Javët në vijim do të jenë edhe më të vështira paralajmëroi kancelarja Angela Merkel ndërsa në Gjermani raportohet për 40 mijë viktima nga COVID-19 që nga nisja e pandemisë. Virusi ende vijon të dominojë në Evropë. E ndonëse Gjermania ia doli të menaxhojë valën e parë, tanimë duket se është goditur më fort.
“Ky vit nis me një miks ndjenjash. Është shpresa që ne ia akordojmë vitit të ri, një shpresë se hap pas hapi coronavirus do të jetë nën kontroll dhe ne do të rifitojmë lirinë. Por nga ana tjetër është rreziku nga vala e dytë me të cilën vendi po përballet sikundër shumë shtete evropiane. Muajt në vijim të dimrit me shumë mundësi do të jenë faza më e vështirë e pandemisë,” – u shpreh Merkel në një deklaratë për shtyp.
Edhe Suedia e cila për një kohë të gjatë i rezistoi masave kufizuese duke u bazuar vetëm tek rekomandimet e ekspertëve po përballet me një valë të dytë. Tanimë ajo ka miratuar një ligj që i lejon qeverisë të reduktojë numrin e njerëzve në dyqane,biznese dhe vende publike. Madje mund të vendosë edhe gjoba.
Situata nuk është me e qetë në Francë, ku 25 rajone janë në shtetrrethim nga ora 18 në orën 6 të mëngjesit e të tjera mund të jenë në të njëjtën situatë pasi në vend raportohet për 16 mijë raste të reja me covid. Nga ana tjetër është edhe nxitimi për të bllokuar përhapjen e lllojit të ri të virusit shfaqur në Britani. Disa raste janë raportuar nga Marseille.
“Gjithçka ndodhi në një festë familjare. Një person erdhi nga Anglia iu bashkua familjes dhe i infektoi,” – u shpreh Michèle Rubirola, zyrtare e shëndetësisë në Marsejë.
Ndërsa në Ceku po kundërshtohen fort masat kufizuese. Me mijëra qytetarë u mblodhën në sheshin historik në Pragë duke protestuar e duke brohoritur “Të hapim Çekinë”
“Ata po kufizojnë kontaktet mes njerëzve, lidhjet sociale. Ata po përpiqen të na largojnë nga jeta jonë dhe të na thonë çfarë duhet e nuk duhet të bëjmë. Nuk mund ta lejojmë një gjë të tillë,” – tha Stanislav Holman, protestues.
Spitalet në Çeki janë duke u përballur me një fluks të madh pacientësh me COVID pasi vendi raporton një nga nivelet më të larta të infeksionit në botë.
