Presidenti i Turqisë Recep Tayyip Erdogan i kërkoi sot Bashkimit Evropian të rifillojë "negociatat e anëtarësimit", përpara samitit të liderëve të BE-së në Bruksel, kushtuar pushtimit rus të Ukrainës.
"Ne presim që BE të hapë shpejt kapitujt e negociatave të pranimit dhe të fillojë negociatat për bashkimin doganor pa iu dorëzuar llogaritjeve cinike," tha Erdogan në Ankara pas takimit me kryeministrin holandez Mark Rutte.
Deklarata e presidentit turk vjen në një kohë kur lufta në Ukrainë po e lejon Ankaranë të kthehet në skenën ndërkombëtare për shkak të përpjekjeve për të ndërmjetësuar në zgjidhjen e krizës.
Negociatat mbi pranimin e Turqisë në BE, të cilat filluan më 2005, kanë ngecur vitet e fundit për shkak të tensioneve ndonjëherë intensive të Ankarasë zyrtare me Brukselin në disa fronte.
Në fund të vitit 2020, Komisioni Evropian vlerësoi se shanset e Ankarasë për anëtarësim kishin "ngecur" për shkak të vendimeve që janë në kundërshtim me interesat e BE-së të marra nga liderët e saj.
“Turqia ka vazhduar të distancohet nga Bashkimi Evropian, me një prapambetje serioze në fushat e qeverisjes dhe të drejtave themelore”, tha në atë kohë Komisioni Evropian.
Aleati i Ukrainës dhe anëtar i NATO-s, Turqia është përpjekur të lehtësojë ndërmjetësimin midis Moskës dhe Kievit që nga fillimi i krizës në Ukrainë, por ka refuzuar t'i bashkohet sanksioneve perëndimore kundër Rusisë.
