Duket se nuk ka një qasje të vetme kur vjen puna te shëndeti dhe zgjedhja e ekuilibrave për dobësim apo ruajtjen e peshës aktuale. Dietat, palestrat apo IF (intermittent fasting) janë vetëm disa prej këtyre zgjedhjeve. Por, shkenca dhe studimet e fundit japin një orientim më të mirë për dietat dhe pasojat që ato sjellin në shëndetin e atyre që i ndjekin.
Agjërimi me ndërprerje është praktikë e ngrënies së kufizuar dhe vjen me disa rregulla, të cilat mund të jenë nga një agjërim në mëngjes ose zgjedhjen e konsumit të ushqimit vetëm gjatë disa orëve të caktuara të ditës.
Një studim i ditëve të fundit, në të cilin u përfshinë rreth 20 mijë amerikanë që u mbajtën nën vëzhgim për një periudhë kohore mes 7 deri në 18 vjet gjeti një statistikë befasuese në lidhje me njerëzit që e praktikojnë rregullin e të ngrënit 16:8, pra agjërim për 16 orë çdo ditë duke e kufizuar ngrënien në një orar të caktuar. Ata kishin më shumë mundësi që të vdisnin nga sëmundjet kardiovaskulare se sa njerëzit që i shpërndanin vaktet nga 12 deri në 16 orë në ditë. Madje, ata ishin të ekspozuar gati 91% ndaj vdekshmërisë nga sëmundjet e zemrës.
Studimi zbuloi se ata që i shpërndanin vaktet në më shumë se 16 orë të ditës kishin rrezik më të ulët të vdekjes nga zemra, kanceri apo sëmundje të tjera.
“Ky studim sugjeron se ngrënia e kufizuar në kohë mund të ketë përfitime afatshkurtra, por efekte negative afatgjata,” thotë mjeku Christopher D. Gardner duke shtuar se detaje të tjera si cilësia e ushqimeve apo sasia janë të tjerë elementë që kanë ndikim në çështjen e dieta dhe shëndetit në përgjithësi.
Metodat e Intermittent fasting:
- Metoda 16/8: konsiston në konsumimin e ushqimit përgjatë 8 orëve dhe ndërprerjen e tij për 16 orët në vijim. Pra, hani mjaftushëm nga ora 13:00 – 21:00 pastaj agjëroni për 16 orë.
- Metoda “ha-ndalo-ha”: përfshin agjërimin për 24 orë; hani për shembull në drekë dhe më pas hani sërish drekën e ditës tjetër.
- Metoda 5:2: bazuar në këtë metodë, konsumoni 500-600 kaloni gjatë dy ditëve të njëpasnjëshme dhe më pas hani normalisht 5 ditët e tjera të javës.
Metoda 16/8 është më e përhapura, pasi njerëzit duket se e kanë më të lehtë dhe më të menaxhueshme.
