Zëvendës-kryetari i Partisë së Lirisë dhe Drejtësisë Borko Stefanoviç, porositi në një takim në Shabac se “populli do të ndërrojë regjimin e Vuçiqit në zgjedhjet e para të lira, në të cilat do të mund të votohet lirshëm në bazë të informatave të vërteta”, transmeton “Bota Sot”.
“Në ditën kur Vuçiq premton kushte më të mira në zgjedhje ashtu që publikon se ato do të mbahen me 3 prill, gjë që e di e gjithë Serbia, në Shabac njerëzit mbeten pa punë në entet parashkollore. Këtu duan të sjellin njerëz që do të shantazhohen dhe do iu kërkojnë votë për regjimin”, tha Stefanoviç në konferencë me gazetarë.
Sipas tij, kur Vuçiq fton në unitet, zëdhënësit e tij si Bakarec dhe mediat që redaktohen e kontrollohen nga kabineti i presidentit vazhdojnë të fyejnë Gjiasin, Tepiç dhe secilin që nuk do të heshtë.
“Tash e 9 vite ata flasin për “kohët e arta” e njerëzit në secilin hap revoltohen për ajrin që thithin, ujin që fusin në gypa dhe tokën që na e rrëmbejnë dhe ua japin investuesve kinez të prodhojnë goma dhe krahas kësaj të maltretojnë njerëzit tanë”, tha Stefanoviç.
Stefanoviç tha se në Serbi policët e ndershëm ndiqen nga mafiozët, sepse nuk dihet kush i mbron kriminelët në shtet, e qytetarët frikësohen edhe të parëve edhe të dytëve.
“Të gjithë këtë Serbia e di dhe e sheh, prandaj ky popull regjimin e Vuçiqit do ta ndërrojë në zgjedhjet e para në të cilat do të mund të votohet lirshëm dhe në bazë të informatave reale. Këtë e tregojnë hulumtimet, kjo po ndjehet edhe sot këtu në Shabac kur bisedojmë me njerëz”, përfundoi Stefanoviç, thuhet në kumtesën e SSP.
