Në kuadër të takimeve vjetore të Fondit Monetar Ndërkombëtar dhe Bankës Botërore në Uashington, guvernatori i Bankës Qendrore të Kosovës Ahmet Ismaili u prit në takim nga zëvendësndihmës sekretari i Thesarit amerikan, Luyen Tran si pjesë e partneritetit ndërmjet BQK-së dhe Departamentit të Thesarit Amerikan.
Guvernatori Ismaili shprehu mirënjohjen e thellë për mbështetjen e palëkundur të Thesarit amerikan, veçanërisht me rastin e 25-vjetorit të themelimit të BQK-së. Ai vlerësoi rolin e rëndësishëm të Zyrës për Asistencë Teknike (OTA) të Departamentit të Thesarit në ndërtimin e një banke qendrore të fortë dhe të qëndrueshme për Kosovën, duke theksuar përpjekjet e vazhdueshme për të forcuar funksionet dhe kapacitetet e BQK-së.
“Përkushtimi i vazhdueshëm i Departamentit të Thesarit të SHBA-së ka qenë thelbësor për përparimin e misionit dhe kapacitetit tonë. Mbështetja juaj ka luajtur një rol kyç në fuqizimin e sistemit financiar të Kosovës, duke siguruar stabilitet, qëndrueshmëri dhe përputhshmëri me praktikat më të mira ndërkombëtare", tha ai.
Ismaili theksoi se ky bashkëpunim ka qenë vendimtar në kornizën qeverisëse, rritjen e mbikëqyrjes rregullatore dhe forcimin e qëndrueshmërisë së sektorit financiar.
Ai gjithashtu ritheksoi përkushtimin e BQK-së për të ruajtur partneritetin e ngushtë me Thesarin e SHBA-së, ndërsa vazhdon të ndjekin iniciativa që do të sigurojnë rritje ekonomike dhe stabilitet financiar në Kosovë.
Ky takim shërbeu si një mundësi për të thelluar më tej bashkëpunimin dhe për të forcuar lidhjet ndërmjet BQK-së dhe Thesarit të SHBA.
Banka Qendrore e Kosovës mbetet e përkushtuar për të nxitur një sektor financiar të fortë, gjithëpërfshirës dhe të qëndrueshëm, me një vizion në përputhje me standardet dhe praktikat më të mira ndërkombëtare.
