Ministria e Jashtme e Ukrainës i ka bërë thirrje Kombeve të Bashkuara për të lehtësuar kthimin e fëmijëve ukrainas që janë “deportuar ilegalisht” në Rusi.
Në një deklaratë, ministria tha se Rusia ishte përfshirë në "zhvendosjen e paligjshme dhe të detyruar" të fëmijëve ukrainas, "midis tyre jetimë, fëmijë të privuar nga kujdesi prindëror, si dhe fëmijë, prindërit e të cilëve vdiqën si rezultat i agresionit ushtarak të Rusisë" në të gjithë Ukrainën, shkruan The Guardian, transmeton Bota sot.
Në deklaratë thuhet:
Në kundërshtim me të drejtën ndërkombëtare humanitare dhe standardet bazë të humanizmit, Rusia është e përfshirë në rrëmbimin e fëmijëve të organizuar nga shteti dhe shkatërrimin e së ardhmes së kombit ukrainas.
Veprime të tilla të pushtuesve rusë mund të cilësohen si rrëmbim dhe kërkojnë një reagim vendimtar nga komuniteti ndërkombëtar, në radhë të parë nga organizatat përkatëse ndërkombëtare.
Ukraina ka akuzuar vazhdimisht forcat ruse se kanë dëbuar me forcë mijëra fëmijë nga rajonet Donetsk dhe Luhansk të Ukrainës lindore që nga fillimi i luftës.
Në fillim të këtij muaji, dy individë thanë se ata dhe gra dhe fëmijë të tjerë u transportuan me forcë në territorin rus nga qyteti i rrethuar i Mariupolit në mars. Zëdhënësi i Kremlinit, Dmitry Peskov, i ka mohuar këto akuza, duke pretenduar se "raportet e tilla janë gënjeshtra".
