Papa Françesku vijon rikuperimin e tij shëndetësor pas ndërhyrjes kirurgjike të së dielës së kaluar.
Sipas njoftimit të fundit të Vatikanit, ati i shenjtë po ushqehet, po ecën dhe ka rifilluar punën, natyrisht i ndihmuar nga kujdestarët e tij.
Papa 84-vjeçar iu nënshtrua më 4 korrik një ndërhyrjeje kirurgjike që zgjati tre orë, për të hequr një pjesë të zorrës që ishte ngushtuar shumë.
Kjo është hera e parë që Ati i Shenjtë shtrohet në spital që nga zgjedhja në vitin 2013.
Në njoftimin e tij, Vatikani ka nënvizuar se Papa do të mbajë të dielën e 11 korrikut meshën tradicionale dhe mesazhin e tij nga kati i dhjetë i spitalit “Gemelli”, ku ndodhet i shtruar.
