Gjuetia për superjahte të oligarkëve rusë të sanksionuar
Nga: M.L.
Dy superjahte të lidhura me miliarderin rus Roman Abramovich janë ankoruar në Turqi, përtej sanksioneve të Mbretërisë së Bashkuar dhe BE-së, shkruan BBC transmeton "Bota sot". Secila prej anijeve kushton më shumë se 500 milion dollarë (377 milion £) dhe janë në mesin e serive të gjurmuara nga Lloyd's List Intelligence.
Ekspertët e të dhënave të transportit kanë monitoruar pajisjet e gjurmimit në bord dhe e kanë ndarë këtë informacion ekskluzivisht me BBC-në, duke mundësuar që të komplotohen udhëtimet e këtyre dhe anijeve të tjera të lidhura me rusë të sanksionuar.
Një varkë me të rinj ukrainas u përpoq të ndalonte superjahtin My Solaris që po ankorohej në Bodrum të Turqisë. Jahti tjetër i lidhur me Abramovich Eclipse lundroi për në Marmaris. Shumë superjahte janë të lidhura me miliarderë rusë, por pronësia është e mbuluar me fshehtësi - varkat shpesh regjistrohen përmes një sërë kompanish në det të hapur.
Dalin detaje nga bisedat e Macronit me Putinin e Zelenskyn, nuk ka lajme shumë të mira
Arife Morina
Nuk ka asnjë marrëveshje në horizont për një armëpushim në Ukrainë, tha Pallati Élysée përmes një deklarate pasi presidenti francez Emmanuel Macron foli me homologët e tij rusë dhe ukrainas veçmas të martën.
“Për momentin nuk ka asnjë marrëveshje, por Presidenti [Macron] mbetet i bindur për nevojën për të vazhduar përpjekjet e tij”, thuhet në deklaratë, shkruan CNN, përcjell "Bota sot".
“Nuk ka rrugëdalje tjetër përveç armëpushimit dhe negociatave me mirëbesim midis Rusisë dhe Ukrainës”, shtoi ai.
Telefonata mes Macron dhe presidentit rus Vladimir Putin ka zgjatur për një orë, sipas Pallatit Élysée.
Që nga fillimi i luftës më 24 shkurt, Macron ka mbajtur një linjë komunikimi të hapur si me Putinin ashtu edhe me presidentin ukrainas Volodymyr Zelensky.
Duke përfshirë telefonatat sot, Macron ka folur me Putinin tetë herë dhe me Zelenskyn 17 herë që nga fillimi i pushtimit rus muajin e kaluar, sipas llogaritjes së CNN.
Ushtarët rusë po ‘vuajnë’ - ky është plani për shpëtimin e tyre
Arife Morina
Ka disa informacione se ushtarët rusë vuajnë nga ngricat për shkak të pajisjeve joadekuate ndaj të motit të ftohtë, ka thënë një zyrtar i mbrojtjes amerikane.
Duke folur në kushte anonimiteti, zyrtari amerikane shtoi se forcat ruse po përpiqen të kenë edhe akses në karburant dhe ushqim, shkruan Sky News, përcjell "Bota sot".
Gjithashtu, ai bëri me dije se Rusia po tenton të gjej mënyra për të rifurnizuar trupat e saj dhe po synon të sjellë përforcime në terren.
Këto veprime, vijnë pasi ministria ukrainase e mbrojtjes pretendoi se më shumë se 200 ushtarë rusë po refuzojnë të marrin pjesë në çdo luftim.
Dorëzohen rusët, refuzojnë t’i bashkohen luftës në Ukrainë
Arife Morina
Trupat ruse po refuzojnë masivisht të marrin pjesë në luftimet kundër Ukrainës, sipas ministrisë së mbrojtjes të Ukrainës.
Në raportin e saj të fundit operacional, ajo tha se 220 ushtarë nga një njësi refuzuan të merrnin pjesë, shkruan Sky News, përcjell "Bota sot".
Që nga fillimi i pushtimit, 50 ushtarë ishin vrarë dhe 110 u plagosën brenda njësisë, tha Ukraina.
Inteligjenca amerikane ka sugjeruar gjithashtu se morali është i ulët në mesin e ushtarëve rusë, megjithëse kjo bazohet kryesisht në prova anekdotike.
Franca përgatitet të presë 100.000 refugjatë ukrainas
Franca ka nisur një plan kombëtar për të përgatitur strehim për të paktën 100.000 refugjatë ukrainas, tha sot kryeministri francez Jean Castex.
"Gjithnjë e më shumë prej tyre (ukrainasit) po gjejnë strehë në Francë ose po kalojnë tranzit nëpër territorin tonë," tha Castex, pas një takimi ndër-departamentesh të krizës për këtë çështje.
Më shumë se 26.000 refugjatë ukrainas kanë mbërritur në Francë që nga fillimi i luftës, sipas Castex. Midis tyre, 10.500 kanë përfituar qëndrim të përkohshëm të parashikuar nga politika e mbrojtjes së përkohshme të BE-së, e aktivizuar më 3 mars.
Kryeministri francez u zotua gjithashtu të ndihmojë refugjatët ukrainas që të integrohen më mirë në tregun e punës të Francës, me kurse të ofruara në agjencinë e punësimit të vendit.
"Ne po hyjmë në një krizë që do të zgjasë. Është nderi i vendit tonë të mbajë pritjen më të ngrohtë të mundshme për miqtë tanë ukrainas,” tha Castex.
Erdogan i kërkon BE-së të rifillojë bisedimet e pranimit
Presidenti i Turqisë Recep Tayyip Erdogan i kërkoi sot Bashkimit Evropian të rifillojë "negociatat e anëtarësimit", përpara samitit të liderëve të BE-së në Bruksel, kushtuar pushtimit rus të Ukrainës.
"Ne presim që BE të hapë shpejt kapitujt e negociatave të pranimit dhe të fillojë negociatat për bashkimin doganor pa iu dorëzuar llogaritjeve cinike," tha Erdogan në Ankara pas takimit me kryeministrin holandez Mark Rutte.
Deklarata e presidentit turk vjen në një kohë kur lufta në Ukrainë po e lejon Ankaranë të kthehet në skenën ndërkombëtare për shkak të përpjekjeve për të ndërmjetësuar në zgjidhjen e krizës.
Banorët e rrethuar të Mariupolit në luftë për mbijetesë
Teksa forcat ruse po vazhdojnë ta godasin qytet-portin jugor ukrainas të Mariupolit.
Rreth 300,000 banorë të ngujuar po luftojnë për mbijetesë.
Ushqimet po harxhohen, ndërsa në qytetin e rrethuar nga pushtuesit rusë nuk ka as ujë e as rrymë.
Njerëzit e strehuar nëpër bodrume të ftohta shfrytëzuan një pezullim të bombardimeve për të nxjerrë gjësende nga shtëpitë e tyre të shkatërruara dhe për t’i varrosur të afërmit e vrarë.
Scholz: Sanksionet mbi importet ruse të energjisë të jenë të menaxhueshme për Evropën
Kancelari gjerman Olaf Scholz tha se sanksionet perëndimore po tregojnë “efekte, të cilat do të bëhen më dramatike çdo ditë”, por ndërprerja e furnizimit me energji nga Rusia duhet të jetë "e menaxhueshme" për vendet evropiane.
Lufta e Ukrainës “mund të jetë një mosmarrëveshje më e gjatë dhe për këtë arsye ne duhet të përballemi së bashku”, tha Scholz, duke folur në një konferencë shtypi së bashku me presidenten e Parlamentit Evropian Roberta Metsola.
Scholz tha se qëndrimi i Gjermanisë për ndalimin e gjerë të Bashkimit Evropian për importet ruse të energjisë nuk ka ndryshuar.
“Kjo vlen edhe për shumë vende të tjera (evropiane) që janë edhe më të varura nga qymyri, nafta dhe gazi (rus), madje më shumë se Gjermania,” tha ai.
“Ne vendosëm të na bëjmë të pavarur sa më shpejt që të jetë e mundur nga importet e gazit dhe naftës nga Rusia”, tha udhëheqësi gjerman, duke shtuar se disa “punë ndërtimi dhe kontrata shumë intensive” janë të nevojshme për ta bërë Gjermaninë më pak të varur nga energjia ruse.
Ndërsa, presidentja Metsola tha se Evropa duhet të bëhet plotësisht e pavarur nga energjia ruse.
“Ne duhet të blejmë energjinë tonë nga miqtë, jo nga armiqtë, sepse në fund ne po paguajmë për këtë luftë çdo ditë. Është koha për të marrë drejtimin. Ne nuk po flasim vetëm për agjendën e gjelbër, duke e konsideruar atë nga këndvështrimi mjedisor, një këndvështrim klimatik, por po e shohim edhe nga një këndvështrim sigurie”, tha Metsola.
Biden të mërkurën udhëton për në Evropë
Presidenti i Shteteve të Bashkuara, Joe Biden, të mërkurën do të udhëtojë në Evropë, për të diskutuar me liderët evropianë dhe aleatët e NATO-s për luftën e Rusisë në Ukrainë.
“Nesër do të udhëtoj në Evropë për t’u takuar me aleatët dhe partnerët tanë, fiks një muaj pasi Putini intensifikoi luftën e tij brutale në Ukrainë”, shkroi Biden në rrjetin social Twitter.
Tomorrow, I’m traveling to Europe to meet with our allies and partners exactly one month after Putin accelerated his brutal war in Ukraine.
Biden gjatë qëndrimit në Evropë do të takohet me liderët e NATO-s dhe Bashkimit Evropian.
Ai po ashtu pritet të takohet me krerët e Polonisë, shtet që deri më tani ka pranuar më së shumti refugjatë nga Ukraina.
Kina e ‘harron’ Rusinë, Amerika vëzhgon situatën
Arife Morina
Këshilltari amerikan për sigurinë kombëtare, Jake Sullivan, tha të martën se administrata nuk e ka parë Kinën t'i japë Rusisë pajisje ushtarake që kur presidenti Joe Biden foli me Presidentin e Kinës Xi Jinping të premten e kaluar.
“Nuk mund të bëj parashikime për të ecur përpara. Ajo që mund t'ju them është që ne nuk kemi parë që nga ato takime apo që nga biseda e Presidentit me Xi, sigurimin e pajisjeve ushtarake nga Kina për Rusinë, por sigurisht, kjo është diçka që ne po monitorojmë nga afër", u tha Sullivan gazetarëve të martën.
Ai vazhdoi duke thënë: “Ne do të vazhdojmë ta monitorojmë situatën. Dhe Presidenti i bëri të qartë Presidentit Xi implikimet dhe pasojat e çdo sigurimi të tillë të pajisjeve dhe ata e kuptuan atë shumë mirë.”
Rusia ka kërkuar mbështetje ushtarake dhe ndihmë ekonomike nga Kina, thanë dy zyrtarë amerikanë për CNN javën e kaluar. Kina ka shprehur gatishmëri për t'i ofruar ndihmë Rusisë, sipas një kabllogrami diplomatik të SHBA-së drejtuar aleatëve. Si Rusia ashtu edhe Pekini kanë mohuar se ka pasur ndonjë kërkesë të tillë.
Të premten, Biden u përpoq të largonte Xi-në që të ndihmonte Rusinë, duke paralajmëruar homologun e tij kinez gjatë një videotelefonate të gjatë 110-minutëshe për "inmplikimet dhe pasojat" për Pekinin nëse do të ofronte mbështetje materiale për Moskën.
