LIVE: Shpalli ligjin ushtarak në rajonet e okupuara të Ukrainës – “Taktikë e dëshpëruar”/ Biden i reagon ashpër Putinit

Sulmet ajrore të Rusisë me raketa ndërprenë furnizimin me ujë dhe energji për mijëra ukrainas të martën. Presidenti i Ukrainës, Volodimir Zelenski tha se sulmi është pjesë e fushatës ruse për ta lënë Ukrainën në të ftohtë dhe në errësirë.

Sipas tij, rreth një e treta e stacioneve elektrike të Ukrainës janë shkatërruar gjatë javës së shkuar duke lënë pjesë të tëra të vendit në terr të plotë.

“Nuk ka më vend për negociata me regjimin e Putinit”, tha përmes një reagimi në twitter zoti Zelenski.

Privimi i njerëzve nga uji, energjia dhe ngrohja teksa po afron dimri dhe përdorimi i beftë i dronëve vrasës shënojnë një etapë të re në luftën e Presidentit Rus Vladimir Putin.

Bombardimet ajrore duket se synojnë të godasin rezistencën që kanë treguar ukrainasit, prej 8 mujash, që nga dita e parë që u përballën me agresionin rus.

Shërbimet bazë nuk janë më të sigurta edhe larg vijave të para të luftës, si pasojë e sulmeve të përditshme ajrore që dëmtojnë strukturat kyçe, duke shkaktuar ndonjëherë dëme të pariparueshme.

Qyteti i fundit që mbeti plotësisht pa energji dhe ujë ishte Zhytomyri, me rreth 250 mijë banorë, një qendër e bazave ushtarake dhe industrive. Ai ndodhet rreth 140 kilometra në perëndim të Kievit.

Zyrtarët thanë se spitalet e qytetit vunë në punë gjeneratorët pas goditjes me raketa të martën të një stacioni elektrik. Edhe vendbanime të tjera në zonë mbetën pa energji.

Në kryeqytet, në Kiev, sulmet ajore dëmtuan dy impiante energjitike dhe vranë dy persona, thanë autoritetet. Sulmi la 50,000 qytetarë pa energji elektrike.

Gjithashtu sulmet dëmtuan rëndë një njësi energjitike në qytetin e Dnipros.

Rusia po përdor mjete të ndryshme për sulmet e saj.

Raketat anti-ajrore S-300, të ripërshtatura për të goditur në tokë, u përdorën gjatë sulmeve në Myloaiv, ndërsa arsenalet e raketave të tjera po i mbarohen.

Në qytetin lindor të Kharkivit, një zonë industriale u godit nga tetë raketa të lëshuara pranë kufirit me Rusinë.

Një seri dronësh vetëvrasës të mbushur me eksplozivë goditën gjithashtu Kievin të hënën, me objektiv stacionet e energjisë duke shembur pjesërisht ndërtesat. Një dron u përplas me shtëpi, duke vrarë katër persona.

Ukraina thotë se Rusia po merr mijëra dronë nga Irani. Dronët Shahed, të prodhuar në Iran, që goditën objektivat në Kiev, janë përdorur gjerësisht nga Rusia, në javët e fundit.

Vetëm gjatë javës së kaluar, më shumë se 100 dronë të prodhuar nga Irani kanë goditur centralet elektrike, impiantet e trajtimit të ujrave të zeza, shtëpi, ura dhe objektiva të tjera në zonat urbane, tha Ministria e Jashtme e Ukrainës.

Në një fjalim televiziv të hënën mbrëma, Presidenti Zelenski tha se Rusia po përdor dronët pasi po humbet terren në luftë.

"Rusia nuk ka asnjë shans në fushën e betejës dhe po përpiqet të kompensojë humbjet e saj ushtarake me terror, për të ushtruar presion mbi ne, mbi Evropën, mbi të gjithë botën", tha Presidenti Zelenski./VOA

Në historinë e Ukrainës qyteti i Zaporizhias njihet si një fortesë që për shekuj me radhë ka qëndruar kundër pushtimeve të huaja. Tani, siç njofton korrespondentja e Zërit të Amerikës Anna Chernikova, qyteti po e merr sërish këtë rol, duke u kthyer në një strehë për mijëra njerëz të zhvendosur brenda vendit, kryesisht banorë që u detyruan të largohen nga rajonet jugore dhe lindore që kontrollohen nga forcat ruse.

Qyteti i Zaporizhias në Ukrainën juglindore për muaj të tërë po përballet me sulme të vazhdueshme dhe të pamëshirshme të Rusisë dhe nuk ka shenja se kjo situatë po shkon drejt fundit.

Qyteti, që njihet për lidhjet e tij historike me luftëtarët legjendarë të Ukrainës – Kozakët Zaporizhianë – tani është kthyer në një qendër për ukrainasit e zhvendosur brenda vendit, që ikin nga territoret e pushtuara nga Rusia në jug dhe lindje.

Zaporizhia ka mirëpritur rreth 400 mijë persona të zhvendosur. Më shumë se 100 mijë kanë gjetur një shtëpi të dytë atje.

Valentyna është larguar nga qyteti i pushtuar i Heniçeskut në rajonin e Khersonit së bashku me djalin e saj. Ajo i tha Zërit të Amerikës se iu deshën tre ditë për të arritur në territorin e kontrolluar nga Ukraina.

“Donim me ngulm të arrinim në qytetin e Zaporizhias, sepse situata ishte bërë e padurueshme. Donim të shihnim flamujt tanë, popullin tonë, të ndjenim tokën tonë amtare nën këmbët tona, të shihnim buzëqeshjen e popullit tonë të sinqertë ukrainas. Ardhja deri këtu ishte e vështirë dhe stresuese. Për shkak të bombardimeve na kthyen. Kaluam natën në një makinë. Shumë e vështirë”, thotë ajo.

Zaporizhia është një pikë strategjike për kundërsulmin e Ukrainës në jug. Javëve të fundit qyteti po përballet me bombardime intensive. Raketat ruse kanë vrarë një numër të madh civilësh dhe kanë plagosur qindra të tjerë.

Shumë organizata bamirësie janë të angazhuara në këtë qytet. Përfaqësuesit e tyre thonë se njerëzit kanë nevojë për mbështetje të menjëhershme humanitare dhe psikokogjike.

“Duhet të kuptojmë realitetin e ri se rreziqe të paimagjinueshme, tani janë të mundura. Pra, për fat të keq, duhet të jetojmë nën këto rrethana”, thotë Viacheslav Dundukov nga organizata “Buzëqeshja”.

Qyteti i Zaporizhias po përjeton reputacionin historik të një fortese në juglindje të Ukrainës, një njohje e fituar ndër shekuj. Qytetarët e saj janë të gatshëm që edhe një herë të sakrifikojnë për të ndihmuar të tjerët.

Kryeministrja e Finlandës thotë se është e bindur se ka "mbështetje të gjerë" brenda parlamentit të vendit të saj për të ndërtuar një gardh në kufirin e vendit nordik me Rusinë.

Ideja u propozua fillimisht nga zyrtarët finlandezë të rojeve kufitare, raporton Sky News, përcjell Bota sot.

Pati një fluks të qytetarëve rusë që iknin në Finlandë pasi Vladimir Putin fillimisht njoftoi një mobilizim të pjesshëm muajin e kaluar, duke kërkuar që të rinjtë të thirreshin në luftë me Ukrainën.

Qeveria e Finlandës u përball më pas me presion nga publiku dhe opozita e djathtë dhe përfundimisht mbylli kufirin tërësisht për turistët rusë./Botasot

Sulmet e fundit të Rusisë në zonat civile të Ukrainës u diskutuan në një telefonatë midis kryeministres britanike Liz Truss dhe presidentit francez Emmanuel Macron.

Një zëdhënës i Downing Street tha: “Kryeministrja foli me presidentin francez Emmanuel Macron dje pasdite”, raporton Sky News, përcjell Bota sot.

“Udhëheqësit diskutuan shqetësimin e tyre të thellë për sulmet e fundit barbare të Rusisë në zonat civile në Ukrainë.

“Ata ranë dakord që Mbretëria e Bashkuar dhe Franca do të vazhdojnë të punojnë ngushtë së bashku me aleatët për të mbështetur Ukrainën dhe për të koordinuar përgjigjen tonë ndaj agresionit rus”.

“Kryeministrja dhe presidenti Macron mirëpritën gjithashtu mundësinë e fundit për t'u takuar personalisht në samitin e liderëve në Pragë dhe pritnin me padurim vazhdimin e thellimit të bashkëpunimit dypalësh”, u tha në njoftim./BS

Gazeta italiane Corriere della Sera ka publikuar një audio, në të cilën ish-kryeministri Italian Silvio Berlusconi dëshmon miqësinë e tij të ngushtë me presidentin rus, Vladimir Putin.

Në audion e regjistruar nga agjencia e lajmeve Lapress, Berlusconi bisedon me deputetët e partisë Forza Italia.

Ai ndalet te raporti me Putinin.

Teksa pohon se lufta Ukrainë-Rusi është e vërtetë dhe se Italia po i jep para dhe armë Ukrainës, Berlusconi pranon se ka sërish marrëdhënie të mira me Putinin dhe se ky i fundit i dërgoi 20 shishe me vodka dhe një letër me urim për ditëlindje.

“Unë iu përgjigja me shishe verë Lambrusco dhe një letër urimi“, thotë Berlusconi.

Silvio Berlusconi festoi ditëlindjen e tij të 86-të më 29 shtator. Sakaq partia e Berlusconit ka reaguar duke thënë se deklarata për miqësi me Putinin janë bërë vite me parë dhe se nuk janë aktuale.

Ministria e Jashtme e Greqisë ka paralajmëruar qytetarët që të qëndrojnë larg Ukrainës dhe u bëri thirrje atyre që janë ende në vend që të largohen menjëherë.

Në një deklaratë të lëshuar brenda disa orësh nga vala e fundit e sulmeve ajrore ruse, ajo “dekurajoi fuqimisht” çdo udhëtim në Ukrainë duke e përshkruar situatën në zhvillim të sigurisë si “të paqëndrueshme dhe të pasigurt”.

“Në të njëjtën kohë, qytetarët grekë që aktualisht ndodhen në Ukrainë këshillohen të largohen menjëherë nga vendi. Qytetarët grekë që nuk janë larguar tashmë nga vendi, këshillohen që të regjistrojnë menjëherë të dhënat e kontaktit në ambasadën greke në Kiev”, tha Ministria e Jashtme.

Këshillimi i udhëtimit u lëshua ndërsa ministri i punëve të jashtme të vendit, Nikos Dendias, njoftoi se do të zhvillonte bisedime në Kiev me homologun e tij ukrainas, Dmytro Kuleba dhe zyrtarë të tjerë të lartë.

Në një deklaratë të veçantë, e cila ndaloi së përcaktuari kohën e udhëtimit për arsye sigurie, ministria e jashtme tha: “Kjo do të jetë vizita e tretë e ministrit në Ukrainë që nga pushtimi rus, pasi ai tashmë ka vizituar Odesën, një qytet i lidhur pazgjidhshmërisht me Helenizmi, dy herë.”

Politikani grek, thuhet aty, pritej të përsëriste mesazhin se Greqia “mbështet integritetin territorial dhe sovranitetin e të gjitha shteteve dhe dënon revizionizmin, ngado që ai vjen”.