LIVE: Fundosja e anijes ruse rrit tensionet me Ukrainën, reagon edhe SHBA; Putin paralajmëron Perëndimin

Presidenti rus, Vladimir Putin i tha kancelarit austriak, Karl Nehammer kur u takuan këtë javë se furnizimi i Austrisë me gaz nga Rusia është i sigurt dhe vendi mund të vazhdojë të paguajë për të në euro, tha Nehammer.

Nehammer u takua me Putinin pranë Moskës të hënën dhe deri më tani nuk e kishte përmendur publikisht diskutimin e tyre mbi sigurinë e furnizimit me gaz të Austrisë, ka raportuar APA.

Austria importon 80 për qind të gazit natyror nga Rusia dhe kundërshton një embargo të menjëhershme të gazit të Bashkimit Evropian ndaj Rusisë, duke argumentuar se kjo nuk është e mundur për momentin.

Putin tha "se furnizimi me gaz është i siguruar, se Rusia do të dorëzojë sasitë e kontraktuara dhe se pagesat mund të vazhdojnë të bëhen në euro", u citua të ketë thënë Nehammer në një intervistë të mërkurën (13 prill).

Presidenti rus, Vladimir Putin, tha më 31 mars se ka nënshkruar një dekret ku thuhet se blerësit e huaj duhet të paguajnë në rubla për gazin rus nga 1 prilli dhe kontratat do të ndërpriten nëse këto pagesa nuk do të kryhen.

Vendet e Bashkimit Evropian përveç Hungarisë e kanë kundërshtuar këtë formë të pagesës./REL

Sipas ushtrisë ukrainase, trupat ukrainase hodhën në erë një urë mbi të cilën trupat ruse po udhëtonin për në Izyum, një qytet ukrainas në lumin Donets pranë Kharkiv.

E gjithë kolona e trupave ruse thuhet se u shkatërrua në një operacion me dron.

Ky informacion ende nuk është verifikuar në mënyrë të pavarur./M.L.

Koncepti “Zoti është me ne”, ka qenë pjesë e ringjalljes së nacionalizmit rus të Vladimir Putinit, një pretendim që është në fakt sa një sakrilegj aq edhe i pavërtetë. Administrata e Putinit ka zhvilluar një fushatë të zellshme dhe të përshpejtuar për të frenuar ndikimet e huaja.

Ajo ka mbyllur Memorial dhe organizata të tjera të të drejtave të njeriut, me akuzën e të qenit “agjentë të dyshuar të të huajve”. Ndërkohë Akademia Ruse e Shkencave dhe Duma, parlamenti rus po diskutojnë mënyrat për të kufizuar ndikimet që vijnë nga jashtë.

Disa zyrtarë propozojnë që çdo kontakt ndërmjet një shkencëtari të akademisë dhe një të huaji, duhet të autorizohet më parë nga drejtuesi i institutit. Sa herë që një shkencëtar rus takohet me ndonjë të huaj, duhet të jetë i pranishëm një person i tretë; dhe në fund drejtorisë së institucionit duhet t’i dorëzohet një raport mbi takimin.

Po ashtu, e gjithë korrespondenca me shkencëtarët e huaj, duhet të monitorohet nga drejtoria e institutit. Mundësitë që ofron sot bota dixhitale, po përmbushin parashikimet e George Orwell për një Ministri të plotfuqishme të së Vërtetës.

Në fundin e viteve 1980, presidenti sovjetik Mikhail Gorbachev bëri thirrje që politikë-bërja të bazohej tek “vlerat universale”, dhe jo tek ato të klasës apo komunizmit. Tani, gjërat po kthehen aty ku ishin, ndërsa regjimi i Putinit po përqafon një kod moral mbi ato që janë “bazat e politikës shtetërore për ruajtjen dhe forcimin e vlerave tradicionale shpirtërore dhe morale ruse”.

Lexo lajmin e plotë KËTU.

Nëse Vladimir Putin nuk i thërret mendjes së shpejti dhe nuk tërhiqet nga Ukraina, atëherë Rusia do të gjendet në prag të dëbimit për një kohë shumë të gjatë nga tregjet ndërkombëtare të kapitalit. Çdo zotërues i obligacioneve të qeverisë ruse, është sot në hall të madh.

Qeveria ruse është përpjekur të shlyejë pagesat ndaj kreditorëve të saj, por Zyra e Thesarit të SHBA-së për Kontrollin e Pasurive të Huaja, po e shtrëngon në mënyrë të pashmangshme dhe me profesionalizëm lakun për t’i ndalur këto flukse parash.

Po ashtu po mbyllen të gjitha rrugët dhe kanalet mbështetëse për kompanitë e lidhura me qeverinë ruse, për vazhdimin e shërbimit të borxheve të tyre. Agjencitë e vlerësimit të kredisë dhe ofruesit e indeksit të obligacioneve standarde, po i heqin obligacionet ruse nga bizneset e tyre.

Një falimentim zyrtar nga qeveria ruse ka të ngjarë të ndodhë brenda javëve të ardhshme. Në fakt Moska e ka pranuar krizën e rëndë që po kalon, duke kërcënuar me veprime ligjore, dhe duke thënë se do të ndalojë shitjet e bonove për pjesën tjetër të vitit.

Se kë apo çfarë mund të padisë me sukses kjo mbetet e paqartë. Perspektiva e marrjes së borxheve të reja nga Rusia ishte zhdukur qëkur kjo e fundit nisi pushtimin e Ukrainës më 24 shkurt. Siç komentoi Ministri rus i Financave Anton Siluanov në gazetën ruse “Izvestia”, kostot e huamarrjes për çdo shitje obligacioni do të jenë “marramendëse”.

Lexo lajmin e plotë KËTU.

Franca ka sekuestruar 20 miliardë paund asete ruse, duke përfshirë një vilë në rivierën franceze dhe 11 prona të tjera që i përkasin Roman Abramovich, raporton France 24 News, përcjell "Bota sot".

Jersey në Ishujt Channel ka ngrirë gjithashtu 5 miliardë paund asete që i përkasin pronarit të Klubit të Futbollit Chelsea, Abramovich.

Abramovich u emërua si banori më i pasur i ishullit në vitin 2018.

Ai u sanksionua gjithashtu nga qeveria e Mbretërisë së Bashkuar muajin e kaluar si pjesë e përgjigjes së saj ndaj pushtimit rus të Ukrainës./AM

Shtëpia e Bardhë aktualisht është duke diskutuar nëse do të dërgojë një zyrtar të lartë amerikan për të takuar presidentin ukrainas në Kiev, raprton Politico, përcjell "Bota sot".

Ndër kandidatët që po shqyrtohen janë vetë Joe Biden ose zëvendësi i tij, nënpresidentja Kamala Harris. Të dy kanë vizituar Poloninë, fqinjin perëndimor të Ukrainës, javët e fundit.

Por zyrtarët i thanë Politico-s se kishte shumë më shumë gjasa që sekretari i shtetit ose sekretari i mbrojtjes të udhëtonte për të takuar Presidentin Volodymr Zelensky.

Zelensky ka organizuar një paradë të zyrtarëve perëndimorë që nga fillimi i luftës. Të mërkurën, ai priti liderët e Letonisë, Lituanisë, Polonisë dhe Estonisë.

Anija kryesore e flotës ruse të Detit të Zi, kryqëzori Moskva, u dëmtua rëndë kur nga shpërthimi i municioneve në bord, tha agjencia e lajmeve Interfax duke cituar ministrinë ruse të mbrojtjes të enjten.

Interfax tha se ekuipazhi ishte evakuuar. Agjencia tha se shpërthimi kishte ndodhur nga një zjarr dhe se shkaku ishte duke u hetuar.

Një zyrtar ukrainas tha më herët se Moskva ishte goditur nga dy raketa, por nuk dha ndonjë provë.

Anija me kapacitet 12,500 tonë ka një ekuipazh prej rreth 500 personash. Agjencitë ruse të lajmeve thanë se Moskva kishte 16 raketa “Vulkan” të cilat kanë një rreze veprimi prej të paktën 700 km.

"Si rezultat i një zjarri në kryqëzorin e raketave Moskva, shpërthyen municione. Anija u dëmtua rëndë," tha Ministria ruse e Mbrojtjes në një deklaratë. "Ekuipazhi u evakuua plotësisht."

Interfax nuk dha më shumë detaje.

Maksym Marchenko, guvernator i rajonit rreth portit të Odesës në Detin e Zi, tha më herët në një postim në internet se dy raketa kishin goditur kryqëzorin, por nuk dha prova.

Muajin e kaluar Ukraina tha se kishte shkatërruar një anije të madhe ruse, Orsk, në detin Azov, në verilindje të Detit të Zi. Moska nuk ka komentuar se çfarë kishte ndodhur me anijen./VOA

Rusia thotë se më shumë se 1000 marinsa ukrainas janë dorëzuar në qytetin port të rrethuar të Mariupolit, por Ukraina e mohon këtë.

Nënkryetari i bashkisë së qytetit, Serhiy Orlov, tha për BBC se trupat ukrainase atje ishin ende duke luftuar, përcjell "Bota sot".

Luftimet duket se po vazhdojnë rreth punimeve gjigante të çelikut Azovstal në port, i cili është një nga dy zonat që nuk janë nën kontrollin rus.

Televizioni rus ka transmetuar pamje që tregojnë se marinsat dorëzohen në punimet e çelikut.

Por një këshilltar i presidentit të Ukrainës këmbënguli se marinsat në fakt kishin depërtuar për t'u lidhur me forcat e batalionit Azov në një xhep tjetër.

Mariupol është një objektiv kyç për Rusinë pasi ajo kërkon të krijojë një rrugë tokësore për në gadishullin e Krimesë, të cilën e aneksoi në 2014./AM