Ukraina përjetoi njërën prej ditëve më të rënda, një fije shprese i vije nga Amerika!

Të gjurmosh sa njerëz janë vrarë që kur Rusia pushtoi Ukrainën është e vështirë, pasi informacioni është i paqartë dhe i vështirë për t'u verifikuar, shkruan BBC, transmeton Bota sot.

Burimet ushtarake ukrainase thonë se deri më tani janë vrarë rreth 15,000 ushtarë rusë, megjithëse kjo shifër mund të përfshijë të plagosur si dhe të vdekur. Rusia nuk ka dhënë një shifër për humbjet e saj që nga 2 marsi, kur tha se 498 ishin vrarë. Vlerësimi më i fundit i inteligjencës ushtarake amerikane, i cituar nga New York Times, e vendos shifrën në rreth 7,000.

Shërbimi rus i BBC-së ka bashkuar një listë me 557 vdekje të konfirmuara ruse, me burim nga raportet që përmbajnë informacione specifike për vdekjet e individëve.

Dhe nga pala ukrainase, më shumë se një javë më parë, Presidenti Zelensky tha se 1,300 ushtarë ukrainas ishin vrarë, por Ukraina nuk ka dhënë asnjë shifër që atëherë.

Të hënën, zyrtarët ukrainas thanë se 115 fëmijë ishin vrarë në konflikt dhe 140 u plagosën, ndërsa zyra e OKB-së për të drejtat e njeriut tha se 925 civilë ishin vrarë dhe 1,496 u plagosën.

Megjithatë, autoritetet në qytetin jugor të rrethuar të Mariupolit vlerësojnë se 2500 njerëz kanë vdekur vetëm në atë qytet.

Presidenti Biden paralajmëroi se rusët mund të planifikojnë sulme kibernetike kundër SHBA-së, duke argumentuar se ky moment kërkon përmirësime të sigurisë kibernetike të vendit.

"Ky është një moment kritik për të përshpejtuar punën tonë për të përmirësuar sigurinë e brendshme kibernetike dhe për të forcuar qëndrueshmërinë tonë kombëtare," tha Biden në një deklaratë të hënën, shkruan Fox News, përcjell "Bota sot".

"Unë kam paralajmëruar më parë për potencialin që Rusia mund të kryejë aktivitete keqdashëse kibernetike kundër Shteteve të Bashkuara, duke përfshirë si përgjigje ndaj kostove të paprecedentë ekonomike që i kemi imponuar Rusisë së bashku me aleatët dhe partnerët tanë. Është pjesë e librit të lojës së Rusisë. Sot, Administrata po i përsërit ato paralajmërime të bazuara në inteligjencën në zhvillim se qeveria ruse po eksploron opsione për sulme të mundshme kibernetike".

"Administrata ime do të vazhdojë të përdorë çdo mjet për të penguar, përçarë dhe nëse është e nevojshme, për t'iu përgjigjur sulmeve kibernetike kundër infrastrukturës kritike."

Biden i bëri thirrje gjithashtu sektorit privat që të ndihmojë në rritjen e aftësisë së tij për të luftuar kërcënimet kibernetike nga Rusia.

Deportimet me forcë drejt Rusisë të civilëve ukrainas nga qyteti i rrethuar Mariupol janë të paskrupullta, thanë të dielën zyrtarët amerikanë pasi autoritet në Kiev dhe kryebashkiaku i Mariupolit akuzuan Moskën se po transportonte mijëra persona pa dëshirën e tyre.

Akuzat nuk janë verifikuar ende, por më herët këtë muaj Kievi refuzoi një ofertë nga Moska për të krijuar "korridore humanitare" për largimin e civilëve nga gjashtë qytete ukrainase të bombarduara rëndë, pasi u bë e qartë se Moska dëshironte që civilët të shkonin drejt Rusisë, ose aleates së saj Bjellorusisë.

Vetëm dy nga korridoret e propozuara nga Rusia përfundonin në territorin e kontrolluar nga ukrainasit. Presidenti francez Emmanuel Macron e akuzoi Rusinë për "cinizëm moral dhe politik", dhe shtoi se "nuk njoh shumë ukrainas që dëshirojnë të shkojnë në Rusi".

Udhëheqësi ukrainas Volodymyr Zelenskyy i refuzoi si "krejtësisht imorale" trajektoret e propozuara nga Rusia për evakuimin e civilëve.

Këshilli i qytetit Mariupol akuzoi i pari se civilët po deportoheshin me forcë nga Rusia. Guvernatori i rajonit Donetsk, Pavlo Kirilenko, gjithashtu akuzoi Moskën se "kishte deportuar me forcë mbi 1 mijë banorë të Mariupolit".

Lajmin e plotë lexoni KETU

Katër fëmijë janë plagosur sot në një autobus që u godit nga granatimet e hedhura nga forcat ruse, shkruan BBC, transmeton Bota sot.

Autobusët që evakuojnë civilët nga zonat e vijës së parë janë goditur nga granatimet, thotë guvernatori i rajonit të Zaporizhzhia të Ukrainës.

Oleksandr Starukh thotë se "katër fëmijë u dërguan në spital" dhe ka fajësuar forcat ruse.

BBC nuk ka qenë në gjendje t'i verifikojë këto pretendime.

21 punonjës shpëtimi ukrainas janë vrarë dhe 47 janë plagosur deri më tani, për shkak të granatimeve nga forcat ruse, tha nënkryetari i Shërbimit Shtetëror të Emergjencave të Ukrainës, Roman Prymush, gjatë një konference për shtyp me Ukrinform të hënën.

“Sipas Konventës së Gjenevës, granatimet apo kërcënimet e tjera për shpëtimtarët në momentin e operacioneve konsiderohen si krim lufte. Të gjitha këto raste i regjistrojmë, materialet për secilën prej tyre ia kalojë organeve përkatëse, të cilat do të bëjnë një vlerësim ligjor për veprime të tilla, ku do të identifikohen autorët e përfshirë”, tha Prymush, shkruan CCN, përcjell "Bota sot".

Ai vuri në dukje se ndalimi i shpëtimtarëve nga forcat ruse është gjithashtu një shkelje e Konventës së Gjenevës.

Prymush shtoi se do të jetë objekt i procedimeve në gjykatat ndërkombëtare, të cilat tashmë janë duke u zhvilluar.

Bjellorusia, një aleat i ngushtë rus, mund të sulmojë së shpejti Ukrainën dhe po përgatitet të lejojë potencialisht Rusinë të pozicionojë armë bërthamore në tokën bjelloruse, sipas një zyrtari të lartë të inteligjencës së NATO-s, shkruan The Guardian, përcjell.

Zyrtari, duke folur në kushte anonimiteti, tha se aleanca është e shqetësuar se trupat bjelloruse mund t'i bashkohen luftës në Ukrainë.

"Qeveria bjelloruse po përgatit mjedisin për të justifikuar një ofensivë bjelloruse kundër Ukrainës dhe vendosjen e afërt të armëve bërthamore ruse në Bjellorusi", tha zyrtari i intelegjencës.

Zyrtarët ukrainas kanë paralajmëruar publikisht se Bjellorusia mund t'i bashkohet luftës. Ndërsa Bjellorusia ka lejuar trupat ruse të përdorin territorin e saj për të nisur operacione tokësore dhe ajrore, NATO nuk ka parë asnjë provë të fortë që trupat bjelloruse kanë marrë pjesë drejtpërdrejt në luftën në Ukrainë, tha zyrtari.

Ukraina nuk do t'i përkulet kurrë ultimatumeve nga Rusia dhe qytete të tilla si Kievi, Mariupoli apo Kharkiv nuk do të pranojnë pushtimin rus, ka thënë presidenti Voldymyr Zelensky për mediat ukrainase, raporton BBC, përcjell Bota sot.

"Ne kemi një ultimatum me pika në të - 'ndiqe atë dhe pastaj do t'i japim fund luftës'. Ukraina nuk mund ta përmbushë ultimatumin," thotë Zelensky në një intervistë të publikuar nga kompania e transmetimit publik ukrainas Suspilne, cituar nga Reuters.

Rusia i kishte caktuar Ukrainës një afat të fundit të mëngjesit të sotëm për t'u dorëzuar në qytetin port të rrethuar të Mariupolit, duke thënë se civilëve dhe luftëtarëve do t'u jepet një kalim i sigurt nga qyteti për sa kohë që ata të dorëzojnë armët.

Por Ukraina e injoroi atë ultimatum, duke thënë se dorëzimi nuk ishte një opsion.

Kur Serhii u zgjua nga lajmet se një bombë kishte rrafshuar Teatrin e Dramës në Mariupol, ku qindra njerëz ishin strehuar, ai nuk mund të merrte frymë.

Gruaja e tij dhe dy vajzat e tyre ishin Brenda, shkruan CNN, përcjell “Bota sot”.

Një ditë para sulmit, redaktori 56-vjeçar, i cili jeton në kryeqytetin ukrainas Kiev, mori një telefonatë në panik nga vajza e tij 30-vjeçare.

Ai nuk kishte dëgjuar për të që nga 1 marsi, kur forcat ruse intensifikuan rrethimin e Mariupolit, qytetit port strategjik, duke lëshuar një breshëri të pamëshirshme raketash dhe bombash nga toka, qielli dhe deti.

Me mbarimin e energjisë elektrike dhe shërbimit të internetit, Mariupol u shkëput kryesisht nga bota e jashtme. Serhii, i cili kërkoi që të përdorej vetëm emri i tij për arsye sigurie, priti me dëshpërim çdo përditësim nga vajzat e tij.

SHBA nuk e ka vërtetuar ende nëse Rusia ka caktuar një komandant ushtarak përgjegjës për udhëheqjen e luftës në Ukrainë.

Mirëpo, disa zyrtarë aktual dhe ish-funksionarë të mbrojtjes thonë se rusët po i udhëheq një komandat i ngathët, ku vërehet ç’organizimin i forcave ruse në sulmet ndaj Ukrainës.

Burimet thonë se njësitë ruse që marrin pjesë në ofensiva të ndryshme anembanë Ukrainës kanë dështuar të lidhen mes vete, ku kësisoj po veprojnë në mënyrë të pavarur pa një plan operativ gjithëpërfshirës.

Forcat ruse gjithashtu duket se kanë probleme të rëndësishme komunikimi. Ushtarët dhe komandantët kanë përdorur ndonjëherë telefona celularë komercialë dhe kanale të tjera të pasigurta për të biseduar me njëri-tjetrin, duke e bërë më të lehtë përgjimin e komunikimit të tyre dhe duke ndihmuar Ukrainën të zhvillojë objektiva për kundërsulmet e veta.

Gjithçka ka çuar në atë që këto burime thonë se ka qenë një operacion i ndarë - dhe nganjëherë kaotik - që ka befasuar zyrtarët amerikanë dhe perëndimorë.

"Një nga parimet e luftës është 'uniteti i komandës', tha analisti ushtarak i CNN, gjenerali Mark Hertling, një ish-komandant i ushtrisë amerikane në Evropë.

Lajmin e plotë lexoni KËTU.

Forcat ruse rrëmbyen katër gazetarë ukrainas nga shtëpitë e tyre në Melitopol të hënën në mëngjes, tha Sindikata Kombëtare e Gazetarëve të Ukrainës, shkruan The Guardian, transmeton Bota sot.

Në një deklaratë në Telegram, sindikata tha se persona të armatosur shkuan në shtëpitë e botuesit Mykhailo Kumok, redaktores Yevhenia Borian dhe gazetarëve Yulia Olkhovska dhe Liubov Chaika dhe "i çuan në një drejtim të panjohur".

Të katër personat janë të lidhur me Melitopolskie Vedomosti, një gazetë me bazë në qytetin e pushtuar nga Rusia të Melitopol në jug të Ukrainës, raporton CNN.

Ata u mbajtën në një vend të panjohur për disa orë përpara se të liroheshin, tha sindikata. Ende nuk dihet gjendja e tyre.