Ndërsa Rusia përpiqet të lidhë përparimet e bëra në rajonin e Kharkiv të Ukrainës me bastionin e saj në lindjen e largët të vendit, qyteti i Izyum e ka gjetur veten të përfshirë në luftime të tmerrshme, tha një zyrtar lokal, shkruan CNN, transmeton Bota sot.
Deputeti i këshillit Max Strelnyk tha për CNN se qyteti ishte "shkatërruar plotësisht" nga avionët dhe artileria ruse, edhe pse betejat e ashpra vazhduan brenda Izyum për kontrollin e tokës.
Strelnyk tha se trupat ruse pushtuan pjesën veriore të qytetit dhe po përpiqeshin të kalonin lumin Seversky Donets - i cili bën një formë U-je ndërsa kalon nëpër qytet - për të marrë gjithashtu pjesën jugore, që aktualisht mbahet nga forcat e armatosura ukrainase.
CNN ka raportuar më parë se pjesa më e madhe e Izyum-it qendror është shkatërruar nga sulmet ushtarake.
"Fatkeqësisht, nuk mund të themi numrin e saktë të të vdekurve [në qytet]," tha Strelnyk, por ai vlerësoi se "më shumë se njëqind" njerëz ishin vrarë në luftime.
Ai tha se forcat ruse kishin shkatërruar tashmë spitalin dhe morgun.
"Qyteti është nën bllokadë të plotë, trupat ruse nuk do të lejojnë askënd të hyjë apo të dalë," shtoi ai, që do të thotë se ndihma humanitare nuk është në gjendje të arrijë në qytet.
“Nuk ka ushqim, ujë apo ilaçe”, tha ai, duke e përshkruar situatën si një katastrofë humanitare.
