Bombardimet e rënda ruse kanë detyruar banorët e disa qyteteve të Ukrainës të varrosin civilët e vdekur në varre masive të improvizuara - dhe shumë viktima nuk janë identifikuar, raporton BBC.
"Ne nuk mund t'i varrosim [viktimat] në varre private, pasi ato janë jashtë qytetit dhe perimetri kontrollohet nga trupat ruse," tha nënkryetari i bashkisë së Mariupolit, Serhiy Orlov për BBC.
Për gati dy javë, Mariupol, një qytet port strategjik, është goditur çdo ditë nga raketat dhe predha ruse. Mijëra banorë, kanë mbetur pa ushqim dhe ujë, derisa janë fshehur nëpër bodrume.
Në Bucha, një periferi e Kievit e kapur nga rusët, 67 trupa u varrosën në një llogore, tha një deputet lokal për BBC. Një mjek postoi video të varrimit në Facebook.
Varrosjet pa ceremoni janë tronditëse për ukrainasit që presin rite të krishtera dhe që kanë kujtime të hidhura të masakrave të Luftës së Dytë Botërore.
