Të paktën 16 persona kanë humbur jetën dhe 10 të tjerë janë plagosur pasi një rrëshqitje dheu goditi provincën Java Qendrore të Indonezisë, thanë autoritetet qeveritare.
Rrëshqitja e dheut në qytetin e Pekalongan u shkaktua nga shirat e dendur, tha një zëdhënës i agjencisë së zbutjes së fatkeqësive të vendit. Autoritetet janë në kërkim të tre personave të tjerë të zhdukur pasi kanë paralajmëruar se shiu pritet të vazhdojë për disa ditë.
Media lokale e lajmeve Kompas TV tregoi shtëpi të dëmtuara rëndë dhe pjesërisht të fundosura nga rrëshqitja e dheut. Disa makina u panë të zhytura në baltë.
Rrugët u dëmtuan nga rrënojat dhe shkëmbinjtë e shpërndarë nëpër to. Zëdhënësi tha se dy ura ishin goditur gjithashtu.
Doni Prakoso, shefi i policisë në Pekalongan, tha se punonjësit e shpëtimit po përpiqeshin të gjenin të paktën pesë persona që ishin ende të zhdukur.
Bergas Catursasi Penanggungan, një zyrtar i agjencisë së katastrofave në Java Qendrore, tha se përpjekjet e kërkimit ishin vonuar për shkak të vështirësisë për të hyrë në zonë.
“Vullnetarët janë në proces për të shkuar në vendndodhje,” tha ai. “Koha është e kufizuar për shkak të motit, ne po garojmë kundër motit.”
Penanggungan tha se vullnetarët lokalë i ishin bashkuar kërkimit së bashku me punëtorët e shpëtimit, ndërsa makineri të rënda do të thirreshin për të ndihmuar në gërmimin për të mbijetuarit “të cilët janë varrosur nën tokë “.
Indonezia është e prirur ndaj rrëshqitjeve të dheut gjatë sezonit të shirave, zakonisht midis nëntorit dhe prillit, por disa fatkeqësi të shkaktuara nga moti i pafavorshëm kanë ndodhur gjatë këtij sezoni në vitet e fundit.
Në dhjetor, 10 njerëz u vranë nga përmbytjet që goditën fshatrat kodrinore në ishullin kryesor të vendit, Java. Në muajin e kaluar, përmbytjet dhe rrëshqitjet e dheut në provincën e Sumatrës së Veriut vranë të paktën 29 njerëz.
