Dronët ukrainas goditën një depo armësh në rajonin Tver të Rusisë gjatë natës, konfirmoi një burim nga Shërbimi i Sigurisë së Ukrainës (SBU) për Kiev Independent. Shpërthimi ka ndodhur në afërsi të qytetit Toropec.
Fotot dhe videot e postuara në kanalet ruse Telegram herët këtë mëngjes tregojnë shpërthime të shumta dhe një re të madhe tymi në një magazinë në qytetin e Toropec. Guvernatori i Tver Oblast Igor Rudenja raportoi se një zjarr shpërtheu në Toropec për shkak të rënies së mbeturinave nga një dron, por ai pohoi se situata është "nën kontroll".
Gjatë gjithë mëngjesit, kanë ardhur pamjet e reja të një shpërthimi të madh që tronditi tokën sikur të ishte një tërmet, ku mund të shihet se si në momentin e goditjes, një kërpudha e madhe zjarri ngrihet dhjetëra metra në ajër.
Sipas mediave ruse, forca e shpërthimit ka qenë aq e madhe, saqë toka është lëkundur dhe xhamat në afërsi janë thyer. Zjarrfikësit po përpiqeshin të frenonin zjarrin, tha në Telegram Igor Rudenia, guvernatori i rajonit Tver. Megjithatë, ai nuk specifikoi se çfarë po digjej.
