Raundi i dytë i bisedimeve ndërmjet delegacioneve nga Ukraina dhe Rusia për situatën në Ukrainë është planifikuar të mërkurën, raportojnë mediat shtetërore ruse.
Agjencia ruse e lajmeve TASS të martën citoi një burim nga pala ruse duke thënë se e mërkura, 2 mars, është data për të cilën të dyja palët kishin rënë dakord fillimisht, shkruan CNN.
Agjencia shtetërore ruse e lajmeve RIA shtoi se rundi i dytë i bisedimeve do të zhvillohet pranë kufirit Bjellorusi-Poloni. Sipas politikanit bjellorus, Yuri Voskresensky, anëtarët e parë të delegacioneve pritet të mbërrijnë sot në mbrëmje në kryeqytetin e Bjellorusisë, Minsk.
Raundi i parë i bisedimeve të hënën zgjati për pesë orë dhe përfundoi pa ndonjë përparim.
Zyrtarët ukrainas nuk kanë konfirmuar ende se e mërkura është data për raundin e dytë të bisedimeve.
