Ministri i Financave i Ukrainës, Serhii Marchenko thotë se qeveria nuk do të pranojë asnjë humbje territori ndaj Rusisë dhe se pavarësisht luftës, pagat dhe pensionet po paguhen.
"Dua t'ju them se pavarësisht gjithë luftës që shohim tani, qeveria jonë është ende duke funksionuar”, i tha Marchenko Julia Chatterley të CNN.
Ai tha se qeveria po paguan paga dhe pensione dhe 200 dollarë për çdo person që humbi punën për shkak të luftës, shkruan CNN, përcjell “Bota sot”.
“Tani janë më shumë se 3 milionë njerëz që janë refugjatë dhe jetojnë përkohësisht në vendet evropiane. Është gjithashtu një dëm i madh për ekonominë tonë”, tha ai.
I pyetur në lidhje me komentet e bëra nga shefi i ushtrisë ukrainase të Intel-it, Kyrylo Budanov, duke sugjeruar se presidenti rus Vladimir Putin mund të jetë në kërkim të ndarjes së Ukrainës në dy pjesë si Koreja e Veriut dhe ajo e Jugut, Marchenko tha se Ukraina nuk do të pranojë asnjë humbje territoriale.
“Ne nuk do të pranojmë asnjë humbje të vendit tonë. Ne do të luftojmë kundër çdo skenari të mundshëm që na shtyn drejt kësaj”, tha Marchenko.
“Nuk është e mundur as të përmendet se ne mund të jetojmë pa ndonjë pjesë të territorit tonë sepse bëhet fjalë për ekonominë tonë. Bëhet fjalë për njerëzit tanë. Bëhet fjalë për logjistikën tonë tani. Porti ynë në rajonin e Odesës është i bllokuar. Pra, ne duhet të gjejmë një mënyrë tjetër se si të transferojmë mallrat drejt Evropës dhe vendeve të tjera”, shtoi ministri i Financave.
Marchenko shtoi se nuk është bërë mjaftueshëm sa i përket sanksioneve.
“Për ne, është e rëndësishme që çdo qytetar rus të vuajë dhe kjo është arsyeja pse sanksionet janë shumë të rëndësishme për këtë çështje të veçantë dhe qeveria jonë dhe presidenti ynë u përpoqën të bëjnë gjithçka që është e mundur që çdo qytetar rus të kuptojë se mënyra se si ata e mbështesin pushtetin e tyre është në mënyrë të gabuar”, shtoi ai.
