SHBA do të dërgojë në Ukrainë edhe mjete për mbrojtjen nga armët kimike
Pentagoni bën me dije se në paketën e re të ndihmës me armatime për Ukrainën që presidenti Joe Biden autorizoi do të ketë dhe mjete për mbrojtjen nga armët kimike.
Sipas zëdhënësit, John Kirby në listën e ndihmave ushtarake përfshihen helikopterët Mi-17, obusë si dhe pajisje për mbrojtjen individuale nga ndonjë sulm i mundshëm kimik.
Nisja e kësaj ngarkese është pas shqetësimeve të fundit nga Perëndimi dhe Kievi zyrtar se Rusia është duke menduar të ndërmarrë sulme me armë të ndaluara.
Më herët, përmes një telefonate, presidenti amerikan Joe Biden i komunikoi homologut Zelensky paketën e ndihmës ushtarake prej 800 milionë dollarësh që do të nisej drejt Ukrainës.
Nuland: Ka gjasa që ShBA-të të thonë përfundimisht së është kryer gjenocid në Ukrainë
Një zyrtar i lartë i Departamentit Amerikan të Shtetit ka thënë se ka gjasa që ShBA-të të përcaktojnë përfundimisht se është kryer gjenocid në Ukrainë.
Nënsekretarja e Shtetit për Çështje Politike, Victoria Nuland, ka thënë se Biden e ka thënë nga zemra kur tha se “po shohim gjenocid në Ukrainë nga Federata Ruse dhe forcat e saj”, shkruan CNN.
Nuland tutje tha se Shtetet e Bashkuara janë në një proces të mbledhjes së provave në mënyrë që të bëjë një përcaktim zyrtar rreth gjenocidit të mundshëm në Ukrainë.
“Parashikoj se ajo që presidenti Biden e ka thënë, është ajo që në fund ka të ngjarë të ndodh kur jemi në gjendje të mbledhim të gjitha provat”, ka thënë Nuland.
Situatën në terren, Nuland e cilësoi si vendim të qëllimshëm të Rusisë për ta shkatërruar Ukrainën dhe popullsinë civile të saj.
E pyetur se pse sanksionet nuk kanë pasur asnjë efekt parandalues ndaj presidentit rus Vladimir Putin, Nuland tha se kjo po ndodh për shkak se ai [Putin] nuk kujdeset për popullin e tij, por vetëm për ambiciet e tij siç i quajti ajo, perandorake.
“Ai nuk e sheh se ajo që po bën jo vetëm që po e kthen Ukrainën në rrënoja, por gjithashtu po e kthen Rusinë në një burg”, tha ajo, shkruan CNN.
Ushtria e Ukrainës godet kryqëzorin me raketa ruse
Një kryqëzor raketor rus është goditur në Detin e Zi, sipas një raporti të medieve ukrainase.
“Dëme shumë serioze u shkaktuan në anije”, tha Suspilne News, duke cituar kreun e administratës ushtarake rajonale të Odesa.
Një burim ukrainas i tha redaktores së mbrojtjes dhe sigurisë së Sky Deborah Haynes, se anija është në zjarr dhe anije të tjera ruse po vijnë për të ndihmuar.
Anija është 25 milje detare nga Snake Island, në jug të Odesa-s, tha burimi.
Franca do të dërgojë ndihma ushtarake shtesë në Ukrainë
Me kërkesë të Kievit, Franca do t'i sigurojë Ukrainës të tjera ndihma ushtarake, tha të mërkurën ministrja franceze për Forcat e Armatosura, Florence Parly.
“Pas kërkesave të reja të Ukrainës, i njoftova homologut tim [ukrainas] se Franca do të ofrojë ndihma shtesë ushtarake, përveç 100 milionë eurove për donacione të pajisjeve të bëra tashmë”, tha Parly në një postim në Twitter.
Ministri nuk tha se çfarë do të përfshinte ndihma ushtarake shtesë.
Presidenti francez Emmanuel Macron do të flasë me homologun ukrainas Volodymyr Zelensky të mërkurën, sipas Pallatit Elize.
Rusia thotë se mori plotësisht portin e Mariupolit
Ministria ruse e Mbrojtjes, ka thënë se porti detar i Mariupol është tani nën kontrollin e saj.
Megjithatë, duket se pjesa tjetër e qytetit jugor të Ukrainës është ende e kontestuar, përcjell Bota sot.
Analisti i mbrojtjes dhe sigurisë, profesor Michael Clarke, i cili ka dhënë analiza për Sky News, thotë se kjo është "plotësisht e besueshme" dhe është " me siguri" e vërtetë.
Ai beson se Mariupol ka të ngjarë të bjerë "për disa orë, jo ditë" dhe mund të ketë disa zhvillime dramatike brenda natës.
Rusia shton bombardimet në Kharkiv, fëmijët po vdesin
Bombardimet ruse të qytetit verilindor ukrainas, Kharkiv, janë rritur në mënyrë dramatike që nga dje, tha kryebashkiaku Ihor Terekhov.
Ai tha se në mesin e të vrarëve ka edhe fëmijë, raporton Sky News, përcjell Bota sot.
"Armiku po bombardon shtëpitë e banimit, zonat e banuara. Fatkeqësisht, ka viktima civile - gjëja më e keqe është se fëmijët po vdesin", tha kryebashkiaku për televizionin kombëtar.
Imazhet që dalin nga Kharkiv sot kanë treguar ndërtesa banimi të shkatërruara dhe civilë që përpiqen të marrin pjesët e shtëpive të tyre.
Kharkiv, qyteti i dytë më i madh i Ukrainës, ka qenë skena e luftimeve intensive gjatë pushtimit rus./A.Zh
Rusia kërcënon me sulme në Kiev
Arbnore Zhushi
Ministria ruse e Mbrojtjes ka kërcënuar se "do të kryejë sulme në qendrat vendimmarrëse, përfshirë ato në Kiev".
Zëdhënësi kryesor Igor Konashenkov, tha se Ukraina do të përballej me sulmet nëse nuk ndalonte "aktivitetet subversive dhe sulmet" në Rusi, raporton Sky News, përcjell Bota sot.
Rusia më herët tërhoqi trupat nga rajoni i Kievit, pas një përpjekjeje të dështuar për të marrë qytetin, por ajo ende mund të kryejë sulme ajrore me rreze të gjatë.
Konashenkov tha se Forcat Ajrore Ruse kanë shkatërruar objektiva ushtarake në Ukrainë "duke përfshirë një post komandimi, tre depo me armë artilerie raketore dhe gjashtë grupime të pajisjeve ushtarake ukrainase".
Diplomatët çekë kthehen në ambasadën e tyre në Kiev
Ministria e Jashtme çeke thotë se diplomatët e saj janë kthyer në ambasadën në Kiev për herë të parë që kur Rusia pushtoi Ukrainën më 24 shkurt.
Ministria postoi në Twitter një foto të tre diplomatëve duke ngritur flamurin çek përpara ndërtesës.
Në një deklaratë, ministria tha se ishte një nga shumë hapat që vendi po ndërmerr për të treguar mbështetjen e tij për Ukrainën.
Republika Çeke ka qenë një nga mbështetësit më të mëdhenj të Ukrainës, pasi mbrohet nga agresioni rus.
Ishte vendi i parë i NATO-s e BE-së që dërgoi tanke në Ukrainë, ndërsa një përpjekje për financimin e turmave të organizuar nga Ambasada e Ukrainës dhe Ministria Çeke e Mbrojtjes për të blerë armë për Forcat e Armatosura të Ukrainës, ka arritur vlerën e 1 miliardë korona çeke apo 41 milionë euro.
Kush është Viktor Medvedchuk, politikani ukrainas që e quan veten mik të Putinit?
Viktor Medvedchuk, politikani i arratisur që ishte përfaqësuesi më i njohur i fraksioneve politike pro-ruse në Ukrainë dhe mik i Presidentit rus Vladimir Putin, është arrestuar nga shërbimi sekret i Ukrainës.
Një avokat i trajnuar dhe biznesmen i pasur që shërbeu në poste të ndryshme politike që nga vitet 1990, zoti Medvedchuk ishte vendosur në arrest shtëpiak vitin e kaluar për t'u përballur me akuzat për tradhti dhe financim të terrorizmit, akuza që ai i ka hedhur poshtë. Zoti Medvedchuk u arratis disa ditë pas fillimit të sulmit rus në Ukrainë.
Të mërkurën, Presidenti ukrainas Volodymyr Zelenskiy propozoi shkëmbimin e zotit Medvedchuk me robër lufte që po mbahen nga forcat ruse.
Biden miraton ndihmë ushtarake prej 800 milionë dollarësh për Ukrainën
Presidenti amerikan, Joe Biden njoftoi të mërkurën për një paketë të re ndihme ushtarake prej 800 milionë dollarësh për Ukrainën.
Ndihma përfshin armë, municione, transportues të blinduar të personelit dhe helikopterë.
Njoftimin për ndihmën e re Biden e bëri të ditur pas një telefonate me presidentin ukrainas, Volodymyr Zelensky, me të cilin bisedoi për të koordinuar dhënien e ndihmës.
“Kjo paketë e re ndihme do të përmbajë shumë nga sistemet e armëve shumë efektive dhe me aftësi të reja të përshtatura për sulmin më të gjerë që presim që Rusia të nisë në Ukrainën lindore”, tha Biden.
