Moti i keq ka goditur disa zona në Itali prej mëngjesit të djeshëm. Në Montella , ku po zhvillohet Festivali i Gështenjave, lumenjtë kanë pushtuar rrugët e qytetit, duke marrë përpara edhe stendat dhe shtëpizat e vogla që ishin ngritur për festivalin.
Mbrojtja civile dhe zjarrfikësit e Avellino janë në gatishmëri për dëme të mundshme dhe për të organizuar shpëtimin e personave, nëse do të ketë raste. Ndërkohë, Mbrojtja Civile rajonale ka zgjatur alarmin e verdhë të motit deri nesër, e shtunë 5 nëntor.
“Duke pasur parasysh kushtet e jashtëzakonshme të motit në zhvillim, ftohen qytetarët të kufizojnë lëvizjet me vetura, veçanërisht përgjatë itinerarit të Festivalit të Gështenjës. Prioritet është sigurimi i stendave pa bllokuar qarkullimin. Lënia e kalimit të lirë për emergjencë dhe automjetet e shpëtimit”, njoftoi Bashkia e Montellas.
Rrugë dhe nënkalime të përmbytura ka edhe në zonën e Salerno-s, veçanërisht në zonën e Fisciano dhe Mercato San Severino. Autostrada Avellino-Salerno është e bllokuar dhe ka radhë prej 10 kilometrash.
Reshjet intensive kanë goditur edhe qytetin e Napolit pasditen e sotme, me shi dhe rrufe. Kryebashkiaku Gaetano Manfredi ka urdhëruar mbylljen e parqeve, kopshteve dhe varrezave publike për ditën e sotme, në lidhje me alarmin rajonal të motit. Në shumë rrethe të qytetit ka rrugë të përmbytura dhe lumenj uji.
Pamjet KETU
