Në qytetin mesjetar turk, Mardin, një grua thërret ekipin shëndetësor që po ecën rrugës së gurtë.
Medine Ereli ia sqaron mjekut dhe infermieres se bashkëshorti 59-vjeçar po refuzon të vaksinohet. Për këtë shkak kërkoi ndihmën e tyre.
Medine i dërgon mjekët tek Enver Ereli, që pastron rrugët e qytetit.
Mjekët e maskuar janë pjesë e ekipeve mobile, që kanë për detyrë të bindin njerëzit që të vaksinohen, sidomos ata që refuzojnë.
Ekipi shkon derë më derë, i pajisur me ftohës dhe doza të vaksinave.
Që prej muajit prill, ekipe të tilla kanë operuar në provincat e largëta të Turqisë, për shkak se njerëzit refuzonin vaksinën.
Ndërkaq Enver Ereli thotë se u bind menjëherë, kur infermierja i tha se vaksina ka efekt të madh te më të moshuarit.
“Frikësohesha se do të sëmuresha dhe paralizohesha. Por ekipi më foli për përfitimet nga vaksina dhe u besova”, thotë Ereli.
Këto ekipe mjekësore u krijuan me kërkesë të Qeverisë pasi shifrat tregonin se të moshuarit po refuzonin të merrnin vaksinën, sidomos në rajonet e largëta.
Një 79-vjeçare thotë se fqinjët e bindën që të mos vaksinohej.
“Njerëzit më thoshin që të mos vaksinohesha, por djali me ekipin mjekësor insistuan për vaksinim sepse do të më ndihmonte. U besova dhe mora dozën”, shprehet Hadra Irmak, banore e Mardinit.
Në zyrat lokale, punëtorët e qeverisë me telefonata tentojnë t’ua ndërrojnë mendjen njerëzve që refuzojnë vaksinat.
Në qytetin mesjetar të Mardinit deri më tani janë vaksinuar 8 mijë banorë. Për këtë numër të lartë të të vaksinuarve janë lavdëruar ekipet bindëse për vaksinim.
Ministria e Shëndetësisë në Turqi ka bërë të ditur se 84 për qind e popullsisë mbi moshën 65-vjeçare janë vaksinuar.
Qeveria synon që të arrihet 90 për qind e të vaksinuarve.
Deri më tani, Turqia ka vaksinuar plotësisht rreth 14 për qind e 83 milionë banorëve të saj, ndërsa 16 milionë banorë janë vaksinuar me një dozë.
