Skenari
Ekspertët kanë qenë të pamëshirshëm në vlerësimin e tyre. Me ndalimin e furnizimeve me armë nga Donald Trump, Ukraina mund të ketë vetëm edhe gjashtë muaj luftë në dispozicion. Deri në fund të verës, ushtria ukrainase do të jetë në gjendje të vazhdojë luftimet me ritmin aktual. Pas kësaj, nëse vendimi konfirmohet dhe furnizimi nga Uashingtoni nuk rifillon ose nëse nuk gjenden burime alternative, forcat e Kievit mund të ndalen.
Presidenti Zelensky është i vetëdijshëm për këtë skenar të zymtë dhe po përpiqet të gjejë alternativa. Prioriteti i tij kryesor është gjetja e furnizuesve të rinj të armëve për të zgjatur sa më shumë rezistencën. Në të njëjtën kohë, qeveria ukrainase po kërkon furnizues që mund të zëvendësojnë menjëherë ndihmën amerikane.
Problemi kryesor
Vëmendja është kthyer menjëherë tek Bashkimi Evropian, Norvegjia dhe Mbretëria e Bashkuar. Por sfida kryesore është se asnjë prej këtyre aktorëve nuk mund të sigurojë furnizime në të njëjtin nivel si Uashingtoni. Sipas një raporti të “Wall Street Journal”, në vitin 2024, Brukseli, Londra dhe Oslo i dhanë Ukrainës 25 miliardë dollarë ndihmë ushtarake, pothuajse në të njëjtin nivel me SHBA-të.
Por kjo ndihmë nuk mund ta zëvendësojë tërësisht ndihmën amerikane. Edhe pse Komisioni Evropian po përpiqet të rrisë prodhimin e municioneve, jo çdo armë amerikane mund të zëvendësohet lehtësisht me alternativa të prodhuara në Evropë. Sistemet si Patriot, Himars dhe tanket Abrams janë pothuajse të pazëvendësueshme për momentin.
Forcat ukrainase duhet të kursejnë municionin
Inteligjenca perëndimore ka paralajmëruar se Moska mund të nisë një ofensivë të fuqishme nëse shikon se ndihma perëndimore po zbehet.
Në këtë kontekst, Kievi është duke rritur kapacitetin e tij të prodhimit ushtarak, duke synuar të prodhojë një milion predha artilerie në vit. Megjithatë, kjo nuk është një zgjidhje e shpejtë dhe mungesa e armëve mbetet një rrezik serioz.
Plani i ri i Evropës
Disa vende evropiane po përshpejtojnë miratimin e një pakete të re ndihmash për Ukrainën. Dje u diskutua një projektvendim i Këshillit Evropian, duke propozuar një ndihmë financiare të konsiderueshme për Kievin.
Sipas Politico, shërbimet e inteligjencës perëndimore besojnë se Rusia mund të përshpejtojë sulmet për të përfituar nga ky moment dobësie. Nëse furnizimet me armë zvogëlohen më tej, forcat mbrojtëse ukrainase mund të reduktohen ndjeshëm./bota.al
