Qeveria e qendrës së djathtë të Sllovakisë humbi shumicën e saj parlamentare pas dorëheqjes së katër ministrave liberalë.
Ministrat e Punëve të Jashtme, të Arsimit dhe të Drejtësisë kanë dhënë sot dorëheqjen pas dorëheqjes së kryetarit të partisë së tyre, ministrit të ekonomisë, Richard Sulik.
“Me dorëheqjet e këtyre ministrave, ne po hyjmë në periudhën e një qeverie të pakicës”, u tha gazetarëve kryeministri Eduard Heger.
Sulik, kreu i partisë liberale Liria dhe Solidariteti (SaS), dha dorëheqjen javën e kaluar, duke kërkuar dorëheqjen e ministrit të financave Igor Matovic.
“Do të jemi një opozitë konstruktive, profesionale, por edhe e ashpër”, tha Sulik.
Ministri në largim i Ekonomisë është përplasur shpesh me Matovic, ish-kryeministrin, i cili dha dorëheqjen si kreu i qeverisë vitin e kaluar gjatë një krize të mëparshme qeveritare. Koalicioni tre-partiak, i cili vazhdon të mbështesë qeverinë, tani ka vetëm 70 nga gjithsej 150 deputetë në parlament.
“Gjatë miratimit të ligjit në parlament do të kërkojmë votat e deputetëve të partive demokratike”, tha Heger.
E udhëhequr fillimisht nga Matovic dhe më pas nga Heger, qeveria sllovake e qendrës së djathtë ka qenë në pushtet që nga zgjedhjet parlamentare të vitit 2020, të fituara në bazë të një programi kundër korrupsionit.
