Policia në Gjermani të enjten kreu kontrolle në më shumë se njëqind apartamente dhe zyra mjekësh me dyshimin për falsifikim të kartelave të COVID-19.
“Policia sekuestroi disa leje për COVID dhe telefona mobilë dhe u morën mostra gjaku nga shumë të dyshuar”, tha policia.
Siç u theksua, veprimi i policisë nuk ka hasur në rezistencë nga të dyshuarit.
Në qendër të hetimit është një mjek në jug të Gjermanisë, i cili dyshohet se ka lëshuar kartela false për COVID për persona nga e gjithë Gjermania. Në disa pacientë që dëshironin të vaksinoheshin kundër koronavirusit, mjeku simuloi vaksinimin dhe më pas lëshoi leje.
Personat të cilët me vetëdije kërkuan nga mjekët e tyre vaksinimin pa e marrë vaksinën, po hetohen nën dyshimin se kanë ndihmuar dhe nxitur veprën penale të falsifikimit të dokumenteve zyrtare dhe shkelje të ligjit për mbrojtjen nga infeksioni.
Në disa shtete federale u kryen kontrolle dhe qytetarët u goditën nga fakti se makina me targa nga e gjithë Gjermania po mblidheshin para zyrës së mjekut në provincën bavareze.
Aktualisht në Gjermani ka një debat për futjen e një detyrimi të përgjithshëm për të vaksinuar kundër koronavirusit, i cili përveç koalicionit qeverisës Socialdemokrate-Gjelbër-Liberal, mbështetet edhe nga opozita kristiandemokrate.
Sipas një sondazhi të kryer nga “Spiegel” në fillim të kësaj jave, 64 për qind e qytetarëve gjermanë të anketuar mbështesin futjen e një detyrimi të përgjithshëm vaksinimi.
