Aktivisti bjellorus Stsiapan Latypau goditi veten në qafë me një stilolaps gjatë një seance gjyqësore të martën në Minsk dhe u dërgua me urgjencë në spital pa ndjenja, ka thënë një grup i të drejtave.
Sipas qendrës së të drejtave të njeriut Viasna në Bjellorusi, 41-vjeçari u përpoq të vetëvritej për të protestuar kundër shtypjes politike, pas presionit në paraburgim dhe kërcënimeve për të ndjekur penalisht të afërmit e tij. Videot që qarkullojnë në mediat sociale treguan se Latypau po merrej nga ndërtesa e gjykatës dhe ishte futur në një ambulance. Ai u shtrua në spital dhe u vu në një gjendje kome të simuluar, tha Viasna.
Para se të qëllonte veten në qafë me stilolaps, zoti Latypau hipi mbi stolin që ndodhej në kafazin e të pandehurit dhe deklaroi se hetuesit i kishin thënë “nëse nuk them që jam fajtor, do të hapin hetime penale kundër familjarëve e miqve të mi”. Raporton Euronews.
Zoti Latypau është nën arrest që në shtator 2020 nën akuza të ndryshme, përfshirë akuzën se ka inskenuar veprime që shkelin rendin publik gjatë protestave të verës së kaluar kundër Presidentit Lukashenko. Protestat shpërthyen pasi udhëheqësi bjellorus deklaroi se kishte fituar zgjedhjet për të gjashtën herë.
Nëse shpallet fajtor, zoti Latypau mund të dënohet me deri në 10 vjet burgim.
