Fundjava me imazhe të tmerrshme dhe histori tronditëse ka shkaktuar një valë të re zemërimi ndërkombëtar dhe, në mënyrë të pashmangshme, biseda për më shumë sanksione, raporton BBC, përcjell “Bota sot”.
Ende nuk ka njoftime konkrete, por Joe Biden tha se ato po vinin dhe se ai kishte të drejtë, që e quajti Vladimir Putinin kriminel lufte.
Gjyqet për krimet e luftës mund të duhet të presin, por udhëheqësit pranojnë se nevojiten sanksione të reja. Presidenti i Francës, Emmanuel Macron, ka bërë thirrje për më shumë masa duke synuar naftën dhe qymyrin rus.
Kancelari i Gjermanisë, Olaf Scholz, tha se Putin dhe mbështetësit e tij, sipas fjalëve të tij, do të "ndiejnë pasojat" e asaj që ndodhi në Bucha. Ministri i Ekonomisë, Robert Habeck, tha se Gjermania po punonte drejt një embargoje ndaj energjisë ruse, por se kjo nuk mund të ndodhte menjëherë.
Republika e vogël Baltike e Lituanisë po kryeson rrugën. Pas vitesh reduktimi të varësisë së madhe nga gazi rus, qeveria e saj njoftoi të dielën se importet më në fund ishin reduktuar në zero. "Nëse ne mund ta bëjmë atë, edhe pjesa tjetër e Evropës mundet", tha presindeti lituanez.
Sekretarja e Jashtme e Mbretërisë së Bashkuar, Liz Truss, tha se sanksionet e reja të ashpra do të shpallen në një takim të ministrave të jashtëm të G7 këtë javë.
Pas takimit me homologun e saj ukrainas në Varshavë, ajo tha se këto do të përfshijnë ndalimin e anijeve ruse nga portet perëndimore, goditjen e mëtejshme të bankave ruse dhe ndjekjen e industrive të reja të cilat po e mbushin me ari 'gjoksin e luftës' së zotit Putinit.
