LIVE: Rusia nuk ndalon sulmet ndaj civilëve/Njerëzit po nxirren të gjallë nga teatri, Zelensky thirrje Gjermanisë

E plotësuar (16:04) -Të paktën 21 të vrarë pas sulmeve ruse afër Harkivit

Të paktën 21 persona u vranë dhe 25 të tjerë u plagosën, kur forcat ruse bombarduan të enjten në mëngjes një qytet në Ukrainën lindore, njoftuan autoritetet ukrainase.

Sulmet goditën një shkollë dhe një qendër kulturore në Merefa, qytezë në rajonin Harkivit.

Sipas autoriteteve ukrainase, dhjetë prej të plagosurve janë në gjendje të rëndë.

Tension mes ministrive të jashtme të Shqipërisë dhe Rusisë

Ministria e Jashtme ka reaguar ndaj mohimit të sulmit ndaj konsullatës shqiptare në Kharkiv.

Pëmes një njoftimi zyrtar, ministria e konsideron “lajm të rrem” deklaratën e Ministrisë së Jashtme të Rusisë se nuk kishin bombarduar konsullatën tonë në qytetin veri-lindor të Ukrainës.

“Shqipëria dënon përdorimin e lajmeve të rreme nga Rusia për të mohuar bombardimin e Konsullatës së Nderit të Shqipërisë në Kharkiv. Pamjet e shembjes flasin vetë. Ky shkatërrim i ambienteve si dhe i dokumenteve në arkiva është një shkelje flagrante e nenit 61, kreu III i Konventës së Vjenës për Marrëdhëniet Konsullore. Dezinformimi dhe lajmet e rreme për këtë sulm janë të papranueshme!”, shprehet ministria.

Më herët, rusët deklaruan se nuk kishin bombarduar konsullatën, madje mohuan edhe bombardimin e strukturave civile në Ukrainë.

“Ministria për Evropën dhe Punët e Jashtme e Shqipërisë dënoi sulmet që pretendohet se janë të kryera nga forcat ruse më 6 mars, si pasojë e të cilave u dëmtuan ambientet e Konsullatës së Nderit të Shqipërisë në Kharkov. Ne refuzojmë me vendosmëri akuza të tilla. Që nga fillimi i operacionit special në Ukrainë kemi deklaruar se Forcat e Armatosura të Rusisë nuk qëllojnë objektet e infrastrukturës civile, synojnë të përjashtojnë humbjen e jetëve në mesin e popullatës civile. Ne kërkojmë informimin e vërtetë të publikut“, u shpreh Maria Zakharova e Ministrisë së Jashtme të Rusisë.

Ukrainasi që humbi familjen nga sulmi rus flet për tragjedinë

Më 6 mars, Serhiy Perebyinis e humbi tërë familjen e tij – bashkëshortja dhe dy fëmijët e tij u vranë teksa po përpiqeshin të largoheshin nga periferia e Kievit.

Vdekja e tyre, si pasojë e goditjes nga një predhë ruse, u dokumentua nga gazetarët në vendin e ngjarjes, ndërsa pamjet e trupave të tyre të pajetë u shpërndanë dhe u shikuan në mbarë botën.

Perebyinis ka biseduar me Current Time, projekt i Radios Evropa e Lirë, për tragjedinë.

PARALAJMËRIM: Kjo video ka pamje shqetësuese.

Maqedonia e Veriut ndanë 120 milionë denarë për akomodimin e refugjatëve nga Ukrainë

Qeveria e Republikës së Maqedonisë së Veriut në mbledhjen e sotme të 30-të, e ngarkoi Ministrinë e Financave të sigurojë mjete financiare në vlerë prej 120 milionë denarë për organizimin dhe sigurimin e akomodimit hotelierik dhe shërbime shtesë për qytetarët e Ukrainës të cilët si refugjatë nga vendet e luftës do të arrinin në vendin tonë.

Këto mjete do t’i transferohen Shërbimit për Punë të Përgjithshme dhe të Përbashkëta, i cili ngarkohet me realizimin e këtyre aktiviteteve.

 53 civilë të vrarë në Chernihiv të mërkurën

Rreth 53 civilë thuhet se janë vrarë nga forcat ruse në qytetin verior të Ukrainës, Chernihiv që nga e mërkura, sipas guvernatorit të tij rajonal, Vyacheslav Chaus.

"Armiku vazhdon sulmet sistematike të artilerisë dhe ajrore në qendrën rajonale. Ata po shkatërrojnë infrastrukturën civile," raportoi ai në shërbimin e mesazheve Telegram.

"Ne po pësojmë humbje të mëdha. Pesëdhjetë e tre trupa të qytetarëve tanë u dorëzuan në morgjet e qytetit vetëm gjatë ditës së kaluar."

Chaus tha se autoritetet lokale po punonin për të rivendosur furnizimin me energji, ujë dhe gaz në pjesë të qytetit, pavarësisht granatimeve të vazhdueshme.

Guvernatori njoftoi gjithashtu një raund tjetër bisedimesh me trupat ruse për të organizuar një korridor humanitar për evakuimin e civilëve nga qyteti.

Rusia akuzohet për bombardimin e qendrës kulturore pranë Kharkiv

Kryetari i qytetit lindor të Merefës ka akuzuar trupat ruse se kanë bombarduar një zonë banimi në qytet, duke shkatërruar një shkollë, qendër kulturore dhe disa prona private, shkruan BBC transmeton "Bota sot". Veniamin Sitov tha për mediat lokale se sulmi ndodhi rreth orës 03:30 me orën lokale (01:30 GMT) dhe tha se nuk kishte viktima civile, por pretendoi se disa ushtarë ishin vrarë.

“Qendra e shtëpisë së kulturës është goditur, nuk ka mbetur asgjë prej saj”, tha Sitov. "Kishte njerëz në të. Falë Zotit nuk ka viktima në mesin e civilëve, ka në mesin e ushtarakëve. Civilët arritën t'i shpëtojnë shkatërrimit, ushtarakët u dërguan në spital. Zjarri në shkollë vazhdon të shuhet." ai shtoi. Merefa ndodhet jashtë qytetit të dytë të Ukrainës, Kharkiv, i cili është përballur pothuajse çdo ditë me bombardime nga forcat ruse që nga fillimi i konfliktit.

Zelensky u jep deputetëve gjermanë një kujtesë të dhimbshme të historisë

Presidenti i Ukrainës u duartrokit në këmbë për fjalimin e tij 10-minutësh në parlamentin gjerman, Bundestag, edhe pse ai dha disa fjalë të mprehta për audiencën e tij, shkruan BBC transmeton "Bota sot". Duke iu bërë thirrje deputetëve për të ndihmuar në ndalimin e luftës së Rusisë, ai u bazua në përvojën e vetë Gjermanisë, si nga Lufta e Dytë Botërore ashtu edhe nga rënia e komunizmit.

Ai foli për 108 fëmijët e vrarë që nga fillimi i pushtimit dhe tha se çdo vit politikanët kujtonin Holokaustin duke theksuar fjalët "kurrë më - dhe tani ne shohim se ato fjalë janë të pavlera". Ukraina i ishte drejtuar vazhdimisht Gjermanisë përpara luftës për të kufizuar lidhjet ekonomike me Rusinë, u kujtoi ai deputetëve, por në vend të kësaj Berlini e kishte ndihmuar Rusinë të ngrinte një mur "midis lirisë dhe skllavërisë".

"Rrëzoni këtë mur," tha ai. Pasi mbaroi, Bundestagu kaloi me shpejtësi në një debat rreth vaksinimeve të detyrueshme kundër Covid. 

Vazhdon bombardimi i qyteteve të mëdha në Ukrainë

Sulmi i Rusisë ndaj Ukrainës hyri sot në javën e tij të katërt. Forcat ushtarake ruse ndodhen të bllokuara kryesisht jashtë qyteteve të mëdha dhe vazhdojnë t’i bombardojnë ato nga distanca, duke shkaktuar një numër të madh viktimash.

Në qytetin jugor të rrethuar të Mariupolit, një sulm ajror nga forcat ushtarake ruse shkatërroi një teatër ku ishin strehuar qindra njerëz sipas zyrtarëve ukrainas. Numri i viktimave mbetet i paqartë pasi hyrja e teatrit është bllokuar nga mbeturinat.

Ministri i Jashtëm ukrainas Dmytro Kuleba e cilësoi sulmin një krim të tmerrshëm lufte. Disa imazhe satelitore të kompanisë amerikane të teknologjisë hapësinore ‘Maxar’ tregonin se në dy anë të godinës, para dhe pas saj, ishte shkruar me gërma të mëdha në rusisht fjala fëmijë, duke nënkuptuar se në godinë strehoheshin fëmijë.

Ministria ruse e Mbrojtjes mohoi të mërkurën të ketë bombarduar ndonjë objektiv në Mariupol.

Sipas Organizatës së Kombeve të Bashkuara më shumë se 3 milionë njerëz janë detyruar të largohen nga vendi për shkak të luftës. Numri i persona që kanë humbur jetën që nga fillimi i agresionit rus mbetet ende i paqartë, por autoritetet Ukrainase kanë thënë se kanë vdekur me mijëra civilë.

Truss: Prova të fuqishme se Putin është “kriminel lufte”

Sekretarja e Jashtme britanike, Liz Truss, ka thënë se “ekzistojnë prova të fuqishme” se presidenti rus, Vladimir Putin është “kriminel lufte”.

Presidenti amerikan, Joe Biden, e ka përshkruar liderin rus si të tillë, deklaratë që mund të përshkallëzojë marrëdhëniet diplomatike edhe më shumë.

Truss ka thënë për transmetuesin britanik, BBC se nuk mendon që është gabim deklarata e Bidenit.

“Ka prova shumë, shumë të fuqishme se ai është”, ka thënë Truss.

“Ka prova shumë, shumë të fuqishme se krimet e luftës janë kryer, dhe se Vladimir Putin është mbrapa tyre.

“Është detyrë e Gjykatës Ndërkombëtare Penale të vendosë se kush është e kush jo kriminel lufte dhe gjëja më e mirë që mund të bëjmë tani është që të dërgojmë prova, diçka që jemi duke bërë”.

Stoltenberg: Nuk mund ta marrim paqen dhe sigurinë si të garantuar

Sekretari i Përgjithshëm i NATO-s, Jens Stoltenberg u ka thënë gazetarëve të enjten, 17 mars se, “lufta e presidentit (rus, Vladimir) Putin ka shkundur paqen dhe ka shokuar botën”.

Ai i ka bërë këto deklarata në një konferencë për media me kancelarin gjerman, Olaf Scholz në Berlin.

Shefi i NATO-s ka lavdëruar forcat e Kievit dhe është zotuar se do të vazhdojë mbështetja për to, “në mënyrë që të shfrytëzojnë të drejtën për vetëmbrojtje, siç e parasheh Karta e Kombeve të Bashkuara”.

Ai ka falënderuar Gjermaninë për mbështetjen ushtarake dhe atë humanitare për Ukrainën dhe ka thënë se “NATO-ja ka përgjegjësi për të parandaluar këtë luftë nga përshkallëzimi i mëtejmë”, si dhe ka paralajmëruar vendet anëtare të bllokut të sigurisë se “ne nuk mund të marrim si të garantuar paqen dhe sigurinë”.

“Dje, ministrat e Mbrojtjes kanë nisur të shqyrtojnë se çfarë duhet të bëjmë për të rritur mbrojtjen tonë në periudhë afatgjatë. Kjo gjë do të kërkojë rritje të madhe të investimeve në mbrojtje”, ka thënë Stoltenberg.

Ndërkohë, Scholz ka thënë se Gjermania ka rritur fondet për forcat e armatosura të saj, për të siguruar se “NATO është e gatshme të përmbushë detyrat dhe mandatin që ka”.

Më shumë se tre milionë njerëz kanë ikur nga Ukraina, prej kur presidenti rus, Vladimir Putin, urdhëroi pushtimin e Ukrainës më 24 shkurt.

Putin ka urdhëruar “operacion special” për të çmilitarizuar Ukrainën.

Veprimi i Kremlinit ka nxitur zemërim dhe është dënuar në shumë vende të botës.

Shtetet e Bashkuara dhe aleatët janë përgjigjur me sanksione të ashpra kundër Moskës.

Lufta në Ukrainë mund të godasë rritjen globale, paralajmëron OECD

Sipas një raporti të ri, lufta në Ukrainë mund të ulë rritjen ekonomike globale me më shumë se një pikë përqindjeje në vitin e parë pas pushtimitm shkruan BBC përcjell |. Organizata për Zhvillim Ekonomik (OECD) thotë se ndikimi mund të shkaktojë gjithashtu një "recesion të thellë" në Rusi nëse mbahet. Megjithëse Rusia dhe Ukraina përbëjnë vetëm një përqindje të vogël të ekonomisë globale, ato janë prodhues të mëdhenj të lëndëve të para.

OECD paralajmëron gjithashtu se konflikti mund të rrisë çmimet globalisht me rreth 2.5%. Kostot tashmë po rriteshin për shkak të kërkesës në rritje ndërsa kufizimet Covid lehtësoheshin. Ajo vjen pasi Banka e Anglisë rrit normat e interesit në Mbretërinë e Bashkuar në 0.75%, duke përmendur shqetësimet se lufta në Ukrainë do të rrisë më tej çmimet. 

Mbi 7.000 trupa ruse të vrarë gjatë luftës në Ukrainë, thotë CIA

Më shumë se 7.000 ushtarë rusë janë vrarë që kur Vladimir Putin pushtoi Ukrainën muajin e kaluar, tregojnë vlerësimet e agjencisë amerikane të inteligjencës.

Zyrtarët e Pentagonit thanë për New York Times se ishin në gjendje të përpilonin të dhënat e tyre duke analizuar imazhet satelitore dhe përmbajtjen video që tregonin tanke dhe trupa ruse.

Megjithatë, ata theksuan se shifra e vdekjes nuk ishte e saktë.

Vlerësimet sugjerojnë se më shumë se 150.000 trupa ruse kanë hyrë tani në Ukrainë që nga 24 shkurti, me rreth 14.000 deri në 21.000 të plagosur.

Shifrat e fundit vijnë pasi raportet dolën nga Kievi këtë mëngjes se gjeneral-majori Oleg Mityaev ishte bërë gjenerali i katërt rus që thuhet se u vra në luftimet në Ukrainë.

Në fillim të kësaj jave, presidenti Volodymyr Zelenskyy tha se rreth 1.300 trupa ukrainase ishin vrarë në mes të luftës së vazhdueshme të Rusisë me vendin.

Bombardimi i teatrit në Mariupol, zyrtari ukrainas: Njerëzit po dalin të gjallë nga rrënojat

Teatri i Dramës shihet i dëmtuar pas bombardimeve të mërkurën në Mariupol, Ukrainë. (Këshilli Rajonal i Administratës Civile-Ushtarake të Donetskut nëpërmjet AP)

Anëtari i parlamentit të Ukrainës Sergiy Taruta tha të enjten se "njerëzit po dalin të gjallë" pasi një teatër në qytetin lindor të rrethuar të Mariupolit u dëmtua rëndë të mërkurën nga një sulm ajror ushtarak rus, raporton Fox News, përcjell Bota sot.

“Pas një nate të tmerrshme, më në fund kemi një lajm të mirë nga Mariupol në mëngjesin e ditës së 22-të të luftës. Streha e bombës [e teatrit] ishte në gjendje të qëndronte. Rrënojat kanë filluar të pastrohen”, ka shkruar Taruta në faqen e tij në Facebook.

Megjithatë, zyra e presidentit ukrainas Volodymyr Zelenskyy thotë se Rusia ka kryer sulme të tjera ajrore në Mariupol këtë mëngjes. Nuk pati raportime të menjëhershme për viktima.

"Njerëzit po ikin nga Mariupol vetë duke përdorur transportin e tyre," tha zyra e Zelenskyy, duke shtuar se "rreziku i vdekjes mbetet i lartë" për shkak të forcave ruse që më parë qëlluan mbi civilët.

​Ajo që ka ndodhur në Mariupol është gjenocid

Sot gjatë mëngjesit është raportuar për një sulm me bombë në qytetin e Mariupolit, ku në mesin e viktimave ka edhe fëmijë.

Me këtë rast ka reaguar edhe kryetari i qytetit Mariupol, i cili përmes një video e ka spjeguar tmerrin e ndodhur gjatë ditës së sotme, transmeton Bota sot. 

Kryetari i bashkisë së Mariupolit përmes një video e përshkruan "tmerrin" pasi një bombë ruse goditi Teatrin e Dramës së qytetit, për të cilin autoritetet thanë se kishte strehuar mbi 1000 njerëz - përfshirë fëmijë.

"Në fund e vetmja fjalë për të përshkruar atë që ka ndodhur sot është gjenocidi”.

Cili është sistemi raketor që Britania e Madhe po vendos në Poloni?

Britania e Madhe do të dërgojë një sistem raketash Sky Saber dhe 100 trupa në Poloni, tha sekretari i Mbrojtjes Ben Wallace.

Wallace është aktualisht në Varshavë, për bisedime dypalëshe mbi krizën në Ukrainë.

"Ne do të vendosim sistemin e raketave antiajrore Sky Saber me rreze të mesme veprimi në Poloni me rreth 100 personel për t'u siguruar që ne të qëndrojmë përkrah Polonisë, duke mbrojtur hapësirën e saj ajrore nga çdo agresion i mëtejshëm nga Rusia", tha ai në një konferencë shtypi.

Britania, si të gjitha anëtaret tjera të NATO-s, ka refuzuar të vendosë trupa në Ukrainë, por ka forcuar burimet në vendet fqinje të Aleancës.

Anëtarë të tjerë të NATO-s kanë lëvizur gjithashtu për të rritur sigurinë e krahut lindor të Aleancës ushtarake, transmeton Sky News.

Kremlini refuzon vendimin e Gjykatës Ndërkombëtare Penale për ndalje të pushtimit

Kremlini ka refuzuar urdhrin e Gjykatës Ndërkombëtare Penale për të ndalur sulmet në Ukrainë, duke thënë se të dyja palët duhet të pajtohen për t’iu dhënë fund armiqësive në mënyrë që të zbatohet kërkesa.

Duke folur para gazetarëve më 17 mars, një ditë pasi Gjykata më e lartë e Kombeve të Bashkuara ka bërë të ditur vendimin, zëdhënësi i Kremlinit, Dmitry Peskov u ka thënë gazetarëve se “nuk mund të marrë parasysh këtë vendim”.

Gjykata ka marrë këtë vendim pasi Kievi ka ngritur një rast për pretendimet ruse se Ukraina po kryen gjenocid në shtet, gjë që ishte edhe një prej preteksteve të Rusisë për të nisur pushtimin më 24 shkurt.

Mirëpo sipas Peskovit, nuk mund të merret pëlqimi nga të dyja palët për këtë çështje, andaj vendimi nuk është valid.

Gjykata po ashtu ka marrë vendim që Moska të sigurojë se “çfarëdo njësie e armatosur ushtarake ose e parregullt, që mund të drejtohet ose mbështetet prej saj, si dhe çdo organizatë dhe person që mund t'i nënshtrohet kontrollit ose drejtimit të saj, nuk ndërmerr asnjë hap për të çuar përpara operacionet ushtarake të përmendura në këtë pikë”.

Të dyja vendimet janë në pritje të një vendimi përfundimtar për këtë rast.

Gjykata po ashtu ka thënë se të dyja palët “duhet të përmbahen nga çfarëdo veprimi që mund të përkeqësojë situatën para Gjykatës, apo ta bëjë më të vështirë zgjidhjen e saj”.

Kjo Gjykatë merret me kallëzime penale të dorëzuara nga shtetet rreth dyshimeve për shkelje të ligjit ndërkombëtar.

Ai është institucioni më i lartë gjyqësor i Kombeve të Bashkuara.

Vendimet e saj janë detyruese, mirëpo Moska është pritur që nuk do ta marrë parasysh vendimin, pasi ajo e ka bojkotuar një seancë dëgjimore për rastin në fillim të marsit, dhe ka thënë në një dosje me shkrim se Gjykata nuk ka juridiksion.

Rusia ka thënë se është duke vepruar në vetëmbrojtje.

Kremlini: Nuk ka plane për vizitën e Putin në Ukrainë

Zëdhënësi Dmitry Peskov tha sot se aktualisht nuk ka plane që presidenti rus Vladimir Putin të vizitojë zonën e luftës në Ukrainë ose ushtarët në spitale.

"Nuk ka plane për udhëtime të tilla," tha Peskov, duke shtuar se ata aktualisht nuk po planifikojnë të vizitojnë spitalet për t'u takuar me ushtarët e shëruar.

“Gjithçka do të ndodhë në kohën e vet”, tha Peskov.

Peskov tha gjithashtu se Moska nuk do të merr parasysh vendimin e Gjykatës Ndërkombëtare të Drejtësisë të OKB-së, e cila urdhëroi ndërprerjen e menjëhershme të pushtimit rus në Ukrainë.

"Jo, ne nuk mund ta marrim parasysh këtë vendim," tha ai.

Frika nga Putini/ Rrëfimi i oligarkut rus: Kjo gjë është e rrezikshme për të ardhmen

Një nga oligarkët më të pasur të Rusisë ka thënë se sanksionet nuk do ta pengojnë Vladimir Putin të vazhdojë me pushtimin e tij në Ukrainë, duke paralajmëruar Perëndimin se nuk po arrin të kuptojë se si funksionon pushteti në Moskë.

Mikhail Fridman, pronari i Alpha Bank, i tha Bloomberg News se përpjekja për të detyruar oligarkët rusë të bëjnë presion mbi Putinin është një qëllim jorealist.

"Nëse njerëzit që janë në krye në BE besojnë se për shkak të sanksioneve, unë mund t'i afrohem zotit Putin dhe t'i them atij të ndalojë luftën dhe do të funksionojë, atëherë kam frikë se të gjithë jemi në telashe të mëdha." tha Fridman, përcjell "Bota sot".

"Kjo do të thotë se ata që po marrin këtë vendim nuk kuptojnë asgjë se si funksionon Rusia. Dhe kjo është e rrezikshme për të ardhmen."

Fridman, i cili është sanksionuar nga Britania e Madhe dhe BE, tha se nuk ka gjasa që dikush në orbitën e Putinit të mund të diskutojë përfundimin e luftës me të.

“Distanca e fuqisë midis zotit Putin dhe kujtdo tjetër është si distanca midis Tokës dhe kozmosit”, tha Fridman. “T’i thuash ndonjë gjë Putinit kundër luftës, për këdo, do të ishte një lloj vetëvrasjeje.”

Gjenerali britanik: Perëndimi duhet të përgatitet për më të keqen

Ish-komandanti i ushtrisë britanike, gjenerali Nick Parker, tha se bisedimet e paqes midis Ukrainës dhe Rusisë ishin një gjë e mirë, por se ato nuk duhet të "shpërqendrojnë" vendet perëndimore.

Gjenerali Parker, i cili këshilloi ministrin e mbrojtjes të Ukrainës, komentoi për BBC mbi pushtimin rus të Ukrainës dhe vetë negociatat.

"Realiteti është se një vend sovran është nën sulm dhe se ne shohim skena shkatërrimi dhe vdekjeje çdo ditë," tha ai.

Ai theksoi se fuqitë perëndimore duhet të "përgatiten për skenarin më të keq dhe të zhvillojnë opsione të bazuara në të".

Parker deklaroi se nevojitet një plan i qartë, që do të thotë se nuk do të ketë një ndalim zone fluturimi dhe vendosje trupash në Ukrainë, por duhet të krijohen kushte që do ta ndihmojnë Ukrainën të rifitojë kufijtë e saj origjinalë.

Panamaja raporton bombardimet ruse

Që nga fillimi i pushtimit rus të Ukrainës, tre anije me flamur panamez janë vënë nën zjarrin rus në Detin e Zi. Një nga anijet ishte mbytur dhe dy të tjera ishin dëmtuar, u tha gazetarëve të mërkurën (koha lokale) Noriel Araúz nga autoriteti i anijeve panameze. Askush nuk u lëndua, shtoi ai. "Ne e dimë se tre anije (me flamurin panamez) u sulmuan nga raketat ruse," tha Arauz.

Prandaj, anija e fundosur ishte një anije tregtare. "Marina ruse" po parandalon 200 deri në 300 anije nga kombe të ndryshme që të "largohen nga Deti i Zi", kritikoi Arauz. Prandaj, rreth një duzinë anijesh që lundrojnë nën flamurin panamez me një total prej rreth 150 anëtarësh të ekuipazhit janë të bllokuara. Shumica e anijeve mbanin grurë, tha Arauz. Panamaja ka regjistrin më të madh të anijeve tregtare në botë. Rreth 8000 anije mbajnë flamurin panamez. Kjo korrespondon me rreth 17 përqind të flotës tregtare globale. (AFP)

Urdhëri për ndalimin e luftës, nuk përfillet nga Rusia

Rusia ka deklaruar se nuk do ta ndalë pushtimin e saj në Ukrainë, pasi Gjykata e Lartë e Kombeve të Bashkuara urdhëroi ndalimin e menjëhershëm.

Gjykata kishte thënë se ishte "thellësisht e shqetësuar" nga përdorimi i forcës nga Rusia.

Kremlini ka thënë se nuk do t'i kushtojë vëmendje urdhrit, duke akuzuar mediat perëndimore për përhapjen e "lajmeve të rreme monstruoze" në lidhje me konfliktin, shkruan Sky News, përcjell "Bota sot".

Ajo goditi gjithashtu SHBA-në pasi presidenti Joe Biden e etiketoi Vladimir Putinin si "kriminel lufte".

Një zëdhënës tha se Putin është një "figurë ndërkombëtare shumë e mençur dhe e kulturuar".

Ata thanë gjithashtu se SHBA-ja ka bombarduar prej kohësh civilë dhe ka përdorur armë bërthamore në Japoni dhe në fund të Luftës së Dytë Botërore, zoti Biden "nuk ka të drejtë të mbajë leksione për Rusinë".

I pyetur për raportet e progresit në bisedimet e paqes me Ukrainën, Kremlini tha se negociatorët rusë po vendosnin "energji kolosale" në diskutime - më shumë se Ukraina.

Kushtet e Rusisë për një marrëveshje paqeje janë "absolutisht të qarta"dhe mund të ndalojnë atë që po ndodh "shumë shpejt", thanë ata.

Shërbimi sekret rus tentoi ta vrasë, flet deputeti ukrainas: Ky është objektivi kyç i Rusisë 

Odesa është identifikuar që nga fillimi i pushtimit si një objektiv kyç - dhe i vështirë - për forcat e Vladimir Putin.

Është qyteti i tretë më i madh i Ukrainës, një qendër e rëndësishme industriale dhe importi. Nëse Rusia mund ta marrë qytetin, atëherë mund ta shkëputë Ukrainën nga deti.

Këtë mëngjes Kay Burley nga Sky News foli me deputetin e qytetit, Oleksii Goncharenko, përcjell “Bota sot”.

Ai përshkroi se si porti jugor po "përgatitej për t'u mbrojtur" pasi anijet ruse u shfaqën në rajon.

Deputeti i parlamentit ukrainas tha se, "morali i njerëzve është shumë i lartë" dhe "ata që nuk janë me armë në dorë po e ndihmojnë ushtrinë me çfarëdo mënyre që munden".

Z. Goncharenko vazhdoi duke thënë se pas një tentative që u bë për ta vrarë atë nga shërbimi sekret rus, ai mendoi se "nuk kishte kuptim të shqetësohej".

“Sot të gjithë ukrainasit janë nën sulmin e Putinit dhe ne jemi të gjithë objektivat e tij”, shtoi ai.

Shihni se si zjarrfikësit evakuojnë banorët nga banesat e goditura me raketa në Kiev

Siç raportuam më herët, të paktën një person ka vdekur dhe tre të tjerë janë plagosur pasi mbetjet e një rakete të rrëzuar goditën një apartament banimi në kryeqytetin e Ukrainës, Kiev. Shikoni videon e mësipërme të zjarrfikësve që merren me zjarret në bllok dhe ndihmojnë në evakuimin e banorëve.

Pamjet këtu

Presidenti rus Vladimir Putin është i zemëruar, shkruan blick.ch transmeton "Bota sot".

Në një fjalim televiziv drejtuar ministrave të qeverisë të mërkurën, ai deklaroi se Rusia do t'i arrijë qëllimet e saj në Ukrainë. Ai pretendon se Perëndimi planifikon të arrijë dominimin global - dhe të "shpërbëjë" Rusinë.

Putini nuk dëshiron të dëgjojë për një seri disfatash nga trupat e tij në Ukrainë. Në fjalimin e tij ai thotë se "operacioni special për çmilitarizimin dhe denazifikimin e Ukrainës" po "zhvillohet me sukses". Aktualisht po zhvillohen bisedimet për arritjen e paqes midis Ukrainës dhe Rusisë. Kohët e fundit, mbizotëroi një optimizëm i lehtë se lufta do të përfundonte. Të paktën në anën ukrainase.

Zelensky fjalim në Bundestagun gjerman, ka një thirrje për Gjermaninë

Presidenti ukrainas Volodymyr Zelensky ka përfunduar fjalimin e tij në Bundestagun gjerman në Berlin.

Ai falënderoi Gjermaninë për ndihmën e saj, por u tha ligjvënësve se mbështetja e tyre "erdhi shumë vonë për të ndaluar luftën", raporton BBC, përcjell Bota sot.

“Pse “kurrë më” nuk vlen”, pyeti ai. “Cila është përgjegjësia historike e Gjermanisë ndaj Ukrainës sot?”

Zelensky gjithashtu kritikoi liderët gjermanë për interesat e biznesit të vendit në Rusi.

"Ne mund të shohim gatishmërinë tuaj për të vazhduar të bëni biznes me Rusinë dhe tani jemi në mes të luftës së ftohtë," tha Zelesnky.

"Dhe përsëri kjo është diçka që nuk keni arritur ta shihni. Ju ende po mbroni veten pas një muri që nuk ju bën të mundur të shihni atë që po kalojmë."

Ai përfundoi duke i bërë thirrje Gjermanisë që të trajtojë agresionin rus dhe të vendosë sanksione më të ashpra ndaj Moskës. “Paqja është më e rëndësishme se të ardhurat”, u tha ai deputetëve.

Rreth dy milionë njerëz kanë ikur nga Ukraina në Poloni

Mbi 1.95 milion njerëz kanë ikur prej Ukrainës në Poloni prej shpërthimit të luftës, ka thënë Agjencia kufitare e Polonisë të enjten.

Më shumë se gjysmë milioni njerëz tashmë larguar nga Polonia drejt destinacioneve tjera, sipas hulumtuesit për migrim në Universitetin e Varshavës, Maciej Duszczyk.

Vetëm të mërkurën, 60,000 persona kanë kaluar kufirin, ka thënë Garda Kufitare.

Shumica e refugjatëve kanë shkuar në qytete të mëdha, përfshirë Varshavën, Krakovin dhe Vrocllavin, kapacitetet e të cilave janë të mbushura.

Ukraina shpreson se do të hapen korridoret humanitare nga Mariupoli

Zyrtarët ukrainas kanë thënë se shpresojnë të hapin nëntë “korridore humanitare” nga disa qytete të shtetit, përfshirë ato nga qyteti i rrethuar i Mariupolit në juglindje.

Zëvendëskryeministrja ukrainase, Iryna Vereshchuk, ka thënë se Qeveria është duke shpresuar që të hapë rrugët gjatë së enjtes.

Ajo i ka bërë këto deklarata një ditë pasi presidenti ukrainas, Volodymyr Zelensky, ka thënë se forcat ruse kanë shënjestruar me qëllim një teatër në Mariupol, në të cilin kanë qenë duke u strehuar qindra persona.

Bombardohet një qendër edukative në Merefa

Raketat ruse kanë bombarduar një qendër edukative në orët e para të mëngjesit të së enjtes, ka thënë Shërbimi Shtetëror për Emergjenca në Ukrainë.

Autoritetet kanë thënë se ndërtesa në Merefa, qytezë në rajonin Harkiv, është shkatërruar pjesërisht. Shërbimet e zjarrfikësve janë duke tentuar të shuajnë zjarrin.

Mediat lokale kanë raportuar se një shkollë dhe qendër komuniteti janë goditur.

Ende nuk ka raportime për viktima.

Qendra edukative e bombarduar në Merefa.

Hungaria pret ‘valë’ refugjatësh javën e ardhshme

Kryeministri i Hungarisë Viktor Orban ka thënë se ai pret të shohë një "valë më të madhe refugjatësh" që vijnë nga Ukraina.

Duke folur në një video të postuar në Facebook gjatë një vizite në një pikë kalimi pranë kufirit të Hungarisë me Ukrainën dhe Rumaninë, Orban tha se më shumë roje kufitare do të vendosen atje javën e ardhshme për të trajtuar fluksin e shtuar, shkruan BBC, transmeton "Bota sot".

Deri më 14 mars, rreth 263,888 ukrainas kishin kaluar kufirin për në Hungari, sipas mbikëqyrësit të të drejtave të njeriut të OKB-së.

Të mërkurën, një këshilltar i Orban tha për mediat hungareze se zyrtarët prisnin të merrnin mbi 900,000 refugjatë deri në fund të luftës.

Megjithatë, numri i refugjatëve që mbërrijnë në Hungari ka rënë ndjeshëm gjatë javës së kaluar.

Heroina e të gjithëve/ Nëna ukrainase e 12 fëmijëve vritet gjatë luftimeve me banditët rusë të Putinit

Dje u bënë homazhe emocionuese për një mjeke luftarake nënë e 12 fëmijëve që dha jetën në vijën e parë të frontit duke luftuar pushtuesit e Vladimir Putinit.

Heroina Olga Semidyanova - e cila mbante një armë - u plagos për vdekje ndërsa ajo vazhdoi të luftonte forcat ruse kur shumica e njësisë së saj ishte vrarë, raporton The Sun, përcjell Bota sot.

48-vjeçarja u godit në stomak gjatë një përleshjeje të ashpër me zjarrin në jug të Donetskut.

Trupi i saj nuk është gjetur ende për shkak të betejave të vazhdueshme në zonë – duke i lënë familjes së saj zemërthyer një pritje të dhimbshme përpara se ta varrosnin.

Olga Semidyanova

Lajmin e plotë mund ta lexoni KËTU.

Zhvillimet kyçe të orëve të fundit janë këto:

Në qytetin e rrethuar ukrainas, Mariupol, autobusët kanë larguar rreth 300 refugjatë për në rajonin Rostov, në kufi me Rusinë, kanë raportuar mediat ruse. Të mërkurën, një raketë ruse ka goditur teatrin e këtij qyteti ku besohet se kanë qenë duke u strehuar mbi 1,000 persona, sipas zëvendëskryetarit të qytetit

Presidenti ukrainas, Volodomyr Zelensky, ka akuzuar Rusinë se ka shënjestruar qëllimshëm këtë teatër. Rusia ka hedhur poshtë këto deklarata

Në kryeqytetin ukrainas, Kiev, një person ka vdekur dhe tre të tjerë janë plagosur, pasi një ndërtesë banimi është goditur nga mbetjet e një rakete të rrëzuar. Ekipet e shpëtimit janë në kërkim të personave që mund të kenë mbetur nën rrënoja

Në Çernihiv janë vrarë 13 persona, të cilët kanë qenë duke pritur për të marrë bukë, si pasojë e bombardimeve ruse.

Në frontin diplomatk, marrëdhëniet mes Shteteve të Bashkuara dhe Rusisë janë përshkallëzuar edhe më shumë. Presidenti amerikan, Joe Biden, e ka quajtur presidentin rus, Vladimir Putin, një “kriminel lufte”.

Kremlini i ka konsideruar komentet e Bidenit si “retorikë të papranueshme dhe të pafalshme”.

Kryebashkiaku i rrëmbyer u këmbye me nëntë ushtarë të rinj rusë

Sipas burimeve ukrainase, kryetari i bashkisë së qytetit Mariupol , Ivan Fedorov, i cili u rrëmbye më 11 mars, është liruar. Në këmbim, nëntë ushtarë të rinj rusë të moshës 20 dhe 21 vjeç iu dorëzuan Rusisë nga robëria, tha zëdhënësja e Zyrës Presidenciale të Ukrainës, raporton SRF përcjell "Bota sot".

“Këta janë në thelb fëmijë, rekrutë të cilët, sipas Ministrisë ruse të Mbrojtjes, nuk janë as në Ukrainë”, tha zëdhënësja. Një video është publikuar në rrjetet sociale ku shihet presidenti i Ukrainës, Volodymyr Zelenskiy, duke biseduar me kryebashkiakun në telefon.

-Pas Bidenit edhe ky politikan e cilëson Putinin kriminel të luftës

Zëvendësministri i Jashtëm polak, Marcin Przydacz, i tha BBC-së se bombardimi i teatrit në Mariupol është një tjetër shenjë se forcat e Vladimir Putin po përdorin taktika më brutale, transmeton “Bota sot”.

Przydacz thotë se pajtohet me karakterizimin e presidentit amerikan Joe Biden për liderin rus si "kriminel lufte".

"Për mendimin tim plani fillestar ishte të shkatërronte infrastrukturën ushtarake," thotë Przydacz.

"Kremlini besonte se qeveria e Ukrainës do të avullonte disi. Nuk ishte kështu. Ukrainasit janë shumë të guximshëm duke mbrojtur tokën, vlerat e tyre, demokracinë e tyre, vendin që kanë ndërtuar, ata kanë ndërtuar për 30 vitet e fundit. Kështu që tani Putin vendosi të godasë infrastrukturën civile".

"Dhe çfarë është më e keqja, unë kam parë një foto që është rreth këtij teatri, ishte shkruar në trotuar se ka fëmijë brenda. Kjo nuk e ndaloi zotin Putin të bombardonte këtë dhe është me të vërtetë, siç e quajti Presidenti Biden, ky është kriminel i luftës”.

Belgjika nis të përballet me fluksin e refugjatëve ukrainas

Pas javësh, Belgjika më në fund po fillon të përballet me fluksin masiv të refugjatëve nga Ukraina, duke ngritur një qendër të re, për strehimin dhe regjistrimin e tyre, shkruan Euronews.

Objekti i ri në periferi të Brukselit, i cili u hap të hënën, është krijuar për të ndihmuar njerëzit që ikin nga pushtimi rus të regjistrohen për mbështetje nga qeveria, duke përfshirë aksesin në strehim dhe punësim.

Autoritetet belge thonë se presin deri në 200,000 refugjatë që të mbërrijnë në vend -- një shumë që Dominique Ernould, zëdhënësi i Zyrës së të Huajve të Belgjikës, thotë se ata mund ta përballojnë, transmeton "Bota sot".

"Po, ne do të bëjmë maksimumin e mundshëm. Mobilizimi i qytetarëve është gjithashtu i rëndësishëm," tha Ernould për Euronews.

“Fedasil, agjencia e azilkërkuesve të Belgjikës, ende po përpiqet të rrisë kapacitetin e saj të pritjes”, tha Ernould.

"Qeveria gjithashtu do të bëjë gjithçka që mundet për të vendosur [në vend] sa më shumë infrastrukturë të jetë e mundur për këta njerëz të zhvendosur, të paktën gjatë kohës që zgjat kjo mbrojtje e përkohshme."

Megjithatë, shumë nga ukrainasit që presin në radhë thjesht duan të kthehen në një lloj normaliteti.

Tanya, një nga milionat e zhvendosur nga pushtimi rus, i tha Euronews se donte të vazhdonte me jetën e saj.

"Nuk e kam idenë [se çfarë do të ndodhë më pas], por plani im është të regjistrohem, të gjej një punë dhe të kem një jetë normale, thjesht për të punuar -- për t'i vendosur fëmijët e mi në shkollë dhe thjesht për të punuar këtu. Dua thjesht të ulem dhe të pres sepse askush nuk e di se sa kohë do të zgjasë," tha ajo.

Procesi është pjesë e direktivës së BE-së për mbrojtjen e përkohshme të aktivizuar së fundmi, e cila anashkalon procedurën tradicionalisht të mbingarkuar të azilit dhe ofron një rrugë të shpejtë dhe të thjeshtuar për të aksesuar mbrojtjen në të gjithë bllokun.

Sulmet mizore të Putinit, vjen reagimi i ashpër: Rusëve u pëlqen shija e gjakut!

Kryetari i qytetit jugor të Ukrainës, Mykolaiv, ka dënuar sulmin rus në një teatër në Mariupol.

Rreth 1,000 deri në 1,200 civilë thuhet se ishin strehuar në teatër përpara se të goditeshin nga forcat ruse, kanë thënë zyrtarët e Mariupol. Derisa ende nuk dihet numri i viktimave.

Duke folur për BBC, Oleksandr Senkevych tha: "Unë do ta quaja këtë nazizëm rus sepse ata vrasin njerëz. Kur thonë se përpiqen të 'de-nazificojnë' ... ose 'ç'militarizojnë' Ukrainën, është krejtësisht e pavërtetë sepse ata thjesht vrasin civilët”, tha Senkevych, transmeton "Bota sot".

"Pra, unë mendoj se atyre u pëlqen shija e gjakut".

Presidenti rus Vladimir Putin e ka justifikuar luftën si një "operacion special ushtarak" me qëllim tē "denazifikimit" të Ukrainës - një pretendim që është hedhur poshtë në masë të madhe.

Ukraina: Rusia është fokusuar në shënjestrim të civilëve nga ajri

Bombat ruse vazhdojnë të godasin popullsinë civile në Ukrainë, sipas Shtabit të Përgjithshëm të Forcave të Armatosura në Ukrainë.

Në një postim në Facebook, forcat e armatosura të Ukrainës kanë thënë se operacionet “e pasuksesshme” ushtarake të Rusisë në territore tokësore, nënkuptojnë se ajo është duke e fokusuar betejën në ajër – duke shënjestruar infrastrukturë dhe zona të banuara me civilë në qytetet ukrainase.

Ukraina ka pretenduar se është duke fituar betejën në ajër dhe tokë, duke thënë se ka rrëzuar 10 shënjestra ajrore të Rusisë.

Radio Evropa e Lirë nuk mund të verifikojë këto pretendime.

Në deklaratë është thënë edhe se Rusia është duke kryer sulme kibernetike, është duke shkatërruar ndërtesa të radiove dhe televizioneve, si dhe është duke përhapur dezinformata për pushtimin.

Lufta në Ukrainë/ Pushtimi rus ka ngecur në të gjitha frontet

Ofensivat e Rusisë në Ukrainë kanë “ngecur kryesisht në të gjitha frontet”, thotë Ministria e Mbrojtjes e Britanisë së Madhe në vlerësimin e saj këtë mëngjes.

Përmbledhja shton se forcat ruse kanë "bërë përparim minimal në tokë, det ose ajër në ditët e fundit dhe ato vazhdojnë të pësojnë humbje të rënda", shkruan BBC, transmeton "Bota sot".

"Rezistenca ukrainase mbetet e palëkundur dhe e mirë-koordinuar. Shumica dërrmuese e territorit ukrainas, duke përfshirë të gjitha qytetet e mëdha, mbetet në duart e Ukrainës."

Moska ka regjistruar vetëm rreth 500 vdekje të trupave deri më tani, por inteligjenca amerikane vlerëson se është afër 7,000 personel.

“Putin po lufton në të gjitha frontet”

Ndërsa presioni rritet mbi Putinin si brenda ashtu edhe jashtë shtetit, redaktori i BBC thotë se ai po lufton në të gjitha frontet

“Putin po lufton në të gjitha frontet. Në Ukrainë…dhe në shtëpi. Duke kuptuar se sanksionet do të shkaktojnë dhimbje të forta ekonomike këtu, ai po kërkon dikë që të fajësojë, në mënyrë që rusët të mos e fajësojnë atë”, deklaroi Steve Rosenberg, përcjell “Bota sot”.

Komentet e Putinit – të cilat u mbajtën në një fjalim të mërkurën para ministrave të qeverisë së tij – vijnë pasi pushtimi rus i Ukrainës hyn në javën e tretë.

Lufta ka rezultuar në një valë sanksionesh dërrmuese të vendosura kundër Rusisë, duke shtuar izolimin ekonomik dhe diplomatik të vendit nga komuniteti ndërkombëtar.

Veprimet e Putinit në Ukrainë gjithashtu çuan në atë që presidenti amerikan Joe Biden e quajti atë "kriminel lufte" të mërkurën në mbrëmje. Kremlini u kundërpërgjigj, duke i quajtur komentet "retorikë të papranueshme dhe të pafalshme".

Katër anije të mëdha luftarake ruse nisen nga Japonia për në Ukrainë

Katër anije të mëdha luftarake ruse janë parë duke lundruar pranë ishujve japonezë Honshu dhe Hokkaido ndërsa udhëtonin në perëndim, ndoshta drejt Evropës, raporton Reuters, transmeton “Bota sot”.

Në fotot e publikuara nga ministria e mbrojtjes e Japonisë dukej se disa kamionë ushtarakë ishin vendosur në kuvertën e një prej anijeve që kalonin.

I pyetur nëse ata mund të nisen për në Ukrainë, një zëdhënës i ministrit japonez të mbrojtjes i tha Reuters, "është e mundur".

Sipas analistëve ushtarakë, i ashtuquajturi "operacion ushtarak" i Rusisë nuk ka ecur aq mirë sa ishte planifikuar deri më tani, me pajisjet ushtarake që ka të ngjarë të jenë varfëruar në një masë më të madhe se sa ishte parashikuar.

Mbetjet e një rakete goditën ndërtesën e banimit në Kiev, vdes një person

Të paktën një person u vra dhe tre u plagosën pasi mbetjet e një rakete të rrëzuar goditen një ndërtesë banimi në kryeqytetin ukrainas, Kiev, tha shërbimi i emergjencës i Ukrainës.

Thuhet se kulla u godit në orën 5:02 të mëngjesit me orën lokale (3:02 GMT) të enjten në mëngjes në lagjen Darnytskyi të kryeqytetit, përpara se zjarrfikësit dhe personeli i shpëtimit të dërgoheshin në vendngjarje.

Njerëzit janë evakuuar nga katet e njëmbëdhjetë e më lart dhe po kryhen operacione shpëtimi për çmontimin e strukturave dhe kërkimin e të bllokuarve nën rrënoja, raportoi SES.

Sot mbahet mbledhja urgjente në OKB

Një mbledhje urgjente e Këshillit të Sigurimit të OKB-së do të mbahet sot për të trajtuar krizën e përshkallëzuar humanitare në Ukrainë.

SHBA, Britania, Franca, Irlanda, Norvegjia dhe Shqipëria kërkuan takimin, raportojnë burime diplomatike, pas rritjes së bombardimeve ndaj zonave civile ditët e fundit, shkruan BBC, transmeton "Bota sot".

SHBA, Britania e Madhe dhe Franca janë të gjitha anëtarë të përhershëm të këshillit së bashku me Rusinë dhe Kinën. Rusia ende mban presidencën e Këshillit të Sigurimit për muajin mars - që do të thotë se përparimi në disa rezoluta është penguar.

Raportohet se po zhvillohen gjithashtu diskutime për të krijuar një rast që presidenti ukrainas Volodymyr Zelensky të flasë në Asamblenë e Përgjithshme të OKB-së - e cila përbëhet nga të gjitha shtetet anëtare.

Zelensky pretendon se një numër i madh i rusëve kanë vdekur

Në fjalimin e tij të fundit gjatë natës së mbrëmshme, Presidenti i Ukrainës Volodymyr Zelensky pretendoi se humbjet e Rusisë në Ukrainë ishin më të larta se në luftërat në Siri, Çeçeni dhe Afganistan.

Duke iu drejtuar rusëve në rusisht, Zelensky tha: "Trupat ruse po pësojnë humbje të tilla në Ukrainë, të cilat nuk u shkaktuan as në Siri, as në Çeçeni. Trupat sovjetike nuk pësuan humbje të tilla as në Afganistan."

Nuk ka gjasa që mesazhi të jetë dëgjuar nga shumë njerëz në Rusi, ku informacioni rreth luftës po kontrollohet fort.

Se si Zelensky arriti në këtë projeksion është e paqartë.

Inteligjenca amerikane vlerëson se më shumë se 7,000 trupa ruse kanë vdekur gjatë pushtimit të Ukrainës.

Sipas vlerësimeve të ndryshme, rreth 15,000 trupa sovjetike vdiqën në luftën afgane (1979-89), të paktën 13,000 trupa ruse vdiqën në luftërat çeçene dhe numri i të vdekurve rusë në Siri renditet në qindra.

Kryebashkiaku i Melitopol lirohet në këmbim të nëntë rekrutëve rusë 

Më herët u raportua se kryebashkiaku i Melitopolit u lirua pasi dyshohet se ishte mbajtur peng nga trupat ruse për më shumë se pesë ditë.

Tani po dalin raporte të reja që thonë se kryebashkiaku Ivan Fedorov është shkëmbyer me nëntë të burgosur rusë.

Duke folur në televizionin ukrainas, një sekretar shtypi i presidentit të Ukrainës tha se rekrutët rusë ishin midis 18 dhe 19 vjeç.

Pas rrëmbimit të Fedorov pesë ditë më parë, banorët e Melitopol dolën për të protestuar kundër rrëmbimit të tij.