Në Dorset në Britani policia ka zbuluar fabrikën më të madhe të kanabisit ndonjëherë. Këtu ishin mbjellë më shumë se 2000 bimë të kanabisit, në një zonë industriale.
Oficerët e policisë janë alarmuar kur kanë hasur mbjellje kanabisi në 14 prona në Uellsin jugor, dhe kujdestar ishte shqiptar Rentil Zyberi.
Në gjykatë u tha se policia po zhvillonte një kontroll rutinë, dhe si rezultat i operacionit u kap kanabis me vlerë 2 milionë paund. Oficerët e policisë e shkatërruan pronën e mbjellë me kanabis dhe prangosën kujdestarin Zyberi, në korrik të vitit të kaluar.
Të Premten në Cardiff Crown Court Zyberi dhe “bankieri” i bandës Arben Marku u dënuan të dy për përfshirjen e tyre në këtë aktivitet kriminal. Prokurori Eugene Egan e përshkroi Zyberin, nga Newport Road, Cardiff, si “kujdestarin” e pronave, shkruajnë mediat e huaja.
Avokatët e të dënuarve thanë se ishin penduar, por e kishin bërë këtë punë për të siguruar para dhe për t’ja dërguar familjarëve në Shqipëri.
Ndërkohë në Purbeck u zbulua fabrika më e madhe e kanabisit e kapur ndonjëherë nga policia, me më shumë se 2000 rrënjë bimë. Rendimenti në fabrikën industriale kishte një vlerë nga 2.3 milion deri në 7.1 milion £.
Gjatë një seance dëgjimore në Gjykatën e Bournemouth më 29 janar u tha se fabrika ishte “e organizuar dhe profesionale“, me aftësinë për të “prodhuar sasi industriale për përdorim komercial“.
Leonard Bruki dhe Arber Aliaj ishin vendosur brenda ndërtesës dhe të dy u arrestuan sepse ishin të shqetësuar për prodhimin e kanabisit. Bruci, 27 vjeç dhe Aliaj, 23 vjeç, të dy shtetas shqiptarë u dënuan me dy vjet e tre muaj burg.
Pasi kanë kaluar 13 muaj të paraburgosur, të dy të pandehurit tani pritet të lirohen brenda disa javësh, duke shlyer më shumë se gjysmën e dënimit. Ata do të dëbohen pasi të dalin nga burgu.
