e OKB-së ka thënë se ka marrë raporte për disa sulme me dronë në afërsi të vendit, duke plagosur disa  punëtorë dhe duke shkaktuar zjarre në zonën pyjore aty pranë.

Ekspertët e IAEA raportuan se panë tym që ngrihej pranë objektit dhe dëgjuan shpërthime.

Ushtria e Ukrainës ka pranuar se është tërhequr nga pjesë të qytezës kyçe të Çasiv Jarit në rajonin lindor të Donjeckut, përderisa autoritetet thanë se një person u vra nga sulmet në një ndërtesë të gazit në rajonin e Potltavës.

Një zëdhënës i Forcave të Armatosura të Ukrainës konfirmoi pretendimet e mëhershme të Moskës, duke specifikuar se trupat ruse tani kanë nën kontroll qarkun Kanal në Çasiv Jarit.

“Zmbrapsja e mbrojtur është miratuar nga komandanti i ushtrisë”, tha zëdhënësi.

Çasiv Jari ka qenë skenë e luftimeve intensive mes forcave ukrainase dhe atyre ruse që nga muaji prill.

Kjo qytezë shërben si qendër logjistike për forcat ukrainase, të cilat po përballen me pushtimin e nisur nga Rusia në shkurtin e vitit 2022./REL

Tensionet janë ndezur përsëri përgjatë kufirit Bjellorusi-Ukrainë. Ukrainasit po përfundojnë me shpejtësi fortifikimet dhe linjat e mbrojtjes, dhe ushtritë bjelloruse dhe ruse kanë ngritur gatishmërinë e tyre luftarake, gjë që u konfirmua nga presidenti i panjohur bjellorus, Aleksander Lukashenko. Forca shtesë të këmbësorisë u dërguan në kufirin me Ukrainën, pasi Kievi është vetëm rreth 150 km larg, dhe sistemet ruse kundërajrore Iskander, të afta për të gjuajtur raketa me ngarkesë bërthamore, si dhe raketa vetëlëvizëse bjelloruse u vendosën lëshuesit. Lukashenko paralajmëroi Ukrainën të mos “luajë me zjarrin” dhe akuzoi Perëndimin se po përpiqet “të tërheqë Bjellorusinë në luftë”, por se, siç thotë ai, nëse “kërcënohet siguria dhe sovraniteti i vendit, ai do të godasë me të gjitha mundësitë”.

Kërcënimet e Bjellorusisë

Në të njëjtën kohë, siç raportohet nga agjencia ruse e regjimit Ria Novosti, shefi i Shtabit të Përgjithshëm të Ushtrisë Bjelloruse, gjenerali Pavel Muravejko, u mburr se “ushtarët bjellorusë kanë mësuar të përdorin armë bërthamore jostrategjike ruse”, të cilat, le të kujtojmë, Rusia u vendosën në Bjellorusi në fillim të vitit 2024, gjë që e bëri atë një “shtet bërthamor”, duke shkelur kështu marrëveshjet ndërkombëtare, dhe Bjellorusia “përditësoi” doktrinën e saj ushtarake si rezultat. Të mos harrojmë, Ukraina hoqi dorë nga potenciali i saj bërthamor pas rënies së BRSS, duke ia dorëzuar Rusisë, e cila duhej të garantonte sigurinë e tyre, së bashku me SHBA-në dhe Britaninë e Madhe. “Ne kemi mësuar të trajtojmë armët bërthamore, ne dimë t’i përdorim ato, ne jemi të aftë ta bëjmë atë. Jeni të sigurt se do ta përdorim nëse kërcënohet sovraniteti dhe pavarësia e vendit tonë, raportojnë mediat ruse fjalët e gjeneralit Muravejko.

Streha e armëve bërthamore

Më 25 mars 2023, siç thonë ata, “me kërkesë të Minskut”, Presidenti rus Vladimir Putin urdhëroi vendosjen e armëve bërthamore taktike ruse në Bjellorusi. Moska ripajisi avionët bjellorusë për të mbajtur dhe gjuajtur municione speciale bërthamore. Ekspertët dhe pilotët bjellorusë të raketave morën trajnimin e duhur në Rusi, sipas agjencisë së lajmeve pro-Kremlinit TASS. Disa analistë ushtarakë besojnë se Bjellorusia po “ngjall panik” për të justifikuar përfshirjen e mundshme të ushtrisë ruse në një sulm ndaj Ukrainës nga Bjellorusia, ose të paktën për të detyruar ukrainasit të japin një pjesë të forcave të tyre, të cilat ata mund t’i dërgojnë në fushëbeteja juglindore, ku rusët kanë arritur kohët e fundit suksese të caktuara, i lënë në mënyrë parandaluese në “drejtimin bjellorus”. Një kontigjent i ri i ushtrisë ruse dhe pajisjeve ushtarake ka mbërritur gjithashtu në Bjellorusi, por Lukashenko pretendon se nuk duhet të jetë një punë e madhe sepse, siç thotë ai, “këto janë vetëm forcat që erdhën për të marrë pjesë në paradë ushtarake me rastin e Ditës së Pavarësisë së Bjellorusisë”.

Plani i vjetër

Bjellorusia nuk ka gjasa të rrezikojë një sulm ndaj Ukrainës ose të marrë pjesë në një veprim të tillë, pasi kjo mund të shkaktojë pasoja të brendshme dhe protesta kundër Lukashenkos. Megjithatë, shtimi në rritje i forcave ruse në Bjellorusi e bën të qartë se Moska nuk ka ndërmend të lërë të papunë kaq shumë ushtarë. Është interesante se, ndërsa grumbullon ushtrinë në kufirin ukrainas, Lukashenko po përpiqet të “ringjallë” planin e vjetër të “futjes” së emigrantëve në Poloni dhe Lituani dhe të “rigjenerojë” atë rrugë emigrantësh. Mediat polake shkruajnë se ka një ringjallje të dukshme të aktivitetit të emigrantëve në kufi dhe se që nga fundi i majit, është regjistruar një rritje e vazhdueshme e numrit të tentativave për të kaluar ilegalisht kufirin. “Migrantët si armë kundër Perëndimit” është një taktikë që Lukashenko dhe Putin krijuan në vitin 2020, kur shpërthyen protestat në Bjellorusi për shkak të një fitoreje të rreme në zgjedhjet presidenciale, dhe ajo u aktivizua veçanërisht në fillimin e agresionit rus kundër Ukrainës në 2022.

Shtetet e Bashkuara së shpejti do të shpallin një paketë ndihme ushtarake prej më shumë se 2.3 miliardë dollarësh për Ukrainën, tha Sekretari i Mbrojtjes Lloyd Austin në një takim me homologun e tij ukrainas Rustem Umerov në Pentagon. Austin, në kuadër të samitit të NATO-s që do të mbahet në Uashington nga 9 deri më 11 korrik, tha se SHBA “do të ndërmarrë hapa për të ndërtuar një urë për anëtarësimin e Ukrainës në NATO”, por nuk dha detaje.

Zyrtarët ukrainas u kanë kërkuar aleatëve prej muajsh që t’u ofrojnë atyre sisteme shtesë të mbrojtjes ajrore për të kundërshtuar sulmet e shpeshta me raketa dhe dron nga forcat ruse. Austin tha se paketa e fundit do të përfshijë gjithashtu armë antitank dhe përgjues të mbrojtjes ajrore dhe do të autorizojë prokurimin e përshpejtuar të interceptorëve NASAMS dhe Patriot.

“Jam krenar që SHBA së shpejti do të shpallë një paketë të re ndihme me vlerë 2.3 miliardë dollarë për Ukrainën,” tha Austin përpara fillimit të takimit me Umerov.

“Paketa, e cila po jepet nën autoritetin e presidentit, do të sigurojë më shumë përgjues të mbrojtjes ajrore, armë antitank dhe municione të tjera kryesore nga inventari i SHBA,” tha ai.

SHBA ka dhënë më shumë se 50 miliardë dollarë ndihmë ushtarake që nga viti 2022, por disa janë të shqetësuar për ndihmën e ardhshme të SHBA për Kievin nëse Donald Trump fiton zgjedhjet presidenciale të 5 nëntorit. Dy nga këshilltarët kryesorë të Trump kanë paraqitur një plan për t’i dhënë fund luftës së Rusisë në Ukrainë, nëse ai zgjidhet, me të cilin ai do t’i bëjë të ditur Ukrainës se do të vazhdojë të marrë armë amerikane vetëm nëse hyn në bisedime paqeje me Moskën. Sipas këtij propozimi, qëndrimi amerikan ndaj luftës do të ndryshojë ndjeshëm.

Gazetari amerikan Tucker Carlson ka paralajmëruar intervistën me presidentin ukrainas Volodymyr Zelensky, për të cilën ka thënë se shumë shpejt do të transmetohet.

Ai këto komente i bëri në profilin e tij në platformën X, ku tha: “me sa duket kemi intervistën me Zelenskyn”.

Carlson gjithashtu bëri të ditur se i janë dashur dy vite përpjekje për të aranzhuar intervistën me presidentin ukrainas, pasi kishte realizuar një tjetër me presidentin rus Vladimir Putin në shkurt.

“Qëllimi është t’i sjellim amerikanë sa më shumë informacione lidhur me luftën, që ka ndryshuar pozicionin e këtij vendi në botë. Shpresoj që shpejt do të transmetohet”, shtoi gazetari amerikan.

Ndryshe ish-gazetari i Fox News, kishte realizuar më 6 janar intervistën me liderin rus – ku nuk hezitoi të udhëtojë për në Moskë për t’u takuar me Putinin.

Në këtë intervistë Putin pati pretenduar se “dëshiron një rezolutë për situatën në Ukrainë – duke e realizuar atë përmes negociatave”. 

Trupat ukrainase janë tërhequr nga një pjesë e qytetit kyç të vijës së frontit të Chasiv Yar në rajonin lindor të Ukrainës Donetsk, ka thënë një zëdhënës ushtarak.

Zëdhënësi ushtarak i Kievit, Nazar Voloshyn i tha televizionit kombëtar se ishte bërë "jopraktike të mbahej lagja e kanalit pasi armiku hynte në të".

Ministria ruse e mbrojtjes pretendoi dje se kishte marrë nën kontroll rrethin "Novyi", i cili shtrihet në perëndim të kanalit Siverskyi Donets-Donbas.

Z. Voloshyn tha se mbajtja në këmbë "kërcënonte jetën dhe shëndetin e ushtarakëve tanë", duke shtuar se pozicionet e trupave "u shkatërruan".

Komanda vendosi të tërhiqet në pozicione më të mbrojtura dhe të përgatitura, por edhe atje armiku nuk i ndal veprimet e tij aktive luftarake, shtoi ai.

Ukraina i ka rrëzuar 21 prej 22 dronëve me të cilët Rusia e sulmoi gjatë natës, njoftoi Forca Ajrore të enjten.

Kundërajrorët ukrainas i rrëzuan dronët mbi rajonet e Ukrainës veriore dhe qendrore, thuhet në njoftim.

Guvernatori i rajonit verior Çernihiv tha se njëri prej dronëve e goditi një ndërtesë në rajonin e tij, por nuk dha hollësi të tjera.

Megjithatë, ai njoftoi se mbi 5.000 konsumatorë në këtë rajon kanë mbetur pa furnizim me rrymë, për shkak të sulmeve ruse mbi infrastrukturën energjetike.

Guvernatori i Dnipropetrovskit tha se dy dronë u rrëzuat nga kundërajrorët ukrainas mbi rajonin e tij.

Rusia është duke i vazhduar sulmet me raketa dhe me dronë mbi rajone të ndryshme ukrainase.

Të mërkurën, së paku pesë persona u vranë dhe 34 të tjerë u plagosën nga një sulm i ushtrisë ruse me dronë dhe raketa në qytetin Dnjepër të Ukrainës.

Pas atij sulmi, Volodymyr Zelensky, presidenti i Ukrainës, i cili i bëri thirrje Perëndimit për ndihmë ajrore.

"Vetëm dy gjëra mund ta ndalin këtë terror rus: sistemet moderne të mbrojtjes ajrore dhe armët me rreze të gjata veprimi", shkroi Zelensky në X.

"Bota mund të mbrojë jetë, për këtë nevojitet vendosmëria e liderëve. Vendosmëria duhet ta bëjë përsëri normë mbrojtjen nga terrori", shtoi ai.

Rusia e nisi pushtimin e plotë të Ukrainës në shkurt të vitit 2022.

Perëndimi ka ndërmarrë sanksione të ashpra kundër saj, ndërsa Ukrainën është duke e ndihmuar me armatim.

Muajin e kaluar, Bashkimi Evropian ka nisur edhe negociatat për anëtarësimin e Ukrainës në radhët e veta./REL