Presidenti i Egjiptit, Abdel Fattah al-Sisi, dhe Presidenti i Shteteve të Bashkuara, Donald Trump, ranë dakord mbi nevojën për të konsoliduar marrëveshjen e armëpushimit të Gazë, gjatë një bisede telefonike që patën të shtunën, tha presidenca egjiptiane. Sidoqoftë, është e paqartë nëse ata diskutuan mbi thirrjen e Presidentit Trump për transferimin e palestinezëve nga Gaza drejt Egjiptit dhe Jordanisë.
Shtëpia e Bardhë tha se udhëheqësit folën rreth "rolit të rëndësishëm të Egjiptit në lirimin e pengjeve në Gazë" dhe se zoti Sisi shprehu besimin se Presidenti Trump mund të sjellë paqe në rajon.
Egjipti tha se dy udhëheqësit patën një dialog pozitiv ku u vu theksi tek nevoja për zbatimin e plotë të fazës së parë dhe të dytë të armëpushimit mes Izraelit dhe grupit Hamas, dhe nevojës për të rritur dërgesat e ndihmave humanitare në Gazë.
Në asnjë prej deklaratave zyrtare nuk përmendet nëse dy udhëheqësit diskutuan mbi deklaratat e bëra gjatë javës së shkuar nga Presidenti Trump se Egjipti dhe Jordania duhet të pranojnë palestinezët nga Gaza.
Presidenti Sisi e hodhi poshtë idenë të mërkurën, duke e cilësuar si një "akt padrejtësie".
Megjithatë, të enjten zoti Trump përsëriti thirrjen e tij, duke thënë, "ne bëjmë shumë për ta dhe ata do ta bëjnë këtë", një referencë e dukshme e ndihmës amerikane si për Egjiptin ashtu edhe për Jordaninë.
Ministrat e jashtëm arabë, të mbledhur të shtunën në Kajro, kundërshtuan gjithashtu mundësinë e transferimit të palestinezëve, duke thënë se një veprim i tillë do të kërcënonte qëndrueshmërinë rajonale, do të përhapte konfliktin dhe minonte perspektivat për paqe.
