Autoritetet spanjolle janë në kërkim të disa emigrantëve të zhdukur pasi dy varka të vogla u përmbysën në Detin Mesdhe.
Të paktën tre persona vdiqën, ndërsa 10 të tjerë mbeten të zhdukur në brigjet jugore spanjolle pranë Almerias.
Gjashtëmbëdhjetë migrantë u shpëtuan në juglindje të Kepit të Gatës pasi një anije që kalonte dëgjoi britma nga uji gjatë natës. Sipas të mbijetuarve, në bordin e dy varkave të vogla ndodheshin gjithsej 29 emigrantë.
Vitin e kaluar më shumë se 39 mijë njerëz u përpoqën të arrinin ilegalisht në Spanjë, sipas të dhënave të Ministrisë së Brendshme. Kjo përfshin më shumë se 20 mijë njerëz që përdorën varka për të kaluar Oqeanin Atlantik në Ishujt Kanarie të Spanjës, shkruan Euronews.
Ndërkohë, të paktën 1 mijë e 255 vdiqën, numri më i lartë që kur Organizata Ndërkombëtare e Kombeve të Bashkuara për Migracionin (IOM) filloi të përpilonte të dhëna në vitin 2014.
Sidoqoftë, një raport nga OJQ-ja spanjolle Caminando Fronteras vlerëson se numri i viktimave në vitin 2021 ishte deri në 4 mijë e 404. OJQ-ja shtoi se shifra është më shumë se dyfishi i numrit të migrantëve që vdiqën duke u përpjekur të kalonin nga Afrika në Spanjë në vitin 2020.
