(E plotësuar 13:36) - Britania e Madhe do të rrisë mbështetjen ushtarake për Ukrainën
Kryeministri i Mbretërisë së Bashkuar Boris Johnson u tha deputetëve se qeveria e tij do të rrisë mbështetjen ushtarake për forcat ukrainase, shkruan BBC, përcjell Bota sot.
Paketa do të përfshijë "armë mbrojtëse" dhe ndihmë "jo vdekjeprurëse".
Starmer ka thënë se Rusia ka pushtuar dhe është "koha për të vepruar" dhe përsëri i ka kërkuar kryeministrit të prezantojë masa më të ashpra "në ditët në vijim".
Boris Johnson përgjigjet se qeveria do të marrë masa që do të ndalojnë të gjitha bankat dhe individët rusë të "ngritin para në tregjet e Londrës".
Ukraina do të shpallë gjendjen e jashtëzakonshme
Në Ukrainë do të shpallet gjendja e jashtëzakonshme, ka vendosur Këshilli i Sigurisë Kombëtare të vendit, shkruan BBC, përcjell Bota sot.
Pas një takimi të këshillit, zyrtari i lartë i sigurisë Oleksiy Danilov tha se gjendja e jashtëzakonshme do të vendoset në të gjitha rajonet përveç Donetsk dhe Luhansk, ku forcat ukrainase janë tashmë në luftë me separatistët e mbështetur nga Rusia.
Ai tha se fillimisht do të zgjasë 30 ditë.
Megjithatë, masa duhet të miratohet nga parlamenti ukrainas.
Ukraina, shtetasve të vet: Largohuni nga Rusia menjëherë!
Ukraina u ka thënë qytetarëve të vet që të e mos vizitojnë Rusinë, derisa çdo ukrainas që ndodhet atje u paralajmëruan që të largohen menjëherë.
“Ministria e Jashtme rekomandon që qytetarët e Ukrainës të mos udhëtojnë në Federatën Ruse dhe ata që ndodhen në këtë vend të largohen menjëherë nga territori i saj”, thuhet në një deklaratë, raporton BBC.
Ky veprim mund të prekë disa milionë shtetas ukrainas, të cilët thuhet se jetojnë në Rusi.
Situata vazhdon të mbetet e tensionuar.
Gjendja me Rusinë, Ukraina merr vendim për ushtarët rezervë
Ukraina ka filluar të rekrutojë në ushtri anëtarë të forcave të saj të mbrojtjes rezervë të moshës 18-60 vjeç, pas një dekreti të Presidentit Volodymyr Zelensky, shkruan Reuters, përcjell Bota sot.
Ushtria tha se periudha maksimale e shërbimit do të jetë një vit dhe rekrutët me aftësi, si mekanikë, do të dërgohen në njësitë e specializuara.
Zyrtarët shtuan se njerëzit që injorojnë thirrjen mund të përballen me "përgjegjësi penale".
Ekspertët vlerësojnë se rreth 900,000 njerëz shërbejnë në forcat e mbrojtjes rezervë të Ukrainës.
***
Tridhjetë e gjashtë orë pasi Vladimir Putin urdhëroi "paqeruajtësit" rusë në dy zonat separatiste pro-ruse të Donetsk dhe Luhansk, nuk ka ende asnjë provë të qartë se ata kanë mbërritur, shkruan BBC, përcjell Bota sot.
Forcat ruse kanë qenë brenda dhe jashtë të dyja zonave gjatë tetë viteve të luftës, por nuk ka pasur raporte të qarta për ndonjë ndryshim të madh në terren që nga e hëna.
Rritja e mprehtë e granatimeve përgjatë "vijës së kontaktit" që ndan territorin e kontrolluar nga separatistët nga territori i kontrolluar nga qeveria ukrainase vazhdon, por përndryshe asgjë nuk ka ndryshuar.
Pra, a ka filluar tashmë një luftë e re, më e madhe?
Shenjat nuk janë të mira. Rrugët diplomatike duket se po mbyllen. Retorika nga Moska është krejtësisht armiqësore. Imazhet satelitore tregojnë forcat ruse që zvarriten më pranë kufijve të këtij vendi. Qeveria e Ukrainës po përgatit rezervistë.
Por a ka marrë ende Putini një vendim për të nisur atë që mund të jetë lufta më e keqe në Evropë që nga viti 1945?
Askush nuk e di.
