Në qytetin ukrainas, Mariupol, 1,170 civilë janë vrarë që prej se ka nisur pushtimi rus më 24 shkurt, ka thënë zëvendëskryetari i këtij qyteti.
Po ashtu ka pasur raportime se autoritetet në këtë qytet në jug të Ukrainës, që është cak i sulmeve ajrore ruse për ditë me radhë, kanë hapur varr masiv, pasi morgjet janë të mbingarkuara.
“Fatkeqësisht, ka shumë trupa”, ka thënë për Financial Times zyrtari lokal, Vitaly Falkovsky. “Ka qenë një masë e nevojshme sepse nuk mund t’i varrosim njerëzit normalisht. Morgjet janë të stërmbushura”, ka thënë ai.
Associated Press ka raportuar se mbi 60 persona janë varrosur në varrin masiv në dy ditët e fundit. Në këtë numër përfshihen civilët dhe ushtarët e vrarë nga granatimet, por edhe banorët që kanë vdekur nga sëmundje të ndryshme.
