Në Durrës po vazhdon hedhja e shortit publik të radhës, këtë herë për ndarjen e 154 apartamenteve 1+1, të ndërtuara në zonën e re zhvillimore në Spitallë.
Javën e kaluar ishin 391 familje përfituese të programit të rindërtimit që mësuan vendndodhjen e banesave të tyre të reja 2+1, ndërsa sot po shpërndahen apartamentet 1+1.
Procedurat po vijojnë normalisht. Familjet përfituese janë nga të gjitha njësitë administrative të bashkisë Durrës, të cilët mbetën pashtëpi nga tërmeti i 26 nëntorit 2019.
Sipas nënkryetarit të bashkisë që drejton procesin e shortit, pritet që brenda një kohë të shkurtër, 545 familjet përfituese të apartamenteve 2+1 dhe 1+1 të ndërtuara në Spitallë të sistemohen në shtëpitë e reja, menjëherë pasi Bashkisë t’i dorëzohen çelësat nga njësia zbatuese.
Banorët do të njoftohen përmes njësive administrative për tërheqjen e tyre.
545 familje kanë përfituar nga dy shortet e hedhura ditët e fundit, ndërsa më pas pritet të zhvillohet dhe shorti për apartamentet 3+1.
Ndërkaq njësia zbatuese e projektit vazhdon punimet në Spitallë për sistemimin e infrastrukturës përreth 85 pallateve dhe të vetë objekteve të banimit. Paraprakisht deklarohet se gjithçka do të jetë gati në fund të shtatorit.
