Kryeministri japonez Shigeru Ishiba shprehu optimizëm të dielën se vendi i tij mund të shmangë tarifat më të larta të SHBA-së, duke thënë se presidenti Donald Trump e ka “njohur” investimin e madh të Japonisë në SHBA dhe vendet e punës amerikane që ajo krijon”.
Në takimin e tij të parë në Shtëpinë e Bardhë të premten, Ishiba i tha transmetuesit publik NHK, se i ka shpjeguar Trumpit se sa prodhues japonezë të automjeteve po krijonin vende pune në Shtetet e Bashkuara, transmeton Telegrafi.
Të dy nuk diskutuan në mënyrë specifike për tarifat e automjeteve, tha Ishiba, megjithëse ai theksoi se nuk e dinte nëse Japonia do t’i nënshtrohej tarifave reciproke që Trump ka thënë se planifikon të vendosë mbi importet.
Tokio deri më tani i ka shpëtuar luftës tregtare që Trump filloi në javët e tij të para në detyrë. Ai ka shpallur tarifa për mallrat nga Kanadaja, Meksika dhe Kina, megjithëse shtyu tarifat prej 25 për qind për fqinjët e tij të Amerikës së Veriut për të lejuar bisedimet.
Tensionet e përshkallëzuara tregtare që kur Trump u kthye në Shtëpinë e Bardhë më 20 janar, kërcënojnë të përçajnë ekonominë globale.
Ishiba tha se beson se Trump “e ka njohur faktin se Japonia ka qenë investitori më i madh në botë në Shtetet e Bashkuara për pesë vjet rresht, dhe për këtë arsye është i ndryshëm nga vendet e tjera”.
“Japonia po krijon shumë vende pune në SHBA. Unë besoj se (Uashingtoni) nuk do të shkojë drejtpërdrejt në idenë e tarifave më të larta”, tha ai.
Ishiba shprehu optimizëm se Japonia dhe SHBA-ja mund të shmangin një luftë tarifore kokë më kokë, duke theksuar se tarifat duhet të vendosen në një mënyrë që “të përfitojnë të dyja palët”.
“Çdo veprim që shfrytëzon ose përjashton palën tjetër nuk do të zgjasë. Çështja është nëse ka ndonjë problem midis Japonisë dhe Shteteve të Bashkuara që garanton vendosjen e tarifave më të larta”, shtoi ai.
Japonia kishte investimet më të larta të huaja direkte në Shtetet e Bashkuara në 2023 me 783.3 miliardë dollarë, e ndjekur nga Kanadaja dhe Gjermania, sipas të dhënave më të fundit të Departamentit të Tregtisë së SHBA.
Trump i bëri presion Ishibës që të mbyllte suficitin tregtar vjetor të Japonisë prej 68.5 miliardë dollarësh me Uashingtonin, por shprehu optimizëm se kjo mund të bëhej shpejt, duke pasur parasysh një premtim nga Ishiba për të sjellë investimet japoneze në SHBA në 1 trilion dollarë.
Të dielën, Ishiba identifikoi gazin natyror të lëngshëm, çelikun, AI dhe veturat si zona ku kompanitë japoneze mund të investonin.
