Donald Trump pezullon ndihmën ushtarake për Kievin. Shtëpia e Bardhë njofton se pezullimi do të zgjasë “derisa të shfaqet vullneti i mirë i angazhimit të Kievit për paqen”.
Bllokimi përfshin të gjitha ndihmat ushtarake që nuk ndodhen aktualisht në Ukrainë, pra dërgesat e reja, përfshirë armët në tranzit ose në proces dërgimi në vendet fqinje si Polonia. Urdhëri iu dha gjatë natës drejtpërdrejt kreut të Pentagonit, Pete Hegseth.
Sa për pjesën tjetër, Trump ka një takim me Amerikën këtë mbrëmje, kur, përpara Kongresit të mbledhur në seancë të përbashkët, do të mbajë një fjalim për Ukrainën. I pyetur nga gazetarët nëse marrëveshja mbi mineralet është ende e vlefshme pas përplasjes me Zelenskyn në Zyrën Ovale, Presidenti u përgjigj: “Mendoj se po, është një marrëveshje e mirë.” Por ai e la të hapur diskutimin për në Capitol Hill, ku do të flasë në orën 21 lokale.
Pasojat e asaj që ndodhi të premten janë të dukshme. Dje, lideri ukrainas ripërsëriti pozicionin e tij, duke kërkuar garanci sigurie dhe duke folur për një diplomaci që duhet të bëhet “me të vërtetë e rëndësishme për të përfunduar sa më shpejt konfliktin”, duke theksuar shpresën që të vazhdojë “mbështetja amerikane”.
Por ajo që ndezi më shumë zemërimin e SHBA-së ishte një tjetër frazë, e transmetuar nga Associated Press, ku Zelensky tha se e sheh fundin e luftës “shumë, shumë larg” dhe përsëriti se çdo marrëveshje duhet të jetë “e ndershme”, “e drejtë” dhe e qëndrueshme “me garanci sigurie shumë specifike”.
Sot, Ukraina “nuk po flet” për asnjë lëshim, sqaroi Zelensky, duke thënë se kjo do të ishte e gabuar, duke shtuar gjithashtu se Kievi “nuk do t’i njohë kurrë territoret e pushtuara nga Rusia si territor rus. Për ne, këto do të jenë pushtime të përkohshme”.
Trumpi nuk e ka pëlqyer deklaratën për “kohëzgjatjen e konfliktit” dhe e ka përdorur këtë si një argument për të forcuar idenë e tij. Para së gjithash, përmes Truth, e ka cilësuar këtë deklaratë si “më të keqen” që mund të bëhej dhe ka sulmuar: “Nuk do ta durojmë këtë për shumë gjatë.” Një parathënie për atë që konsiderohet si një tjetër ftesë për Zelenskyn për t’u tërhequr nëse nuk është në gjendje ta çojë marrëveshjen deri në fund.
“Rusia dëshiron një marrëveshje, ukrainasit duan një marrëveshje, por nëse nuk e duan ta bëjnë tani, nuk do të zgjasë shumë,” ishte paralajmërimi i presidentit amerikan.
Një pjesë të fjalës së tij ia kushtoi edhe Europës, duke vlerësuar përpjekjet për të rritur angazhimin në frontin ukrainas, por gjithashtu duke kujtuar se edhe evropianët “kanë thënë se nuk mund të bëjnë më shumë pa SHBA-në”.
Ai përmendi më pas telefonatat që ka pasur gjatë 48 orëve të fundit me “katër-pesë presidentë dhe kryeministra evropianë që më kanë thënë se Amerika është e nevojshme”. Ndër ta, Giorgia Meloni, me të cilën ka biseduar të shtunën, ndërsa presidenti ndodhej në Mar-a-Lago.
Fakti që Uashingtoni shpreson për një angazhim më të madh të Europës nuk është diçka e re. Këshilltari për Sigurinë Kombëtare, Waltz, e përsëriti këtë dje në Fox News dhe gjatë një takimi me një grup gazetarësh. Çështja kryesore për SHBA-në është ndalja e luftimeve – “të rinjtë vazhdojnë të vdesin,” përsëriti Trump – dhe nisja e negociatave për të dhënë një formë sigurie të qëndrueshme për Ukrainën, si ushtarake ashtu edhe ekonomike.
Zelensky, thonë tani hapur funksionarë të Shtëpisë së Bardhë, “nuk e ka kuptuar çfarë po ndodh”. Kërkesa për të rihapur dialogun tani kalon nga Uashingtoni, dhe Waltz ka përsëritur se nevojitet kërkim falje nga ukrainasit.
Shtetet e Bashkuara kanë hapur, megjithatë, një kapitull të ri diskutimesh me Moskën. Bëhet fjalë për sanksionet. Trump ka dhënë mandat Departamentit të Thesarit dhe atij të Shtetit që të hartojnë një listë masash për t’u diskutuar me të dërguarit e Moskës në bisedimet e ardhshme.
Ato do të ndodhin brenda disa ditësh dhe janë pjesë e rifillimit të marrëdhënieve diplomatike dhe ekonomike. Ideja është të hiqen disa shtete dhe disa individë nga masat ndëshkuese. / bota.al
