Papa Françesku foli dje për luftën në Gaza. Papa tha se mendimet e tij shkojnë për 153 gra dhe fëmijë të vrarë së fundmi nga një sulm izraelit në Gaza.
“Vëllezër dhe motra, lufta është gjithmonë një disfatë, gjithmonë!”, tha ai para audiencës së tij në sheshin e Shën Pjetrit, duke iu drejtuar besimtarëve për Ditën e të Gjithë Shenjtorëve, që festohet nga katolikët çdo 1 nëntor.
Teksa foli për konfliktet në Ukrainë, Palestinë, Liban dhe Sudan përpara se të bënte thirrje për paqe në Lindjen e Mesme, ai tha se “mospërfillja e luftës” simbolizon “fitoren e gënjeshtrës dhe mashtrimit”.
Duke iu referuar sulmit ajror të ushtrisë izraelite javën e kaluar në zonën Jabalia të Gazës veriore, ai tha se mendon për “153 gratë dhe fëmijët e masakruar ditët e fundit në Gaza”.
Viktimat e javës së kaluar janë midis të paktën 43 mijë njerëzve të vrarë në Gaza nga sulmet izraelite, shumica prej tyre gra dhe fëmijë. Gati 13 muaj pas ofensivës së vazhdueshme të Izraelit, numri i të plagosurve po ashtu ka shkuar në mbi 101 mijë.
Solidaritet për Spanjën e goditur nga përmbytjet
Papa shprehu gjithashtu solidaritetin e tij për qytetarët e prekur nga fatkeqësia e përmbytjeve në Spanjë.
Ai shprehu ngushëllimet e tij për ata që kanë humbur jetën dhe bëri thirrje për mbështetje për të gjithë ata që po vuajnë pasojat e kësaj fatkeqësie të rëndë natyrore.
